ຫາລືຈັດສົ່ງ ແລະຊອກວຽກໃຫ້ແຮງງານລາວ

ຂ່າວ: ຂ່າວສານ ຮສສ

ກອງປະຊຸມຮ່ວມກັບສູນບໍລິການຈັດຫາງານ ແລະບໍລິສັດຈັດຫາງານ, ຄັ້ງວັນທີ 19 ພະຈິກ 2021, ໂດຍການເປັນປະທານຂອງທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ), ມີບັນດາຫົວໜ້າກົມ, ຮອງກົມ ແລະບັນດາບໍລິສັດຈັດຫາງານເຂົ້າຮ່ວມ.

ກອງປະຊຸມດັ່ງກ່າວ, ໄດ້ພ້ອມກັນປຶກສາຫາລືກ່ຽວກັບການສະໜອງຜູ້ອອກແຮງງານທີ່ກັບຄືນຈາກຕ່າງປະເທດເຂົ້າໃສ່ຕຳແໜ່ງງານວ່າງ; ການຕິດຕາມ ແລະເກັບກຳຈຳນວນຜູ້ອອກແຮງງານທີ່ກັບຄືນປະເທດ ແລະຍັງຄ້າງຢູ່ຕ່າງປະເທດ; ສິ່ງທ້າທາຍ ແລະການກະກຽມຄວາມພ້ອມຈັດສົ່ງແຮງງານໄປໄທໃນໄລຍະໃໝ່ ແລະການກະກຽມຄວາມພ້ອມຮັບມືໃນການຈັດສົ່ງໄປໄທ, ທີ່ລັດຖະບານໄທເປີດປະເທດນັບແຕ່ວັນທີ 1 ພະຈິກ 2021 ເປັນຕົ້ນມາ ແລະປະກາດກະກຽມອະນຸຍາດນຳເຂົ້າແຮງງານຈາກ 3 ສັນຊາດ ເລີ່ມເດືອນທັນວາ 2021 ເປັນຕົ້ນໄປໃນຈໍານວນ 4 ແສນຄົນ ຈັດປະຊຸມກັບຂະແໜງການທີ່ກ່ຽວຂ້ອງເພື່ອອຳນວຍຄວາມສະດວກໃຫ້ແກ່ການຈັດສົ່ງຄື: ກະຊວງການຕ່າງປະເທດ, ກະຊວງປກສ, ປກຊ ແລະກະຊວງສາທາ.

ປະຈຸບັນມີບໍລິສັດຈັດຫາງານທີ່ໄດ້ເຄື່ອນໄຫວ ແລະຈັດສົ່ງແຮງງານລາວໄປເຮັດວຽກຢູ່ປະເທດໄທທັງໝົດ 27 ບໍລິສັດ ແລະໃນປີ 2019-2020 ສູນບໍລິການຈັດຫາງານ ແລະບໍລິສັດຈັດຫາງານໄດ້ຈັດສົ່ງຜູ້ອອກແຮງງານລາວໄປເຮັດວຽກຢູ່ປະເທດໄທຕາມ MOU ມີ 84.267 ຄົນ, ກັບຄືນປະເທດແລ້ວ 77.255 ຄົນ, ຍັງຄ້າງຢູ່ໄທ 7.012 ຄົນ.

ພ້ອມນີ້ກອງປະຊຸມຍັງໄດ້ປະເມີນການເຄື່ອນໄຫວຈັດຕັ້ງປະຕີບັດຂອງບາງບັນດາບໍລິສັດຈັດຫາງານທີ່ບໍ່ມີການເຄື່ອນໄຫວຄືນໃໝ່, ບໍລິສັດທີ່ບໍ່ມີຄວາມພຽບພ້ອມທາງດ້ານບຸກຄະລາກອນ, ສະຖານທີ່, ກົນໄກການພົວພັນປະສານງານ, ຕິດຕາມ ແລະການຊວຍເຫຼືອແຮງງານ ແລະບັນຫາອື່ນໆ.

ປະຈຸບັນແມ່ນໄດ້ອະນຸຍາດໃຫ້ພາກເອກະຊົນໄດ້ມີສ່ວນຮ່ວມໃນການຈັດຫາງານພາຍໃນປະເທດ; ບໍລິສັດຈັດຫາງານທີ່ຍັງບໍ່ທັນຕໍ່ໃບອະນຸຍາດສ້າງຕັ້ງ ແລະເຄື່ອນໄຫວການຈັດຫາງານຕ້ອງດຳເນີນການສະເໜີຂໍຕໍ່ໃບອະນຸຍາດຈຶ່ງສາມາດຈັດຕັ້ງເຄື່ອນໄຫວໄດ້; ການຈັດສົ່ງແຮງງານໄປຕ່າງປະເທດຕ້ອງໄດ້ຈັດຕັ້ງປະຕິບັດຄຽງຄູ່ກັບການຈັດຫາງານພາຍໃນຄື: ໂກຕາຈັດສົ່ງໄປຕ່າງປະເທດບົນພື້ນຖານຄວາມສາມາດຈັດຫາງານພາຍໃນປະເທດ; ໃຫ້ບັນດາບໍລິສັດສ້າງຄວາມພ້ອມໃນການຕິດຕາມ, ຊ່ວຍເຫຼືອຜູ້ອອກແຮງງານທີ່ຖືກຈັດສົ່ງລວມທັງການເກັບກຳຂໍ້ມູນຂອງຜູ້ອອກແຮງງານທີ່ຖືກຈັດສົ່ງ, ສິ້ນສຸດສັນຍາ, ກັບຄືນປະເທດ ແລະຍັງຄ້າງຢູ່ຕ່າງປະເທດລວມທັງການສະໜອງເຂົ້າໃສ່ຕຳແໜ່ງງານພາຍໃນປະເທດສຳລັບຜູ້ທີ່ຈະກັບຄືນຕາມທີ່ໄດ້ກຳນົດໄວ້ໃນດຳລັດ 245, ມາດຕາທີ 15 ວ່າ ດ້ວຍພັນທະຂອງອົງການຈັດສົ່ງ; ປັບປຸງບົດບັນທຶກຄວາມເຂົ້າໃຈວ່າດ້ວຍການຈ້າງແຮງງານລາວ-ໄທ; ສ້າງຕັ້ງສະມາຄົມບໍລິສັດຈັດຫາງານໃຫ້ສຳເລັດ; ຮັບຮອງຂໍ້ຕົກລົງວ່າດ້ວຍການສ້າງຕັ້ງ ແລະຄຸ້ມຄອງວິສາຫະກິດຈັດ ຫາງານສະບັບປັບປຸງ; ພ້ອມນີ້ບັນດາຜູ້ເຂົ້າຮວ່ມກອງປະຊຸມຍັງໄດ້ປຶກສາຫາລືຄວາມເປັນເອກະພາບຕໍ່ກັບອັດຕາການເກັບຄ່າບໍລິການຈັດສົ່ງໄປປະເທດໄທນຳອີກ.

แชร์