ສະຫາຍ ທອງລຸນ ສີສຸລິດ ໂອ້ລົມກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ປິດລົງດ້ວຍຜົນສຳເລັດຢ່າງຈົບງານໃນວັນທີ 19 ພະຈິກນີ້ທີ່ຫໍປະຊຸມແຫ່ງຊາດ, ພາຍໃຕ້ການເປັນທານຂອງສະຫາຍນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ໃຫ້ກຽດເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດແຫ່ງ ສປປ ລາວ, ມີບັນດາສະຫາຍຜູ້ແທນແມ່ຍິງທຸກຂັ້ນ ແລະແຂກຖືກເຊີນເຂົ້າຮ່ວມ.

ໃນກອງປະຊຸມດັ່ງກ່າວໄດ້ມີການປ່ອນບັດຄັດເລືອກເອົາຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VIII  ຊຶ່ງມີຜູ້ລົງສະໝັກ 68 ສະຫາຍ ເລືອກເອົາ 63 ສະຫາຍ ກອງປະຊຸມຄັ້ງປະຖົມມະລືກຂອງຄະນະບໍລິຫານງານແມ່ຍິງລາວສະໄໝທີ VIII  ໄດ້ເປັນເອກະສັນກັນເລືອກເອົາ ສະຫາຍ ນາງ ອິນລາວັນ ແກ້ວບຸນພັນ ເປັນປະທານຄະນະບໍລິຫານງານສູນກາງສະຫະພັນແມ່​ຍິງລາວ, ສະຫາຍນາງ ສິລິກິດ ບຸບຜາ, ສະຫາຍ ນາງ ລາວັນ ສຸດທິສານ, ສະຫາຍ ນາງ ທຳມາ ເພັດວິໄຊ ແລະສະຫາຍ ນາງ ຈັນໂສ ດາພອນທິບ ເປັນຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ເລືອກເອົາສະຫາຍ ນາງ ລາວັນ ສຸດທິສານ ເປັນປະທານກວດກາສະຫະພັນແມ່ຍິງລາວ.

ໃນໂອກາດນີ້, ສະຫາຍ ທອງລຸນ ສີສຸລິດ ກໍ່ໄດ້ໃຫ້ກຽດໂອ້ລົມເພື່ອເປັນເຂັ້ມທິດເຍື່ອງທາງແກ່ຄະນະບໍລິຫານງານແມ່ຍິງລາວສະໄໝທີ VIII ວ່າ: 1. ໃຫ້ຄະນະສະ ຫະພັນແມ່ນຍິງແຕ່ລະຂັ້ນຈົ່ງໄດ້ຄົ້ນຄວ້າຕື່ມໃນການປະຕິບັດໜ້າທີ່ຕາມພາລະບົດບາດຂອງຕົນທີ່ກໍານົດໄວ້ໃນກົດໝາຍ, ກົດລະບຽບຂອງສະຫະພັນແມ່ຍິງລາວ; ຕັ້ງໜ້າສ້າງເງື່ອນໄຂ ແລະໂອກາດໃຫ້ສະຫະພັນແມ່ຍິງລາວໄດ້ຮັບການພັດທະນາໃນຖານະເປັນອົງການຕົວແທນໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະເດັກນ້ອຍ, ເພື່ອໃຫ້ພວກສະຫາຍຈະໄດ້ເພີ່ມທະວີການປຸກລະດົມແມ່ຍິງລາວບັນດາເຜົ່າປະຕິບັດໜ້າທີ່ປົກປັກຮັກສາ ແລະ ສ້າງສາປະເທດຊາດ, ສ້າງບາດກ້າວບຸກທະລຸຫັນເອົາມະຕິກອງປະຊຸມໃຫຍ່ ຄັ້ງທີ XI  ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ມະຕິກອງປະຊຸມໃຫຍ່ແມ່ຍິງລາວ ຄັ້ງທີ VIII, ແຜນພັດທະນາແຫ່ງຊາດແມ່ຍິງລາວ ຄັ້ງທີ VIII, ສ້າງແຜນດໍາເນີນງານແຫ່ງຊາດເຊື່ອມເຂົ້າແຜນພັດທະນາຂອງຂະແໜງການ ແລະແຜນພັດທະນາເສດຖະກິດ-ສັງຄົມຂອງທ້ອງຖິ່ນແຕ່ໄລຍະປີ 2021-2025 ໃຫ້ເປັນອັນລະອຽດ ແລະ ໄດ້ຮັບການຈັດຕັ້ງປະຕິບັດຢ່າງມໝາກມີຜົນ, 2. ສືບຕໍ່ນໍາພາສຶກສາອົບຮົມການເມືອງ-ແນວຄິດໃນຖັນແຖວສະມາຊິກສະຫະພັນແມ່ຍິງລາວໃຫ້ໜັກແໜ້ນ,ມີຄຸນສົມບັດສິນທຳປະຕິວັດ,ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ຮູ້ຮັກສາກຽດສັກສີຂອງແມ່ຍິງລາວ, ຮູ້ປົກປັກຮັກສາ ແລະເສີມຂະຫຍາຍມູນເຊື້ອວັດທະນະທຳອັນດີງາມຂອງ ຊາດ ແລະຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ບຸກທະລຸພັດທະນາແມ່ຍິງລາວ, ສ້າງຄ່ານິຍົມທີ່ຖືກຕ້ອງ, ກ້າວໜ້າມີວິທະຍາສາດ,ກ້າຄິດ, ກ້າເຮັດ,ກ້າຮັບຜິດຊອບຖືເອົາຜົນສໍາເລັດເປັນໄມ້ຫຼາວັດແທກຄຸນສົມບັດ, ຄວາມສາມາດ ແລະຄວາມກ້າວໜ້າຂອງຕົນ, ເສີມຂະຫຍາຍຜົນງານ ແລະທ່າແຮງບົ່ມຊ້ອນຂອງການນຳເພດຍິງຮຸ່ນກ່ອນໆ, ແມ່ຍິງລາວບັນດາເຜົ່າໃນການຈັດຕັ້ງປະຕິບັດແນວທາງຂອງພັກ, ລັດຖະທຳມະນູນ, ກົດໝາຍ, ນະໂຍບາຍ, ແຜນພັດທະນາເສດຖະກິດ-ສັງຄົມແຫ່ງຊາດ, ສ້າງວິຖີຊີວິດໃໝ່ເພື່ອພັດທະນາຕົນເອງ ແລະຄອບຄົວໃຫ້ຫຼຸດພົ້ນຈາກຄວາມທຸກຍາກຫຼ້າຫຼັງ, 3. ເອົາໃຈໃສ່ປັບປຸງການຈັດຕັ້ງໃຫ້ໜັກແໜ້ນ, ເຂັ້ມແຂງໃນທຸກດ້ານ, ປັບປຸງແບບແຜນວິທີນໍາພາ, ວິທີເຮັດວຽກໃຫ້ແທດຕົວຈິງ, ຕິດແທດກັບຮາກຖານ, ການເຮັດວຽກໃຫ້ມີແຜນການ, ແຜນງານ, ມີໂຄງການລະອຽດ, ມີການຊຸກຍູ້, ຕິດຕາມ, ກວດກາ, ປະເມີນ, ຕີລາຄາສະ ຫຼຸບຖອນຖອນບົດຮຽນໃນແຕ່ລະໄລຍະຢ່າງພາວະວິໄສເອົາໃຈໃສ່ຂະຫຍາຍສະມາຊິກສະຫະພັນແມ່ຍິງໃຫ້ກວ້າງຂວາງໃຫ້ກວມເອົາແມ່ຍິງຢູ່ທັງໃນຕົວເມືອງ ແລະເຂດຊົນນະບົດ, ໃນສະຖາບັນການສຶກສາ, ໂຮງຈັກ, ໂຮງງານ, ວິສາຫະກິດ, ຫົວໜ່ວຍທຸລະກິດ, ຊາວຄ້າຂາຍເພື່ອເຮັດໃຫ້ແມ່ຍິງຢູ່ໃນທຸກສາຂາອາຊີບໄດ້ເຂົ້າ ເປັນສະມາຊິກແລະໄດ້ຮັບການນໍາພາຊີ້ນຳຈາກອົງການຈັດຕັ້ງສະຫະພັນແມ່ຍິງລາວ, 4. ຕັ້ງໜ້າແກ້ໄຂປາກົດການຫຍໍ້ທໍ້ໃນຖັນແຖວເອື້ອຍນ້ອງແມ່ຍິງເປັນຕົ້ນການເຊື່ອຖືງົມງວຍ, ຖືກກົດໜ່ວງຈາກຮີດຄອງປະເພນີທີ່ຫຼ້າຫຼັງ ແລະປາກົດການຫຍໍ້ທໍ້ໃນສັງຄົມ, 5. ເອົາໃຈໃສ່ພັດທະນາແມ່ຍິງໂດຍສະເພາະແມ່ຍິງທີ່ດ້ອຍໂອກາດ, ເຂດຫ່າງໄກສອກຫຼີກ, ຜູ້ທີ່ທຸກຍາກດ້ວຍການສ້າງຄວາມເຂັ້ມແຂງ, ສ້າງແຫຼ່ງລາຍຮັບທີ່ໝັ້ນຄົງໃຫ້ແກ່ເຂົາເຈົ້າເປັນຕົ້ນສົ່ງເສີມທຸລະກິດຂະໜາດນ້ອຍ, ຂະໜາດກາງ, ພະຍະຍາມໃຫ້ເຂົາເຈົ້າເຂົ້າເຖິງການສຶກສາ, ສ້າງວິຊາອາຊີບໃໝ່ ແລະເຂົ້າເຖິງນະວັດຕະກໍາໃໝ່, ເຂົ້າເຖິງທຶນ, ເຂົ້າເຖິງຕະຫຼາດໃນການຜະລິດກະສິກໍາ, ຫັດຖະກໍາຕໍ່າຫູກທໍໄໝ, ການປຸງແຕງ, ການຄ້າຂາຍ ແລະອື່ນໆ, ສ້າງໂອກາດໃຫ້ແມ່ຍິງຢູ່ຊົນນະບົດໃຫ້ຮູ້ຄ້າຂາຍ, ຜະລິດເປັນສິນຄ້າທີ່ຫຼາກຫຼາຍຮູບແບບສາມາດຕອບສະໜອງຄວາມຕ້ອງການຂອງຕະຫຼາດ, ຊຸກຍູ້ສົ່ງເສີມ, ອໍາ ນວຍຄວາມສະດວກໃຫ້ນັກທຸລະກິດ, ຜູ້ປະກອບການລົງເຖິງທ້ອງຖິ່ນຮາກຖານສັ່ງຈອງສິນຄ້າ, ຝຶກສອນເຂົາເຈົ້າໃຫ້ຜະລິດຖືກກັບຄວາມຕ້ອງການຂອງຕະຫຼາດ ແລະມີການຜູກພັນຮັບຊື້, 6. ສໍາລັບການພົວພັນຮ່ວມມືກັບຕ່າງປະເທດ, ໃຫ້ບັນດາສະຫາຍເພີ່ມທະວີການພົວພັນຮ່ວມມືກັບອົງການຈັດຕັ້ງແມ່ຍິງຂອງບັນດາປະເທດເພື່ອນມິດ ແລະ ອົງການຈັດຕັ້ງສາກົນດ້ວຍຄວາມເປັນເຈົ້າ ແລະ ມີການເລືອກເຟັ້ນຕາມແນວທາງ, ນະໂຍບາຍການຕ່າງປະເທດຂອງພັກ-ລັດເຮົາ, ໃນຜ່ານມາພວກສະຫາຍເຮັດໄດ້ດີພໍສົມ ຄວນ, ແຕ່ໃນເງື່ອນໄຂເຊື່ອມໂຍງກັບສາ ກົນໃນຕໍ່ໜ້ານີ້, ພວກເຮົາຍິ່ງຈະຕ້ອງເຮັດໃຫ້ໄດ້ດີກວ່າເກົ່າເພື່ອສືບຕໍ່ຮັກສາຄວາມໄວ້ເນື້ອເຊື່ອໃຈເຊິ່ງກັນ ແລະກັນເພື່ອຍາດແຍ່ງເອົາບັນດາບົດຮຽນອັນດີເດັ່ນມາໝູນໃຊ້ເຂົ້າໃນການພັດທະນາປະ​ເທດຊາດ, ເວົ້າລວມ, ເວົ້າສະເພາະພັດທະນາແມ່ຍິງລາວໃຫ້ມີການກ້າວໜ້າຢ່າງບໍ່ຢຸດຍັ້ງ.

แชร์