ທຫລ ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 3 ຂອງສູນກາງພັກ

ຂ່າວ: ສົມອົກ ເຄນຄໍາແພງ

    ເຊົ້າວັນທີ 19 ພະຈິກ 2021 ອົງຄະນະພັກທະນາຄານແຫ່ງ ສປປ ລາວ ໄດ້ຈັດຕັ້ງເຜີຍແຜ່-ເຊື່ອມຊຶມມະຕິກອງປະຊຸມຄົບຄະນະຄັ້ງທີ 3 ຂອງຄະນະບໍລິຫານງານສູນກາງພັກສະໄໝທີ XI ຂຶ້ນທີ່ຫ້ອງປະຊຸມໃຫຍ່ ທຫລ ໃນຮູບແບບລະບົບອອນລາຍໂດຍພາຍໃຕ້ການເປັນປະທານຂອງສະຫາຍ ສອນໄຊ ຊິດພະໄຊ ກໍາມະການສູນກາງພັກ, ເລຂາຄະນະພັກ, ຜູ້ວ່າການ ທຫລ ພ້ອມນີ້, ກໍ່ມີກໍາມະການປະຈໍາພັກ, ກໍາມະການພັກ, ເລຂາໜ່ວຍພັກ ແລະການນໍາຫຼັກແຫຼ່ງພາຍໃນອົງຄະນະພັກເຂົ້າຮ່ວມ.

ໃນທີ່ປະຊຸມຜູ້ເຂົ້າຮ່ວມໄດ້ຮັບຟັງການເຜີຍແຜ່ມະຕິກອງປະຊຸມຄົບຄະນະຄັ້ງທີ 3 ຂອງຄະນະບໍລິຫານງານສູນກາງພັກສະໄໝທີ XI, ມະຕິເລກທີ 4 ຂອງຄະນະບໍລິຫານງານສູນກາງພັກວ່າດ້ວຍການເພີ່ມທະວີການນໍາພາຂອງພັກເພື່ອສ້າງການຫັນປຽນຢ່າງແຂງແຮງ ແລະເລິກເຊິ່ງວຽກງານພະນັກງານ ແລະດໍາລັດ ເລກທີ 559 ຂອງລັດຖະບານວ່າດ້ວຍລົດຂອງລັດເພື່ອເປັນພື້ນຖານໃຫ້ແກ່ຄະນະນໍາແຕ່ລະຂັ້ນພາຍໃນ ທຫລ ສາມາດກໍາໄດ້ບັນດາມະຕິຄໍາສັ່ງຂອງພັກໃນການຊີ້ນໍາໆ ພາໃນຂົງເຂດວຽກງານຂອງຕົນໃຫ້ສອດຄ່ອງກັບແນວທາງຂອງພັກວາງອອກແຕ່ລະໄລຍະ. 

ໃນກອງປະຊຸມເຊື່ອມຊືມດັ່ງກ່າວສະຫາຍເລຂາຄະນະພັກ ທຫລ ໄດ້ເນັ້ນຕື່ມວ່າ:1). ຄະນະພັກທຸກຂັ້ນຕ້ອງສືບຕໍ່ເປັນເຈົ້າການຄົ້ນຄວ້າກໍາແໜ້ນ ແລະເປັນເອກະພາບສູງຕໍ່ກັບບັນດາເນື້ອໃນຂອງເອກະສານສໍາຄັນທັງ 3 ສະບັບ ກໍ່ຄືເນື້ອໃນຈິດໃຈຂອງກອງປະຊຸມໃນຄັ້ງນີ້ບົນພື້ນຖານຄວາມຮັບຮູ້ຢ່າງເລິກເຊິ່ງເພື່ອພ້ອມກັນເປັນເຈົ້າການນໍາພາຜັນຂະຫຍາຍໃຫ້ກາຍເປັນແຜນງານ-ໂຄງການ ຂອງຂະແໜງທະນາຄານກໍ່ຄືຂອງແຕ່ລະຮາກຖານພັກ-ກົມກອງໃຜລາວຢ່າງລະອຽດ, ຈະແຈ້ງ ແລະສູ້ຊົນນໍາພາຈັດຕັ້ງປະຕິບັດໃຫ້ປາກົດຜົນເປັນຈິງໃນແຕ່ລະດ້ານ; 2). ສືບຕໍ່ເປັນເຈົ້າການຊີ້ນໍານໍາພາຈັດຕັ້ງເຜີຍແຜ່-ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກໃຫ້ສໍາເລັດໝົດທຸກຮາກຖານພັກ-ກົມກອງທັງໃຫ້ເລິກເຊິ່ງ ແລະເຂົ້າສູ່ລວງເລິກຕິດພັນກັບການຈັດຕັ້ງປະຕິບັດສອງວາລະແຫ່ງຊາດໂດຍສະເພາະວາລະແຫ່ງຊາດກ່ຽວ ກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.

3). ເພີ່ມທະວີການຊີ້ນໍາ-ນໍາພາວຽກງານວິຊາສະເພາະໃຫ້ແຂງແຮງກວ່າເກົ່າ, ຊຶ່ງໜ້າທີ່ຕົ້ນຕໍແມ່ນການຮັກສາສະຖຽນລະພາບທາງດ້ານເງິນຕາແຫ່ງຊາດໃຫ້ມີຄວາມໝັ້ນທ່ຽງ ແລະພັດທະນາລະບົບສະຖາບັນການເງິນໃຫ້ເຂັ້ມແຂງ ແລະໝັ້ນຄົງ.

4). ຕ້ອງສືບຕໍ່ເພີ່ມທະວີການປະສານສົມທົບກັບບັນດາຂະແໜງການທີ່ກ່ຽວຂ້ອງເພື່ອຈັດຕັ້ງປະຕິບັດນະໂຍບາຍເງິນຕາໃຫ້ມີຄວາມກົມກຽວເພື່ອສ້າງພື້ນຖານໃຫ້ແກ່ລະບົບເສດຖະກິດແຫ່ງຊາດໃຫ້ມີຄວາມໜັກແໜ້ນ ແລະ ຍືນຍົງເປັນຕົ້ນ: ການເພີ່ມຂຶ້ນຂອງອັດຕາເງິນເຟີ້; ການຄຸ້ມຄອງອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດຮັບປະກັນສ່ອງແສງສະພາບຄວາມເປັນຈິງດ້ານຄວາມຕ້ອງການ ແລະການສະໜອງເງິນຕາຕ່າງປະເທດໃນສັງຄົມຢ່າງພາວະວິໄສເພື່ອຫຼຸດຜ່ອນຕົ້ນທຶນໃນການຜະລິດ, ຊຸກຍູ້ການເກັບລາຍຮັບງົບປະມານຂອງລັດ ແລະເສີມສະພາບຄ່ອງເງິນຕາຕ່າງປະເທດຂອງລະບົບທະນາຄານ.

5). ເອົາໃຈໃສ່ປັບປຸງກົງຈັກການຈັດຕັ້ງທຸກຂັ້ນໄປຕາມທິດກະທັດຮັດ ແລະມີປະສິດທິພາບ; ເພີ່ມທະວີວຽກງານບໍາລຸງສ້າງພະນັກງານໃນຕຳແໜ່ງງານຕ່າງໆ ໃຫ້ສອດຄ່ອງກັບການເລັ່ງທວງຂອງວຽກງານໃນໄລຍະໃໝ່; ເອົາໃຈໃສ່ຄຸ້ມຄອງນໍາໃຊ້ພະນັກງານຜູ້ທີ່ມີຄຸນທາດການເມືອງໜັກແໜ້ນ, ມີຄວາມຕັ້ງຕໍ່ບໍລິສຸດຕໍ່ພັກ-ລັດ ແລະປະຊາຊົນ, ມີຄວາມຮູ້-ຄວາມສາມາດທີ່ໄດ້ຜ່ານການທົດສອບຈາກຂະບວນການວຽກງານຕົວຈິງ, ມີຫົວຄິດປະດິດສ້າງໃໝ່ທີ່ເປັນປະໂຫຍດໃຫ້ແກ່ວຽກງານສ່ວນລວມ ແລະມີຜົນງານ-ຜົນສໍາເລັດໃນການປະຕິບັດໜ້າທີ່ທີ່ໄດ້ຮັບມອບໝາຍໃຫ້, ມີນໍ້າໃຈເສຍສະຫຼະສູງ, ຕັ້ງໜ້າຮັບໃຊ້ປະເທດຊາດ ແລະປະຊາຊົນ. 

6). ຄະນະພັກ-ຄະນະນໍາທຸກຂັ້ນຕ້ອງມີຄວາມຮັບຮູ້-ເຂົ້າໃຈຕໍ່ທິດທາງລວມຂອງພັກ ແລະລັດຖະບານກ່ຽວກັບລະບຽບການປະກອບ, ການຄຸ້ມຄອງນໍາໃຊ້, ການປົກປັກຮັກສາ ແລະການສະສາງລົດຂອງລັດບົນພື້ນຖານຄວາມເປັນເອກະພາບສູງໃນການຈະເຂົ້າສູ່ການຈັດຕັ້ງປະຕິບັດຢູ່ໃນຂະແໜງທະນາຄານຂອງພວກເຮົາ.

แชร์