ຫຼວງພະບາງ ເລັ່ງປັບປຸງສະຖານທີ່ຮອງຮັບນັກທ່ອງທ່ຽວ

ຂ່າວ: ສີສຸວັນ 

ແຂວງຫຼວງພະບາງຖືເປັນແຂວງສໍາຄັນອັນດັບໜຶ່ງເຊິ່ງເປັນເມືອງມໍລະດົກໂລກ, ມີສະຖານທີ່ທ່ອງທ່ຽວສຳຄັນທາງດ້ານວັດທະນະທຳ, ປະຫວັດສາດ, ທໍາມະຊາດຫລາຍແຫ່ງທີ່ສວາຍງາມຈິ່ງໄດ້ກາຍເປັນເປົ້າໝາຍສາຍຕາຂອງນັກທ່ອງທ່ຽວຢາກມາຢ້ຽມຢາມທ່ຽວຊົມ,ຂະນະທີ່ທາງແຂວງຫຼວງພະບາງໂດຍສະເພາະແມ່ນພະແນກ ຖວທ ແຂວງໄດ້ເລັ່ງປັບປຸງ, ອະນາໄມສະຖານທີ່ທ່ອງທ່ຽວສໍາຄັນເພື່ອຮອງຮັບການທ່ອງທ່ຽວເມື່ອເປີດປະເທດໃນມໍ່ໆນີ້. 

ທ່ານ ສີສະຫວາດ ຍີ່ລັດໃຈ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງຫຼວງພະບາງ ໄດ້ໃຫ້ສໍາພາດຕໍ່ທິມຂ່າວພວກເຮົາວ່າງບໍ່ດົນນີ້ຮູ້ວ່າ: ປະຈຸບັນທາງພະແນກ ຖວທ ແຂວງແມ່ນໄດ້ກະກຽມ, ປັບປຸງບັນດາສະຖານທີ່ທ່ອງທ່ຽວສໍາຄັນແຫ່ງຕ່າງໆ ເປັນຕົ້ນແມ່ນອຸທິຍານທ່ອງທ່ຽວນໍ້າຕົກຕາດກວາງຊີ, ພະລາຊະວັງ, ທາງຂຶ້ນພະທາດຈອມສີ (ທາດພູສີ) ລວມເຖິງແຫ່ງອື່ນໆອີກໃຫ້ມີຄວາມຈົບງາມຄືຫຼາຍປີຜ່ານມາທັງນີ້ກໍເພື່ອເປັນການກະກຽມຄວາມພ້ອມບັນດານັກທ່ອງທ່ຽວຈາກທັງພາຍໃນ ແລະຕ່າງປະເທດທີ່ຈະເດີນທາງມາທ່ອງທ່ຽວແຂວງຫຼວງພະບາງພາຍຫຼັງທີ່ລັດຖະບານລາວຈະໄດ້ເປີດປະເທດໃນມໍ່ໆນີ້.

ສຳລັບແນວທາງການຟື້ນຟູການທ່ອງທ່ຽວເບື້ອງຕົ້ນຂອງແຂວງຫຼວງພະບາງຈາກການແຜ່ລະບາດຂອງພະຍາດໂຄວິດ-19 ນັບປີ 2021-2025 ແມ່ນຕ້ອງໄດ້ຊຸກຍູ້ສົ່ງເສີມ ແລະສະໜັບສະໜູນໃຫ້ຜູ້ປະກອບການທ່ອງທ່ຽວໃຫ້ມີການກຽມຄວາມພ້ອມໃນການຟື້ນຟູ ແລະຮອງຮັບນັກທ່ອງທ່ຽວໃນຮູບແບບການທ່ອງທ່ຽວແບບໃໝ່ (New Normal) ໂດຍສະເພາະແມ່ນເລັ່ງໃສ່ການທ່ອງທ່ຽວພາຍໃນ (ລາວທ່ຽວລາວ), ການທ່ອງທ່ຽວໃນຮູບ (Travel Bubble) ແລະເພື່ອສ້າງຄວາມເຂັ້ມແຂງໃຫ້ແກ່ຂະແໜງການທ່ອງທ່ຽວສາມາດດຶງດູດນັກທ່ອງທ່ຽວເຂົ້າມາທ່ຽວຊົມຫຼວງພະບາງໃຫ້ຫຼາຍຂຶ້ນ.

ສະນັ້ນການກະກຽມຄວາມພ້ອມຮອງຮັບການທ່ອງທ່ຽວຂອງແຂວງຫຼວງພະບາງໂດຍສະເພາະແມ່ນເທດສະບານນະຄອນຫຼວງພະບາງແມ່ນໄດ້ມີການທໍາຄວາມສະອາດບູລະນະຕາມເສັ້ນທາງສາຍຕ່າງໆໃຫ້ມີຄວາມສະອາດງາມຕາເນື່ອງຈາກວ່າການລະບາດຂອງພະຍາດໂຄວິດ-19 ຢູ່ໃນປະເທດເຮົາກໍ່ຄືຢູ່ແຂວງຫຼວງພະບາງ ເປັນຈຳນວນຫຼວງຫຼາຍແກ່ຍາວຫຼາຍເດືອນ, ເຮັດໃຫ້ສະຖານທີ່ທ່ອງທ່ຽວຫລາຍແຫ່ງຖືກປິດບໍລິການ ແລະໄດ້ເຮັດໃຫ້ສະຖານທີ່ທ່ອງທ່ຽວແຕ່ລະແຫ່ງຊຸດໂຊມ, ເສົ້າໝອງຈິ່ງໄດ້ມີການປັບປຸງອະນາໄມ ແລະທາສີຄືນໃໝ່ເພື່ອຮອງຮັບການທ່ອງທ່ຽວໃນໄລຍະໃໝ່ຍຸດໂຄວິດ-19.

แชร์