ໄຟເຊີຈະແຈກສູດຢາເມັດຕ້ານໂຄວິດໃຫ້ 95 ປະເທດ

ໄຟເຊີ (Pfizer) ໄດ້ປະກາດບັນລຸຂໍ້ຕົກລົງກັບ Medicines Patent Pool (MPP) ອົງການສິດທິບັດຢາໄດ້ຮັບການສະໜັບສະໜຸນໂດຍອົງການສະຫະປະຊາຊາດ ເພື່ອເພີ່ມທະວີການເຂົ້າເຖິງຢາຕ້ານໂຄວິດ-19 ຂອງບໍລິສັດໃນ 95 ປະເທດຖານະປານກາງ-ທຸກຍາກ.

ຕາມຂ່າວຕ່າງປະເທດລາຍງານວ່າ: ໃນຂໍ້ຕົກລົງດັ່ງກ່າວ Pfizer ຈະໃຫ້ສິດທິ MPP ໃນການໃຊ້ສິດ (Sub-license) ເຮັດສັນຍາກັບຜູ້ຜະລິດຢາສາມັນໃນປະເທດທີ່ໄດ້ຮັບອະນຸຍາດເພື່ອໃຫ້ສາມາດຜະລິດຢາເມັດຕ້ານໂຄວິດ-19 ຂອງໄຟເຊີ ຫຼືທີ່ມີຊື່ທາງການຄ້າວ່າ Paxlovidໄດ້, ໂດຍ 95 ປະເທດທີ່ຢູ່ໃນລາຍຊື່ກວມເອົາ 53% ຂອງປະຊາກອນໂລກ, ສ່ວນໃຫຍ່ເປັນປະເທດທີ່ມີລາຍໄດ້ຕໍ່າ ແລະປະເທດທີ່ມີລາຍໄດ້ປານກາງຂ້ອນຂ້າງຕໍ່າ, ລວມມີ 6 ປະເທດ ໃນອາຊີຕາເວັນອອກສ່ຽງໃຕ້ (ອາຊຽນ) ຄື: ສປປ ລາວ, ມຽນມາ, ກຳປູເຈຍ, ອິນໂດເນເຊຍ, ຟີລິບປິນ ແລະສສ ຫວຽດນາມ.

Pfizer ຈະບໍ່ໄດ້ຮັບການຊົດເຊີຍຊັບສິນທາງປັນຍາຈາກການຂາຍຢາທົ່ວໄປເຫຼົ່ານີ້ຕາບໃດທີ່ໂຄວິດ-19 ຍັງຖືກຈັດເປັນພາວະສຸກເສີນດ້ານສາທາລະນະສຸກສາກົນໂດຍອົງການອະນາໄມໂລກ (WHO).

แชร์