6 ນະໂຍບາຍພິເສດ ລັດຊຸກຍູ້ໂຄງການລົດໄຟ ລາວ-ຈີນ

   ຄວາມຜັນຂອງປະຊາຊົນລາວໃກ້ເຂົ້າຫາຄວາມເປັນຈີງທຸກມື້ສຳລັບການນຳໃຊ້ທາງລົດໄຟຄວາມໄວສູງລາວ-ຈີນ ພາຍຫລັງທີ່ໃຊ້ເວລາໃນການກໍ່ສ້າງ 5 ປີ, ໂດຍໄດ້ວາງສີລາລຶກໃນວັນທີ 2 ທັນວາ 2015, ໄດ້ເລີ່ມລົງມືກໍ່ສ້າງຕົວຈິງໃນວັນທີ 25 ທັນວາ 2016 ເປັນຕົ້ນມາ,ເຖິງກາງປີ 2021 ໂຄງການແມ່ນໄດ້ສຳເລັດ 100% ແລະຈະເປີດນຳໃຊ້ຢ່າງເປັນທາງການໃນຕົ້ນເດືອນທັນວາ 2021 ເພື່ອສະເຫຼີມສະຫຼອງວັນຊາດ 2 ທັນວາ ຄົບຮອບ 46 ປີ.
   ແນວໃດກໍດີເນື່ອງຈາກວ່າໂຄງການກໍ່ສ້າງທາງລົດໄຟລາວ-ຈີນ ເປັນໂຄງການໃຫຍ່ທີ່ມີຄວາມໝາຍສຳຄັນຕໍ່ທັງສອງຊາດ, ດັ່ງນັ້ນເພື່ອເຮັດໃຫ້ໂຄງການສາມາດຈັດຕັ້ງປະຕິບັດໄດ້ຈົນປະສົບຜົນສຳເລັດ ແລະກວ່າຈະມາຮອດມື້ນີ້ກໍ່ບໍ່ແມ່ນເລື່ອງງ່າຍສອງພັກ ແລະສອງລັດກໍຄືປະຊາຊົນສອງຊາດໄດ້ມີຄວາມຕັດສິນໃຈສູງປະກອບສ່ວນເອື້ອອຳນວຍໃນດ້ານຕ່າງໆ ຈື່ງເຮັດໃຫ້ການດຳເນີນງານມີຄວາມສະດວກວ່ອງໄວໄປຕາມແຜນການທີ່ສອງປະເທດວາງເອົາໄວ້.
   ສຳລັບລັດຖະບານແຫ່ງ ສປປ ລາວ ໄດ້ກຳນົດ 6 ນະໂຍບາຍພິເສດເພື່ອສະໜັບສະໜູນໂຄງການດັ່ງກ່າວຄື: ກ່ຽວກັບສິດນຳໃຊ້ທີ່ດິນ; ຄ່າອາກອນ, ຄ່າທຳນຽມ ຊັບພະຍາກອນ, ພາສີນຳເຂົ້າ, ກ່ຽວກັບຄ່າທຳນຽມພັກເຊົາ ແລະເຮັດວຽກໂຄງການສະໜັບສະໜູນທາງລົດໄຟ.
   ສ່ວນລັດຖະບານ ສປ ຈີນ ໄດ້ມີນະໂຍບາຍຫຼັກໃນການສະໜັບສະໜູນໂຄງການນີ້ໂດຍໄດ້ສະໜັບສະໜູນໃຫ້ລັດວິສາຫະກິດທີ່ມີຄວາມສາມາດຂອງຈີນມາລົງທຶນກໍ່ສ້າງ ແລະດຳເນີນການບໍລິການທາງລົດໄຟ; ສປ ຈີນ ໄດ້ອະນຸມັດເງິນກູ້ພິເສດໃຫ້ແກ່ຝ່າຍລາວເພື່ອນຳມາເປັນເງິນຕົ້ນທຶນສໍາລັບໂຄງການຈຳນວນ 480 ລ້ານໂດຣາສະຫະລັດ ດ້ວຍດອກເບັ້ຍ 2,3% ຕໍ່ປີ.ອັດຕາດອກເບັ້ຍຂອງການລົງທຶນກໍ່ສ້າງທາງລົດໄຟໃນ ສປ ຈີນ ໃນໂຄງການທົ່ວໄປແມ່ນປະມານ 4,9% ຕໍ່ປີ,ແຕ່ລັດຖະບານຈີນ ໄດ້ສະໜອງນະໂຍບາຍກູ້ໃຫ້ແກ່ໂຄງການນີ້ໃນອັດຕາດອກເບັ້ຍບໍ່ເກີນ 3% ຕໍ່ປີ.
   ໂຄງການລວມມີມູນຄ່າການກໍ່ສ້າງທັງຫມົດ 5.950 ລ້ານໂດລາສະຫະລັດ ໂດຍຝ່າຍຈີນຖືຮຸ້ນ 70% ແລະອີກ 30% ແມ່ນລາວຖືຮຸ້ນມີຄວາມຍາວແຕ່ທັງຫມົດ 426,5 ກີໂລແມັດ ປະກອບດ້ວຍ 33 ສະຖານີສ່ວນການກຳນົດຄວາມໄວສຳລັບການຂົນສົ່ງໂດຍສານໃນເຂດພູດອຍ 160 ກີໂລແມັດຕໍ່ຊົ່ວໂມງ, ສຳລັບເຂດທົ່ງພຽງແຕ່ວັງວຽງ-ນະຄອນຫຼວງວຽງຈັນ 200 ກີໂລແມັດຕໍ່ຊົ່ວໂມງໃນອະນາຄົດ;
  ສ່ວນການຂົນສົ່ງສິນຄ້າແມ່ນໄດ້ກຳນົດຄວາມໄວ 120 ກີໂລແມັດຕໍ່ຊົ່ວໂມງ; ລະບົບການຂັບເຄື່ອນຂະບວນລົດໄຟແມ່ນນໍາໃຊ້ພະລັງໄຟຟ້າ ແລະມີຄວາມສາມາດຮອງຮັບນໍ້າໜັກການຂົນສົ່ງເຖິງ 3.000 ໂຕນ ໃນໄລຍະເລີ່ມຕົ້ນ ແລະສາມາດເພີ່ມຂຶ້ນເປັນ 4.000 ໂຕນໃນ ໄລຍະຍາວ.

แชร์