ນັກສຶກສາສອງສະຖາບັນຮ່ວມທົດລອງວິຊາວິທະຍາສາດ ແລະຄອມພີວເຕີຜ່ານອອນລາຍ

ຂ່າວ: ສີສຸວັນ

ນັກສຶກສາປີ 3-ປີ 4 ຂອງວິທະຍາໄລຄູ ແຂວງຫຼວງພະບາງ 40 ຄົນ ສາຍວິທະຍາສາດທໍາມະຊາດ ແລະຄອມພິວເຕີໄດ້ເຂົ້າຮ່ວມທັດລອງປະຕິບັດຕົວຈິງກັບມະຫາວິທະຍາໄລແຫ່ງຊາດ ຊິ໋ນ ຈູ ສ.ເກົາຫຼີ ຜ່ານລະບົບອອນລາຍຊຶ່ງຈັດຂຶ້ນໃນວັນທີ 22-26 ພະຈິກ 2021 ນີ້ທີ່ຫ້ອງປະຊຸມວິທະຍາໄລຄູຫຼວງພະບາງໂດຍການເຂົ້າຮ່ວມຂອງທ່ານ ຫຸມພັນ ຄອນສະຫວັດ ຜູ້ອຳການວິທະຍາໄລຄູຫຼວງພະບາງ, ທ່ານ ປອ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະກີລາແຂວງ, ທ່ານ ສຈ ຮາຢ໋ອງຊູ ຜູ້ຈັດການໂຄງການໆຮ່ວມມືຝ່າຍມະຫາວິທະຍາໄລແຫ່ງຊາດ ຊີ໋ນຈູ ສ.ເກົາຫຼີ, ມີຮັກສາການຫົວໜ້າພະແນກສ້າງຄູ, ກົມສ້າງຄູກະຊວງສຶກສາພ້ອມດ້ວຍນັກ ວິຊາການຂະແໜງການທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ທ່ານ ຫຸມພັນ ຄອນສະຫວັດ ຜູ້ອຳການວິທະຍາໄລຄູຫຼວງພະບາງກ່າວວ່າ: ສໍາລັບກອງປະຊຸມຝຶກອົບຮົມທົດລອງຕົວຈິງຂອງສອງສະຖາບັນການສຶກສາລາວ-ເກົາຫຼີ ໃນຄັ້ງນີ້ 1) ແມ່ນເພື່ອສືບຕໍ່ຈັດຕັ້ງ ແລະຜັນຂະຫຍາຍເນື້ອໃນຂໍ້ຕົກລົງການຮ່ວມມືດ້ານວິຊາການຮ່ວມກັນລະຫວ່າງວິທະຍາໄລຄູຫຼວງພະບາງ (LPTTC) ກັບມະຫາວິທະຍາໄລແຫ່ງຊາດຊິນຈູ (CUE) ພາຍໃຕ້ການສະໜັບສະໜູນທຶນຈາກການສຶກໂລກ ປີ 2021 (2021 GESP) ໃຫ້ໄດ້ປະຕິບັດຕາມແຜນ ແລະຮັບປະກັນຄຸນະພາບ. 2) ເພື່ອສ້າງໂອກາດໃຫ້ຄູ-ອາຈານ ແລະ ນັກສຶກສາໃນ 2 ຂະແໜງຄືສາຍວິທະຍາສາດ ( ວິຊາຟີຊິກສາດ, ຊີວະສາດ, ເຄມີສາດ ແລະວິທະຍາສາດ) ແລະຄອມພິວເຕີການສຶກສາໄດ້ຮັບຮູ້ ແລະເຂົ້າໃຈຕໍ່ແນວທາງ ແລະນະໂຍບາຍຕໍ່ການພັດທະນາວິຊາຊີບຄູໃນປະຈຸບັນ ແລະອານາຄົດໂດຍສະເພາະແມ່ນການສ້າງຄວາມເຂັ້ມແຂງດ້ານວຽກງານການສ້າງຄູພາຍໃນວິທະຍາໄລຄູຫຼວງພະບາງ. 3) ເພື່ອຝຶກອົບຮົມຄວາມຮູ້ ແລະການປະຕິບັດຕົວຈິງ, ການທົດລອງວິຊາວິທະຍາສາດ ແລະວິຊາຄອມພີວເຕີການສຶກສາເພື່ອສ້າງຄວາມເຂັ້ມແຂງໃຫ້ແກ່ຄູ ແລະນັກສຶກສາພາຍໃນວິທະຍາໄລຄູເທື່ອລະກ້າວ.

ທັງນີ້ເພື່ອຕອບສະໜອງຕາມຈຸດປະສົງຂອງກອງປະຊຸມທາງທືມງານການຮ່ວມມືຈຶ່ງໄດ້ເຊື້ອເຊີນເອົາບັນດາທ່ານການນຳຂອງກົມສ້າງຄູກະຊວງສຶກສາທິການ ແລະກີລາ, ການນຳຂັ້ນພະແນກສຶກສາທິການ ແລະກີລາແຂວງມີຄໍາເຫັນບັນຍາຍໃນຫົວຂໍ້ການກຽມຄວາມພ້ອມຂອງການເປັນຄູສອນໃນອະນາຄົດ,ຕົວແທນຈາກສະຖານທູດເກົາຫຼີ, ສ.ເກົາຫຼີ, ການປະກັນຄຸນນະພາບສໍາລັບສາຍສ້າງຄູ, ທິດທາງໃນການຈັດຕັ້ງປະຕິບັດຫຼັກສູດສ້າງຄູໃນໄລຍະທີ່ມີການລະບາດຂອງເຊື້ອພະຍາດໂຄວິດ-19, ການຈັດການຮຽນ-ການສອນໃນ ສັດຕະວັດທີ 21 ແລະຮັບຟັງການບັນຍາຍຈາກຕົວແທນຈາກມະຫາວິທະຍາໄລແຫ່ງຊາດຊິນຈູ໋ ສ.ເກົາຫຼີ ຕື່ມອີກ.

แชร์