ກຽມພັດທະນາແຫຼ່ງທ່ອງທ່ຽວແຄມນໍ້າລີກ

    ພິທີເຊັນສັນຍາບົດບັນທຶກຄວາມເຂົ້າໃຈ MOU ເພື່ອສຶກສາສຳຫຼວດ ແລະເກັບກຳຂໍ້ມູນຄວາມເປັນໄປໄດ້ຂອງໂຄງການເພຶ່ອພັດທະນາແຫຼ່ງທ່ອງທ່ຽວແຄມນໍ້າລີກຢູ່ເຂດບ້ານສາມໝື່ນ ເມືອງເຟືອງແຂວງວຽງຈັນ ຈັດຂື້ນໃນວັນທີ 22 ພະຈິກ 2021 ທີ່ຫ້ອງປະຊຸມຫ້ອງການແຜນການ ແລະການລົງທຶນເມືອງເຟືອງ ລະຫວ່າງອົງການປົກຄອງເມືອງເຟືອງຕາງໜ້າໂດຍທ່ານ ຄຳສອນ ສີວົງດາວ ຫົວໜ້າຫ້ອງການແຜນການ ແລະການລົງທຶນເມືອງເຟືອງກັບບໍລິສັດ ອະພິມາ ສັງຫາລິມາຊັບ ແລະອະສັງຫາລິມະຊັບ ຕາງໜ້າໂດຍທ່ານ ວັນວາລີ ທຳມະວົງ ປະທານບໍລິສັດມີສຳນັກງານຕັ້ງຢູ່ ເມືອງວັງວຽງ ແຂວງວຽງຈັນ ໃຫ້ກຽດເຂົ້າຮ່ວມຂອງທ່ານ ທະວີສັກ ວົງສະ ຫວ່າງຮອງເຈົ້າເມືອງໆເຟືອງ ມີຫົວໜ້າຫ້ອງການທີ່ກ່ຽວຂ້ອງ ແລະພະນັກງານວິຊາການທັງສອງຝ່າຍ.
 ທັງສອງຝ່າຍມີຄວາມເອກະພາບສ້າງບົດບັນທຶກຮ່ວມກັນໂດຍເຫັນດີໃຫ້ບໍລິສັດ ລົງສຳຫຼວດ ເກັບກຳຂໍ້ມູນ, ອອກແບບ ແລະວິເຄາະໂຄງການພັດທະນາແຫຼ່ງທ່ອງທ່ຽວແຄມນໍ້າລີກ ໄລຍະ 6 ກິໂລແມັດ ຢູ່ຂອບເຂດບ້ານສາມໝື່ນ ເມືອງເຟືອງ ໄລຍະເວລາ 3 ເດືອນ ຫຼື 90 ວັນ ເພຶ່ອສຶກສາຄວາມເປັນໄປໄດ້ຂອງໂຄງການກ່ອນຈະນຳສະເໜີ ຂໍອະນຸມັດກໍ່ສ້າງ ແລະສຳປະທານຈາກອົງການປົກຄອງເມືອງເຟືອງໃນການລົງສຳຫຼວດນັ້ນທາງບໍລິສັດເປັນຜູ້ອອກທຶນທັງໝົດ ແລະຈະຕ້ອງໄດ້ປະສານສົມທົບກັບອົງການປົກຄອງຂັ້ນບ້ານ ແລະຄະນະກຳມະການຂັ້ນເມືອງພ້ອມກັນລົງສຳຫຼວດຕົວຈິງ.
   ທ່ານ ວັນວາລີ ທຳມະວົງ ກ່າວວ່າ: ຜ່ານມາທາງບໍລິສັດແມ່ນມີປະສົບການໃນການພັດທະນາແຫຼ່ງທ່ອງທ່ຽວທາງທຳມະຊາດຢູ່ເມືອງວັງວຽງມີຄວາມກ້າວໜ້າ ແລະຟົດຟື້ນສາມາດສ້າງລາຍຮັບໃຫ້ແກ່ເອກຊົນ ແລະພາກລັດໄລຍະຜ່ານມາເຫັນໄດ້ວ່າສະພາບການທ່ອງທ່ຽວຢູ່ເມືອງເຟືອງໄດ້ມີທ່າຂະຫຍາຍຕົວສະນັ້ນຈຶ່ງຢາກນຳໃຊ້ບົດຮຽນທີ່ປະສົບຜົນສຳເລັດນຳມາພັດທະນາການທ່ອງທ່ຽວຢູ່ທາງເມືອງເຟືອງໃຫ້ນັບມື້ຂະຫຍາຍຕົວ ແລະສ້າງຄວາມສົນໃຈໃຫ້ນັກທ່ອງທ່ຽວເຂົ້າມາໃນເມືອງເຟືອງນັບມື້ເພີ່ມຂື້ນ.
   ໂອກາດນີ້ ທ່ານ ທະວີສັກ ວົງສະຫວ່າງ ກໍ່ໄດ້ມີຄຳເຫັນໂອ້ລົມພ້ອມທັງແນະນຳໃຫ້ທັງ 2 ພາກສ່ວນທີ່ໄດ້ຮ່ວມເຊັນບົດບັນທຶກຈົ່ງພ້ອມກັນປະສານສົມທົບກັນລົງເກັບກຳຂໍ້ມູນສຳຫຼວດອອກແບບແຫຼ່ງທ່ອງທ່ຽວໃຫ້ທ່ວງທັນກຳເວລາທີ່ກຳນົດ ແລະລາຍງານໃຫ້ທາງເມືອງໄດ້ຮັບຊາບເພຶ່ອຈະໄດ້ສືບຕໍ່ພັດທະນາການທ່ອງທ່ຽວຢູ່ຈຸດດັ່ງກ່າວ ແລະແຫຼ່ງທ່ອງທ່ຽວແຫ່ງອື່ນໆຢູ່ພາຍໃນເມືອງບ່ອນທີ່ມີເງື່ອນໄຂໃຫ້ນັບມື້ຂະຫຍາຍຕົວຂື້ນເລື້ອຍໆ.
ພາບ-ຂ່າວ: ຄຳລຸນ ສົມວົງໄຊ

แชร์