ຄໍາໄພ ສົມຊະນະ ນັກຮົບທຸລະກິດປະຕິບັດ

ຂ່າວ: ຣັດສະໝີ ດວງສັດຈະ

ກ່ອນເຂົ້າລາຍງານຂ່າວປິດກອງປະຊຸມສະໄໝສາມັນ ເທື່ອທີ 2 ຂອງສະພາ ແຫ່ງຊາດ ຊຸດທີ IX (17.11.2021); ຜູ້ຂຽນ, ໄດ້ມີໂອກາດເຂົ້າສໍາພາດພິເສດ ທ່ານ ຄໍາໄພ ສົມຊະນະ ປະທານບໍລິສັດກຸ່ມຄໍາໄພ ຊະນະ ຈໍາກັດຜູ້ດຽວ ທີ່ສຳນັກງານກຸ່ມບໍລິສັດດັ່ງກ່າວຢູ່ນະຄອນຫຼວງວຽງຈັນ (ນວ) ຈຶ່ງຮູ້ວ່າ: ທ່ານ ຄໍາໄພ ນັກທຸລະກິດໄວ 65 ປີ, ມີວຸດທິການສຶກສາຫ້ອງ ປ4, ມີຖິ່ນກໍາເນີດຈາກດິນແດນຊຽງຂວາງວິລະຊົນໃນຄອບຄົວຊາວໄຮ່ທີ່ທຸກຍາກຊຶ່ງໃນອະດີດທ່ານຮ່ວມກັບພັນລະຍາໄດ້ສີ 2 ຝາມືຈາກການເຮັດໄຮ່ກ້າວມາເປັນພໍ່ຄ້ານ້ອຍຄ່ອຍຂະຫຍັບມາເປັນຊ່າງໄມ້ສໍາເລັດຮູບ (ເຟີນິເຈີ); ຈາກນັ້ນ, ໄດ້ຜັນຕົນເອງຕາມກົນໄກເສດຖະກິດຕະຫຼາດຂອງພັກທີ່ມີການດັດສົມຂອງລັດໂດຍອີງໃສ່ທ່າແຮງ, ແຫຼ່ງທຶນທີ່ສະສົມບວກກັບແຫຼ່ງທຶນເງິນກູ້ຈາກທະນາຄານກໍ່ຄືດ້ວຍການຮ່ວມມືຈາກທິມງານ ແລະລູກຄ້າຈຶ່ງເຮັດໃຫ້ເກີດມີບໍລິສັດ ກຸ່ມຄໍາໄພ ຊະນະ ຈໍາກັດຜູ້ດຽວໝັ້ນຄົງ ແລະເຕີບໃຫຍ່ໄປກັບປະເທດຊາດຄືໃນທຸກວັນນີ້.

  ທ່ານ ຄໍາໄພ ສົມຊະນະ ຢືນຢັນວ່າ: ປະຈຸບັນ, ກຸ່ມບໍລິສັດໃນເຄືອມີບໍລິສັດ ນ້ອຍ/ໃຫຍ່ ແລະການຜະລິດຕິດພັນກັບຂະແໜງການພັດທະນາໃນນີ້ມີຂະແໜງກໍ່ສ້າງ, ທ່ອງທ່ຽວ, ກະສິກໍາ...ຕົ້ນຕໍກໍ່ແມ່ນການປູກຝັງ-ລ້ຽງສັດ ຊຶ່ງເປັນຄວາມມັກ, ເປັນຊີວິດຈິດໃຈ; ໃນຜ່ານມາບໍລິສັດພວກເຮົາໄດ້ປູກໄມ້ອຸດສາຫະກໍາເປັນປ່າຢູ່ ນວ ແລະແຂວງວຽງຈັນ ເກືອບ 5 ລ້ານຕົ້ນ ສະເພາະໄມ້ເກດສະ ໜາ 1,6 ລ້ານຕົ້ນ; ຖ້າວ່າພາກລັດ, ເພີ່ນມີນະໂຍບາຍປູກປ່າໄມ້ເສດຖະກິດປະດັບ (ໄລຍະຫ່າງພໍປະມານ) ລຽບຕາມແຄມທາງແຕ່ເໜືອເຖິງໃຕ້; ຕາມແລວທາງຕາເວັນອອກ-ຕາເວັນຕົກ ຫຼືສາຍທາງຕ່າງໆທັງເບື້ອງຊ້າຍ ແລະເບື້ອງຂວາ; ຂ້າພະເຈົ້າ, ກໍ່ຂໍເປັນຜູ້ໜຶ່ງທີ່ຂານອາສາຮ່ວມກັບພາກລັດ ແລະຊາວບ້ານປູກປ່າໄມ້ເສດຖະກິດດ້ວຍຄວາມຮັບຜິດຊອບລະຫວ່າງແຂວງຕໍ່ແຂວງ, ເມືອງຕໍ່ເມືອງ, ບ້ານຕໍ່ບ້ານໂດຍການມືສ່ວນຮ່ວມຢ່າງຈິງຈັງຂອງປະຊາຊົນຕາມຫຼັກວິຊາການດ້ວຍການບົວລະບັດ, ຮັກສາເພື່ອປະກອບສ່ວນເຂົ້າໃນ 6 ສໍ ກໍ່ຄືເພີ່ມຄວາມສະເໜ່, ເພີ່ມຄໍາຂຽວໃຫ້ປະເທດຊາດກາຍເປັນມູນມໍລະດົກອັນລໍ້າຄ່າໃຫ້ແກ່ລູກຫຼານທັງຈະເຮັດໃຫ້ນັກທ່ອງທ່ຽວເພີ່ມຄວາມປະທັບໃຈຕໍ່ກັບແຜ່ນດິນເມືອງລາວຍິ່ງໆຂຶ້ນ.

  ທ່ານຍັງກ່າວອີກວ່າ: ໃນວັນຊາດ ທີ 2 ທັນວາ ຕໍ່ໜ້ານີ້, ຂັ້ນເທິງກໍ່ຈະເປີດຂະບວນເດີນລົດໄຟຢ່າງເປັນທາງການ, ກ່ອນອື່ນກໍ່ຈະເປັນຂະບວນລົດຂົນສົ່ງສິນຄ້າໄປຈີນໂດຍສະພາະແມ່ນພືດພັນທະຍາຫານ, ສັດລ້ຽງຕ່າງໆເປັນສິນຄ້າສົ່ງອອກ; ສໍາລັບກຸ່ມບໍລິສັດພວກເຮົາໄດ້ຕັ້ງເປົ້າຮອດປີ 2025 ຈະລ້ຽງງົວໃຫ້ໄດ້ 11.111 ໂຕ; ດຽວນີ້, ບໍລິສັດໄດ້ນໍາແນວພັນແມ່ງົວໃຫ້ຊາວເມືອງອານຸວົງ ແລະເມືອງທ່າໂທມຈໍານວນໜຶ່ງລ້ຽງ 2.000 ກວ່າໂຕ, ລ້ຽງຄອບຄົວລະ 2 ຫາ 5 ແມ່ ດ້ວຍເງື່ອນໄຂ 2+3, ສະເພາະໃນປີ 2019 ຊາວບ້ານອອມ, ເມືອງອານຸວົງໄດ້ເອົາງົວໄປລ້ຽງ 209 ແມ່, ຄອບຄົວລະ 2 ແມ່, ກໍານົດຄອບຄົວລະ 4 ປີ, ຄາດວ່າ: ຄອບຄົວໜຶ່ງຈະອອກແມ່ແຜ່ລູກ ແລະຈະໄດ້ຮັບຜົນ ຫຼືຮັບລູກງົວມາເປັນຂອງຕົນເອງປະມານ 6-8 ໂຕ,ສໍາລັບເງື່ອນໄຂຂອງຜູ້ທີ່ຈະລ້ຽງຕ້ອງເປັນຄົນດຸໝັ້ນ,ມີຄັງ (ຫຍ້າ), ເບິ່ງແຍງລ້ຽງດູສັດເປັນຢ່າງດີ; ທາງບໍລິສັດກໍ່ຈະຊ່ວຍເຫຼືອທາງດ້ານວິຊາການ,ເມື່ອຮອດກໍານົດແລ້ວກໍ່ຈະເອົາແມ່ງົວຄືນເພື່ອໃຫ້ຄອບຄົວ ຫຼືບ້ານອື່ນນໍາໄປຜັນຂະຫຍາຍໃນການລ້ຽງຕໍ່ໄປ.

    ຫຼ້າສຸດ 22 ພະຈິກ 2021 ບໍລິສັດ ກຸ່ມຄໍາໄພ ຊະນະ ຈໍາກັດຜູ້ດຽວ ໄດ້ຮັບຄວາມໄວ້ວາງໃຈຈາກການນໍາຂອງ ແຂວງໄຊສົມບູນ ແລະ ນວ ໃຫ້ສະໜອງງົວປ້ອນຕະຫຼາດ ນວ ໂດຍໄດ້ມີການເຊັນສັນຍາສະໜອງງົວໃຫ້ລັດວິສາຫະກິດສະບຽງອາຫານ ນວ ໃນເບື້ອງຕົ້ນເດືອນລະ 100 ໂຕ, ຄວາຍ ແລະແບ້ຈໍານວນໜຶ່ງຊຶ່ງບໍລິສັດກຸ່ມ ຄໍາໄພ ຊະນະ ກໍ່ມີຄວາມພ້ອມເພາະບໍລິສັດໄດ້ສົ່ງເສີມການລ້ຽງທີ່ແຂວງໄຊສົມບູນ ແລະແຂວງຕ່າງໆ ເພື່ອມາປ້ອນໃຫ້ໂຮງງານຂ້າສັດດອນດູ່ (ລັດວິສາຫະກິດສະບຽງອາຫານ ນວ) ຕາມລາຄາທ້ອງຕະຫຼາດ; ສ່ວນຄວາຍ ແລະແບ້ກໍ່ຈະສະໜອງຕາມຄວາມສາມາດຕົວຈິງຂອງຕົນ.

   ທ່ານ ຄໍາໄພ ສົມຊະນະ ກ່າວວ່າ: ກຸ່ມບໍລິສັດພວກເຮົາໄດ້ຈັດຕັ້ງຜັນຂະຫຍາຍແນວທາງ, ແຜນນະໂຍບາຍຂອງພັກ-ລັດຖະບານ ທີ່ໃຫ້ນັກທຸລະກິດມີສ່ວນຮ່ວມໃນຂະບວນ “ຮັກຊາດ ແລະພັດທະນາ” ແລະຊຸກຍູ້ສົ່ງເສີມການລ້ຽງ-ການປູກໃຫ້ເປັນສິນຄ້າພາຍໃນ ແລະສົ່ງອອກຕ່າງປະເທດເປັນຂະບວນການຟົດຟື້ນຊຶ່ງນັບແຕ່ຕົ້ນປີ 2018 ເປັນຕົ້ນມາ, ບໍລິສັດຂອງຂ້າພະເຈົ້າໄດ້ຊ່ວຍສົ່ງເສີມພໍ່ແມ່ປະຊາຊົນຕາມຂະບວນການດັ່ງກ່າວຢ່າງເປັນຮູບປະທໍາໂດຍນໍາເອົາແນວພັນຫຍ້າ, ແນວພັນສັດລ້ຽງ ມາໃຫ້ປະຊາຊົນເມືອງອານຸວົງ ແລະ ເມືອງທ່າໂທມ, ແຂວງໄຊສົມບູນ ຈໍານວນ 455 ຄອບຄົວ ໃນນີ້ມີງົວ 2.000 ກວ່າໂຕ ແລະໃນ ປີ 2022 ຈະສືບຕໍ່ນໍາເອົາງົວຈໍານວນ 1.500 ໂຕ ມາໃຫ້ປະຊາຊົນເມືອງທ່າໂທມລ້ຽງຕື່ມອີກ; ສະເພາະຢູ່ເມືອງນາຊາຍທອງ, ນວ ມີເກືອບ 3.000 ໂຕ ແລະໃນປີ 2022 ກໍ່ຈະຂະຫຍາຍເນື້ອທີ່ປູກຫຍ້າຫຼາຍ 300 ເຮັກຕາ ເພື່ອລ້ຽງງົວເປັນຟາມຢູ່ 6 ບ້ານ ເຂດໜອງຜື, ເມືອງນາຊາຍທອງ ເພື່ອຮອງຮັບການປູກຫຍ້າປ້ອນຟາມງົວຂອງບໍລິສັດ; ໃນຂະນະນີ້, ບໍລິສັດຍັງມີຟາມງົວຢູ່ບ້ານແສນດິນ, ເມືອງນາຊາຍທອງ, ນວ ເປັນຟາມງົວຂຸນເພື່ອເປັນສິນຄ້າ, ມີງົວລ້ຽງໝູນໃນຟາມ 1.300 ໂຕ, ຟາມງົວຢູ່ບ້ານນ້ອຍ (ເຂດຫ້ວຍຊອນ-ຫ້ວຍຊົ້ວ) ເປັນຟາມລ້ຽງງົວພໍ່ແມ່ພັນ ລວມມີ 1.500 ໂຕ.

   ເນື່ອງໃນໂອກາດວັນຊາດ ທີ 2 ທັນວາ ຄົບຮອບ 46 ປີ (2 ທັນວາ 1975-2 ທັນວາ 2021) ທີ່ຈະມາເຖິງໃນມໍ່ໆນີ້; ໃນນາມປະທານບໍລິສັດ ກຸ່ມຄໍາໄພ ຊະນະ ຈໍາກັດຜູ້ດຽວ ຂໍສະແດງຄວາມຮູ້ບຸນຄຸນອັນສູງສົ່ງ ແລະຂໍອວຍພອນໄຊອັນປະເສີດມາຍັງບັນດາທ່ານການນໍາຂອງພັກ, ຂອງລັດຖະບານຈົ່ງມີອາຍຸ ວັນນະ ສຸຂະ ພາລະ ເຂັ້ມແຂງໝັ້ນຍືນ, ສືບຕໍ່ເປັນຮົ່ມໂພ-ຮົ່ມໄຊ ແດ່ພະນັກງານ, ທະຫານ, ຕໍາຫຼວດ, ນັກທຸລະກິດ ແລະປະຊາຊົນບັນດາເຜົ່າທຸກຖ້ວນໜ້າ; ຂໍອວຍພອນໃຫ້ການນໍາຂະແໜງການ/ທ້ອງຖິ່ນ, ພໍ່ຄ້າຊາວຂາຍຕະຫຼອດເຖິງທຸກທ່ານທີ່ໄດ້ໃຫ້ການສະໜັບສະໜູນ, ອູ້ມຊູ, ຮ່ວມມື ແລະອຸປະກາລະແດ່ກຸ່ມບໍລິສັດຂອງພວກເຮົາດ້ວຍດີສະເໝີມາ ແລະຂໍໃຫ້ແຂງແຮງລໍ້າລວຍ ແລະປະສົບຜົນສໍາເລັດໃນໜ້າທີ່ການງານ ແລະຊີວິດສ່ວນຕົວ.

แชร์