ບໍ່ແກ້ວ ຂື້ນບັນຊີລົດບໍ່ຖືກຕ້ອງເກືອບ 400 ຄັນ

  ບໍ່ແກ້ວ ເປັນອີກແຂວງທີ່ເອົາໃຈໃສ່ຈັດຕັ້ງປະຕິບັດຄໍາສັ່ງຂອງນາຍົກ ສະບັບເລກທີ 20/ນຍ, ລົງວັນທີ 8 ຕຸລາ 2021 ວ່າດ້ວຍການກວດກາ ແລະປະຕິບັດມາດຕະການຕໍ່ຜູ້ນຳເຂົ້າ ແລະນຳໃຊ້ຍານພາຫະນະທຸກປະເພດແບບບໍ່ຖືກຕ້ອງນັບແຕ່ວັນທີ 18 ຕຸລາ ຫາ ວັນທີ 19 ພະຈິກ 2021 ຂຶ້ນບັນຊີໄດ້ແລ້ວທັງໝົດ 396 ຄັນ ແກ້ແລ້ວ 36 ຄັນ, ສາມາດສ້າງລາຍຮັບມອບເຂົ້າງົບປະມານຂອງລັດ 1,2 ຕື້ກວ່າກີບ .
  ເມື່ອວັນທີ 22 ພະຈິກ ຜ່ານມານີ້ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນພ້ອມຄະນະໄດ້ລົງໄປເຄື່ອນໄຫວຊຸກຍູ້ຕິດຕາມການຈັດຕັ້ງປະຕິບັດແຜນງົບປະມານແຫ່ງລັດຕິດພັນກັບ 2 ວາລະແຫ່ງຊາດຢູ່ແຂວງບໍ່ແກ້ວໂດຍມີພາກສ່ວນກ່ຽວຂ້ອງຈາກສູນກາງ ແລະແຂວງເຂົ້າຮ່ວມ.
  ທ່ານ ສົມຫວັງ ລໍຫວັນໄຊ ຫົວໜ້າພະແນກການເງິນແຂວງບໍ່ແກ້ວໄດ້ລາຍງານສະພາບການຈັດຕັ້ງປະຕິບັດແຜນງົບປະມານ 10 ເດືອນຜ່ານມາ, ແຜນຄາດຄະເນ 2 ເດືອນທ້າຍປີ 2021 ຂອງພະແນກການເງິນໂດຍຫຍໍ້ຊຶ່ງຍົກໃຫ້ເຫັນດ້ານດີຜົນງານການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານແຫ່ງລັດ ແລະ ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນເອົາໃຈໃສ່ປະຕິບັດໃນຕໍ່ໜ້າ.
  ໃນ 10 ເດືອນຜ່ານມາການຈັດເກັບລາຍຮັບເຂົ້າງົບປະມານແຫ່ງລັດປະຕິບັດໄດ້ 262,42 ຕື້ກີບ ທຽບໃສ່ແຜນການປະຕິບັດໄດ້ 64% ຂອງແຜນການດັດແກ້ງວດ 4. ໃນນີ້, ລາຍຮັບພູດສູນກາງປະຕິບັດໄດ້ 165 ຕື້ກວ່າກີບ ທຽບໃສ່ແຜນການປະຕິບັດໄດ້ 61,30% ຂອງແຜນການປີ, ລາຍຮັບທ້ອງຖິ່ນປະຕິບັດໄດ້ 96 ຕື້ກວ່າກີບ ທຽບໃສ່ແຜນການປະຕິບັດໄດ້ 69,21% ຂອງແຜນການດັດແກ້ງວດ 4, ຮັບດຸ່ນດ່ຽງຈາກສູນກາງໃນປີ 2021 ນີ້ ແມ່ນ 143,76 ຕື້ກີບ ທຽບໃສ່ແຜນການປະຕິບັດໄດ້ 95,42% ຂອງແຜນການປີ, ຄາດຄະເນລາຍຮັບ-ລາຍຈ່າຍງົບປະມານ 2 ເດືອນທ້າຍປີໃຫ້ໄດ້ 52,38 ຕື້ກີບ. ໃນນັ້ນ, ລາຍຮັບພູດສູນກາງໃຫ້ໄດ້ 32,016 ຕື້ກີບ, ລາຍຮັບຂອງແຂວງໃຫ້ໄດ້ 20,37 ຕື້ກີບ ໃນນີ້, ລາຍຮັບສ່ວຍສາອາກອນ 19 ຕື້ກວ່າກີບ, ລາຍຮັບຄຸ້ມຄອງຊັບສິນຂອງລັດ 814 ລ້ານກີບ.
   ສໍາລັບການຈັດຕັ້ງປະຕິບັດຄໍາສັ່ງຂອງນາຍົກ ສະບັບເລກທີ 20/ນຍ, ລົງວັນທີ 08/10/2021 ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ນຳເຂົ້າ ແລະນຳໃຊ້ຍານພາຫະນະທຸກປະເພດແບບບໍ່ຖືກຕ້ອງ ແລະ ການຈັດຕັ້ງປະຕິບັດຄໍາແນະນໍາຂອງກະຊວງການເງິນເວົ້າສະເພາະຢູ່ແຂວງບໍ່ແກ້ວກະຊວງໄດ້ອອກ ແຈ້ງການເຖິງບຸກຄົນ, ນິຕິບຸກຄົນ ແລະການຈັດຕັ້ງໃນທົ່ວແຂວງບໍ່ແກ້ວໃຫ້ຍານພາຫະນະນຳເຂົ້າບໍ່ຖືກຕ້ອງມາຂຶ້ນບັນຊີຢູ່ພາສີປະຈຳແຂວງ, ຜ່ານການຈັດຕັ້ງປະຕິບັດນັບແຕ່ວັນທີ 18 ຕຸລາ 2021 ຫາ ວັນທີ 19 ພະຈິກ 2021 ຂຶ້ນບັນຊີໄດ້ທັງໝົດ 396 ຄັນ.
  ໃນນັ້ນ, ລົດຈັກ 37 ຄັນ, ລົດເກັງ 23 ຄັນ, ລົດກະບະ 298 ຄັນ,ລົດຈິບ 36 ຄັນ ແລະລົດຕູ້ 2 ຄັນ,ປັດຈຸບັນໄດ້ແກ້ໄຂເລີ່ມແຕ່ວັນທີ 15 ຫາວັນທີ 19 ພະຈິກ 2021 ຈຳນວນ 36 ຄັນ, ສາມາດສ້າງລາຍຮັບມອບເຂົ້າງົບປະມານຂອງລັດຈຳນວນ 1,2 ຕື້ກວ່າກີບ, ປັດຈຸບັນແຂວງບໍ່ແກ້ວໄດ້ແຕ່ງຕັ້ງຄະນະຮັບຜິດຊອບດຳເນີນການແກ້ໄຂລົດນໍາເຂົ້າບໍ່ຖືກຕ້ອງໂດຍມີພາກສ່ວນທີ່ກ່ຽວຂ້ອງຂອງແຂວງເຂົ້າຮ່ວມໃນການແກ້ໄຂລົດຈຳນວນດັ່ງກ່າວ.
   ໂອກາດນີ້, ທ່ານຮອງລັດຖະມົນຕີກະຊວງການເງິນໄດ້ມີຄໍາເຫັນຮຽກຮ້ອງໃຫ້ແຕ່ລະຂະແໜງການຈົ່ງສືບຕໍ່ປະຕິບັດການຈັດເກັບລາຍຮັບຕາມໂຕເລກຂອງຫົວໜ່ວຍທຸລະກິດໃຫ້ບັນລຸຕາມຄາດໝາຍ, ເອົາໃຈໃສ່ເຂັ້ມງວດເດັດຂາດຢູ່ບັນດາດ່ານ, ຕິດຕາມການເດີນເຮືອເຂົ້າ-ອອກຕາມລໍາແມ່ນໍ້າຂອງ ແລະພາຫະນະຂົນສົ່ງສິນຄ້າຫຼັງແຈ້ງໃຫ້ຄົບຖ້ວນ, ແກ້ໄຂບັນຫາພາຫະນະທຸກປະເພດທີ່ນຳເຂົ້າບໍ່ຖືກຕ້ອງໃຫ້ເຂົ້າສູ່ລະບຽບການ, ເອົາໃຈໃສ່ບໍລິການໃຫ້ມີຄວາມວ່ອງໄວສອດຄ່ອງຕາມລະບຽບການໃນການຈັດເກັບລາຍຮັບເຂົ້າງົບປະມານແຫ່ງລັດໃຫ້ຄົບຖ້ວນຕາມແຜນ, ສຸມໃສ່ບັນດາໜ້າວຽກທີ່ຍັງຄົງຄ້າງສືບຕໍ່ແກ້ໄຂປະກົດການຫຍໍ້ທໍ້ທາງດ້ານເສດຖະກິດການເງິນໂດຍສະເພາະແມ່ນອັດຕາເງິນເຟີ້ທີ່ເປັນບັນຫາສຳຄັນທີ່ຕ້ອງແກ້ໄຂຢ່າງຮີບດ່ວນເພາະອັດຕາເງິນເຟີ້ນີ້ກະທົບທາງກົງ ແລະ ທາງອ້ອມຂອງການດຳລົງຊີວິດຂອງປະຊາຊົນ.
ຂ່າວ-ພາບ: ກະຊວງການເງິນ

แชร์