CRIFM 93 Mhz ພະຍາຍາມຢ່າງບໍ່ລົດລະເພື່ອກາຍເປັນ “ພາກສ່ວນໜຶ່ງຂອງສື່ມວນຊົນລາວ” ແລະ“ສື່ກາງປະສານຈິດໃຈລະຫວ່າງປະຊາຊົນລາວ ແລະປະຊາຊົນຈີນ” ຕະຫຼອດໄປ

    ວັນທີ 19 ພະຈິກນີ້ແມ່ນວັນທີ່ CRI FM93Mhz ປະຈຳນະຄອນຫຼວງວຽງຈັນກະຈາຍສຽງຄົບຮອບ 15 ປີ. ຕະຫຼອດໄລຍະ 15 ປີຜ່ານມາ, CRI FM93Mhz ໄດ້ສູ້ຊົນຜ່ານຜ່າ, ໄດ້ພັດທະນາຕົນເອງຈາກວິທະຍຸພຽງຄື້ນດຽວກາຍມາເປັນສື່ມວນຊົນທີ່ມີທັງວິທະຍຸ, ເວັບໄຊ, ໜ້າເພດຈເຟສບຸກ ແລະລາຍການໂທລະພາບ, ພວກເຮົາໄດ້ພະຍາຍາມຢ່າງບໍ່ລົດລະ ເພື່ອກາຍເປັນ “ພາກສ່ວນໜຶ່ງຂອງສື່ມວນຊົນລາວ” ແລະເປັນ “ສື່ກາງປະສານຈິດໃຈລະຫວ່າງປະຊາຊົນລາວ ແລະປະຊາຊົນຈີນ”.


   ວັນທີ 19 ພະຈິກປີ 2006, ທ່ານ ຫູຈີນທາວ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນປະທານປະເທດແຫ່ງ ສປ ຈີນ ແລະທ່ານ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວປະທານປະເທດແຫ່ງ ສປປ ລາວ ໄດ້ຮ່ວມກັນກົດປຸ່ມກະຈາຍສຽງໃຫ້ແກ່ຄື້ນ CRI FM93Mhz. ໃນໄລຍະຕົ້ນ, CRI FM 93 Mhz ໄດ້ອອກອາກາດ 12 ຊົ່ວໂມງ 30 ນາທີຕໍ່ມື້ ໂດຍໄດ້ນຳສະເໜີຂ່າວ, ສາລະຄະດີ ແລະດົນຕີຂອງສອງປະເທດລາວ ແລະຈີນໃຫ້ແກ່ເພື່ອນມິດຜູ້ຟັງລາວ. ໃນຂະນະດຽວກັນ, ຍັງໄດ້ຈັດກິດຈະກຳ “ການໄປເກັບກຳຂ່າວຢູ່ຊາຍແດນລາວ-ຈີນ”, ກິດຈະກຳ “ຫຼິ້ນບຸນຫົດນໍ້າຮ່ວມກັນ” ພ້ອມທັງໄດ້ເອົາໃຈໃສ່ລາຍງານຂ່າວງານກິລາໂອລິມປິກປັກກິ່ງ ແລະຊີເກມຢູ່ນະຄອນຫຼວງວຽງຈັນເຊິ່ງໄດ້ຮັບຄວາມນິຍົມຊົມຊອບຈາກຜູ້ຟັງທັງຫຼາຍຂອງລາວເຊິ່ງລວມທັງການນຳຂັ້ນສູງຂອງ ສປປ ລາວ.


   ວັນທີ 10 ກັນຍາປີ 2009, ໃນເວລາທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ໃນເວລານັ້ນ ຢ້ຽມຢາມປະເທດຈີນ, ທ່ານໄດ້ໃຫ້ສຳພາດຕໍ່ນັກຂ່າວວ່າ: ລາຍການ CRI FM93Mhz ໄດ້ຮັບຄວາມນິຍົມຊົມຊອບຈາກຜູ້ຟັງຊາວລາວຈຳນວນຫຼວງຫຼາຍ ແລະ ໄດ້ສ້າງຜົນປະໂຫຍດໃຫ້ແກ່ຜູ້ຟັງລາວ. ທ່ານຍັງໄດ້ຕີລາຄາ CRI FM93Mhz ວ່າ: ເປັນ “ພາກສ່ວນໜຶ່ງຂອງສື່ມວນຊົນລາວ”.


   ວັນທີ 1 ກໍລະກົດປີ 2011, CRI FM93Mhz ໄດ້ສ້າງຕັ້ງສຳນັກງານສາຂາປະຈຳນະຄອນຫຼວງວຽງຈັນ ແລະໄດ້ເລີ່ມຈັດທຳລາຍການຢູ່ນະຄອນຫຼວງວຽງຈັນ ໂດຍເລີ່ມຈາກການລາຍງານຂ່າວກ່ຽວກັບກອງປະຊຸມໃຫຍ່ຄັ້ງທີ 9 ຂອງພັກປະຊາຊົນປະຕິວັດລາວ. CRI FM93Mhz ໄດ້ໃຊ້ການກະທຳຕົວຈິງເພື່ອເຮັດໃຫ້ຕົນກາຍເປັນ “ພາກສ່ວນໜຶ່ງຂອງສື່ມວນຊົນລາວ”. ວັນທີ 21 ກັນຍາປີ 2011, ທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ໃນເວລານັ້ນໄດ້ເດີນທາງາຢ້ຽມຢາມ CRI ແລະເຂົ້າຮ່ວມພິທີສະເຫຼີມສະຫຼອງວັນເລີ່ມກະຈາຍສຽງຂອງ CRI FM93Mhz ຄົບຮອບ 5 ປີ ພ້ອມທັງໄດ້ຕີລາຄາວ່າ: CRI FM93Mhz ໄດ້ກາຍເປັນ “ແບບຢ່າງໃນການຮ່ວມມືລະຫວ່າງສື່ມວນຊົນສອງປະເທດຈີນແລະລາວ”.


   ນອກຈາກທ່ານ ຈູມມາລີ ໄຊຍະສອນ ແລ້ວ, ທ່ານ ບຸນຍັງ ວໍລະຈິດ ອະດີດປະທານປະເທດແຫ່ງ ສປປ ລາວ ແລະ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ກໍໄດ້ເປັນມິດລາຍການຂອງ CRI FM93Mhz ເຊັ່ນກັນ. ເນື່ອງໃນໂອກາດ CRI FM93Mhz ກະຈາຍສຽງຄົບຮອບ 10 ປີ,ທ່ານ ບຸນຍັງ ວໍລະຈິດ ໄດ້ຕີລາຄາ CRI FM93Mhz ວ່າ: ເປັນ “ສື່ກາງປະສານຈິດໃຈລະຫວ່າງປະຊາຊົນລາວ ແລະປະຊາຊົນຈີນ”. ທ່ານ ທອງລຸນ ສີສຸລິດ ກໍເຄີຍໄດ້ໃຫ້ສຳພາດຕໍ່ນັກຂ່າວ CRI ຫຼາຍເທື່ອ ແລະໄດ້ຍ້ອງຍໍ CRI FM93Mhz ວ່າ: ໄດ້ຮັບຄວາມນິຍົມຊົມຊອບຈາກຜູ້ຟັງຊາວລາວທັງຫຼາຍ.


 ປະຈຸບັນ, CRI FM93Mhz ໄດ້ກາຍເປັນແຫຼ່ງຂ່າວສຳຄັນທີ່ສື່ມວນຊົນລາວອີງໃສ່ໃນການລາຍງານຂ່າວກ່ຽວກັບຈີນ ແລະໂລກພ້ອມທັງໄດ້ກາຍເປັນຊ່ອງທາງສຳຄັນທີ່ຜູ້ຟັງລາຍການຊອກຮູ້ປະເທດຈີນ; ໜ້າເພດຈເຟສບຸກ CRI-FM93 ໄດ້ມີມິດລາຍການຕິດຕາມ 1,2 ລ້ານຄົນ; ລາຍການທຸກທິດທາງທີ່ CRI FM93Mhz ແລະໂທລະພາບແຫ່ງຊາດລາວຮ່ວມກັນຖ່າຍທຳນັ້ນໄດ້ສາຍຢູ່ຊ່ອງ 1 ແລະຊ່ອງ 3 ຂອງໂທລະພາບແຫ່ງຊາດລາວ; ກິດຈະກຳສາຍຮູບເງົາດີເດັ່ນໄດ້ກາຍເປັນກິດຈະກຳທີ່ເພີ່ມຄວາມເຂົ້າໃຈລະຫວ່າງປະຊາຊົນສອງຊາດລາວ-ຈີນ; CRI FM93Mhz ພວມພະຍາຍາມຢ່າງບໍ່ລົດລະເພື່ອກາຍເປັນ “ພາກສ່ວນໜຶ່ງຂອງສື່ມວນຊົນລາວ” ແລະເປັນ “ສື່ກາງປະສານຈິດໃຈລະຫວ່າງປະຊາຊົນລາວ ແລະປະຊາຊົນຈີນ” ຕະຫຼອດໄປ.

แชร์