ນວ ເຊື່ອມຊຶມມະຕິກອງປະຊຸມຄະນະບໍລິຫານງານສູນກາງພັກ

ຂ່າວ: ນໍ້າເໝີຍ    

  ໃນວັນທີ 18 ພະຈິກ 2021 ຄະນະໂຄສະນາອົບຮົມນະຄອນຫຼວງວຽງຈັນ (ນວ) ໄດ້ຈັດກອງປະຊຸມເຊື່ອມຊຶມມະຕິກອງປະຊຸມຄະນະບໍລິຫານງານສູນກາງພັກ ຄັ້ງທີ 3 ສະໄໝທີ XI ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກນະຄອນຫຼວງວຽງຈັນຂຶ້ນທີ່ຫ້ອງວ່າການປົກຄອງ ນວ ໃນ ຮູບແບບທາງໄກໂດຍການເປັນປະທານຂອງສະຫາຍ ພົນຈັດຕະວາ ສີພອນ ຈັນສົມວົງ ຮອງເລຂາຄະນະພັກຫົວໜ້າກອງບັນຊາການທະຫານນະຄອນຫຼວງວຽງຈັນ, ມີຮອງເລຂະຄະນະພັກ, ກຳມະການປະຈຳພັກ, ຄະນະພັກນະຄອນຫຼວງວຽງຈັນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ສະຫາຍ ພົນຈັດຕະວາ ສີພອນ ຈັນສົມວົງ ໄດ້ຍົກໃຫ້ເຫັນເນື້ອໃນສໍາຄັນຂອງເອກະສານດັ່ງກ່າວທີ່ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ໂດຍສະເພາະການຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຜນງົບປະມານ ແລະແຜນເງິນຕາ 9 ເດືອນຜ່ານມາມາດຕະການຈັດຕັ້ງປະຕິບັດແຜນໃນໄຕມາດສຸດທ້າຍປີ 2021 ແລະ ທິດທາງແຜນການປີ 2022 ສະພາບການຂອງພາກພື້ນ ແລະ ສາກົນການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ແລະການດຳເນີນຊີວິດການເມືອງພາຍໃນຄະນະໂຄສະນາອົບຮົມນະຄອນຫຼວງວຽງຈັນ ປະຈຳປີ 2021 ແລະອື່ນໆ.

ການເຊື່ອມຊຶມດັ່ງກ່າວແມ່ນເພື່ອສ້າງຄວາມຮັບຮູ້ເຂົ້າໃຈໃຫ້ບັນດາສະຫາຍສະມາຊິກພັກ, ພະນັກງານຫຼັກແຫຼ່ງທົ່ວນະຄອນຫຼວງວຽງຈັນສາມາດກຳໄດ້ເນື້ອໃນຈິດໃຈຕົ້ນຕໍ ແລະເປັນເອກກະພາບໃນການສືບຕໍ່ນຳພາຈັດຕັ້ງເຊື່ອມຊຶມ ແລະຜັນຂະຫຍາຍມະຕິດັ່ງກ່າວໃຫ້ເຂົ້າສູ່ວຽກງານຕົວຈິງຂອງຂົງເຂດວຽກງານຕົນເອງ ຮັບຜິດຊອບ ເພື່ອສ້າງການຫັນປ່ຽນໃໝ່ຢ່າງແຂງແຮງເລິກເຊິ່ງ ແລະຮອບດ້ານພ້ອມທັງຫັນລົງສູ່ຊີວິດຕົວຈິງຂອງສັງຄົມໃນນັ້ນເພື່ອແນໃສ່ໃຫ້ຄະນະພັກແຕ່ລະຂັ້ນຮັບຮູ້, ເຂົ້າໃຈຢ່າງເລິກເຊິ່ງ ແລະກຳແໜ້ນເນື້ອໃນບັນດາມະຕິຂອງພັກແຕ່ລະຂັ້ນໂດຍສະເພາະແມ່ນເນື້ອໃນທີ່ສຳຄັນຕົ້ນຕໍ ແລະວຽກງານຈຸດສຸມທີ່ຈະຕ້ອງເອົາໃຈໃສ່ນຳພາ-ຊີ້ນຳໃນແຕ່ລະຂົງເຂດວຽກງານຕາມຄວາມຮັບຜິດຊອບຂອງຕົນຕິດພັນກັບການຍົກສູງຄວາມເປັນເຈົ້າການຂອງບັນດາພະແນກການ, ອົງການທຽບເທົ່າຂັ້ນພະແນກ, ເມືອງ ແລະບ້ານທົ່ວນະຄອນຫຼວງວຽງຈັນໃນການຫັນເອົາເນື້ອໃນຈິດໃຈມະຕິຂອງພັກ ແຕ່ລະຂັ້ນໃຫ້ເປັນແຜນງານ, ໂຄງການຈຸດສຸມອັນລະອຽດຂອງຕົນເພື່ອຈັດຕັ້ງປະຕິບັດໃຫ້ປາ ກົດຜົນເປັນຈິງພ້ອມທັງເພີ່ມທະວີການນຳພາ-ຊີ້ນຳຂອງສະຫາຍເລຂາຄະນະພັກແຕ່ລະຂັ້ນເຂົ້າໃນການຈັດຕັ້ງຜັນຂະຫຍາຍມະຕິ XI ຂອງພັກຕິດພັນກັບມະຕິ VII ຂອງອົງຄະນະພັກນະຄອນຫຼວງວຽງຈັນໃຫ້ແທດເຖິງຕົວຈິງຂອງທຸກ ຂົງເຂດວຽກງານ, ຮາກຖານ, ຮັບປະກັນໃຫ້ມີຜົນສຳເລັດໃນທ່ວງທ່າໃໝ່ແຕ່ນີ້ຮອດປີ 2025.

ສະນັ້ນເພື່ອເປັນແນວທາງໃຫ້ແກ່ການເຜີຍແຜ່ເຊື່ອມຊຶມມະຕິຂອງພັກ, ຄະນະໂຄສະນາອົບຮົມນະຄອນຫຼວງວຽງຈັນ ຈຶ່ງໄດ້ຮຽບຮຽງ, ຄັດຈ້ອນເອກະສານໃຫ້ບັນດາສະຫາຍຄະນະພັກແຕ່ລະຂັ້ນໄດ້ນຳໃຊ້ຢ່າງເປັນເອກະພາບ ແລະໃຫ້ດັດປັບໝູນໃຊ້ຢ່າງປະດິດສ້າງຖືກກັບສະພາບຈຸດພິເສດຂອງແຕ່ລະພາກສ່ວນແຕ່ຮັບປະກັນຖືກ ຕາມທິດຫັນປ່ຽນໃໝ່ຂອງພັກ.

 

แชร์