ລາວຮັບວັກແຊງປ້ອງກັນໂຄວິດ-19 ອີກ 1,9 ລ້ານໂດສ ຈາກຈີນ

ວັນທີ 17 ພະຈິກຜ່ານມາທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ໄດ້ມີໄດ້ມີພິທີມອບ-ຮັບວັກແຊັງ ຊີໂນຟາມປ້ອງກັນພະຍາດໂຄວິດ-19 ຈາກລັດຖະບານ ສປ ຈີນ ຈຳນວນ 1,9 ລ້ານໂດສ ພ້ອມດ້ວຍເຂັມສັກຢາຕາງໜ້າໃຫ້ລັດຖະບານ ສປ ຈີນ ກ່າວມອບໂດຍທ່ານ ຈ່ຽງ ຈ່າຍຕົ່ງ ເອກອັກຄະລັດຖະທູດຜູ້ມີອຳນາດເຕັມແຫ່ງ ສປ ຈີນປະຈຳ ສປປ ລາວ, ຕາງໜ້າລັດຖະບານ ສປປ ລາວ ກ່າວຮັບໂດຍທ່ານ ພັນຄຳ ວິພາວັນນາ ຍົກລັດຖະມົນຕີແຫ່ງ ສປປລາວ, ມີບັນດາລັດຖະມົນຕີ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານນາຍົກລັດຖະມົນຕີກ່າວວ່າ: ຕາງໜ້າໃຫ້ພັກ ແລະລັດຖະບານແຫ່ງ ສປປ ລາວ ເຂົ້າຮ່ວມພິທີມອບ-ຮັບວັກ ແຊງຊີໂນຟາມຈຳນວນ 1,9 ລ້ານໂດສ ພ້ອມດ້ວຍເຂັມສັກຢາທີ່ລັດຖະບານ ສປ ຈີນ ມອບໃຫ້ລັດຖະບານ ສປປ ລາວ ເປັນຄັ້ງທີ 7 ໃນຄັ້ງນີ້. ນອກນັ້ນ, ລັດຖະບານຈີນຍັງໄດ້ແຈ້ງວ່າໃນທ້າຍເດືອນພະຈິກນີ້ລັດຖະບານຈີນຍັງຈະສືບຕໍ່ມອບວັກແຊງເພີ່ມອີກ 7 ແສນໂດສ ແລະ ອຸປະກອນການແພດຈຳນວນໜຶ່ງໃຫ້ບັນດາແຂວງພາກເໜືອຂອງລາວໂດຍມອບໃຫ້ແຂວງຢຸນນານເປັນຜູ້ຈັດຕັ້ງປະຕິບັດນັບແຕ່ເກີດການລະບາດຂອງພະຍາດ ໂຄວິດ-19, ສປຈີນ ເປັນປະເທດທີ່ໃຫ້ການຊ່ວຍເຫຼືອສະໜອງວັກຊິນໃຫ້ແກ່ລາວຫຼາຍທີ່ສຸດໃນປະຈຸບັນລວມທັງ ໝົດຮອດທ້າຍເດືອນພະຈິກນີ້ຈະມີຈໍານວນຫຼາຍກວ່າ 6,9 ລ້ານໂດສ, ການຊ່ວຍເຫຼືອເຫຼົ່ານີ້ມີຄວາມໝາຍຄວາມສຳຄັນຫຼາຍຕໍ່ ສປປ ລາວ ຄື: ດັ່ງຮູ້ນຳກັນແລ້ວວ່າພະຍາດໂຄວິດ-19 ຍັງຈະສືບຕໍ່ມີການລະບາດຊຶ່ງວິທີປ້ອງກັນທີ່ມີປະສິດທິຜົນທີ່ສຸດໃນປະຈຸບັນກໍ່ມີວິທີການດຽວຄືຕ້ອງພ້ອມກັນຍົກສູງພູມຄຸ້ມກັນຂອງປະຊາກອນໃຫ້ສູງຂຶ້ນໄວເທົ່າທີ່ຈະໄວໄດ້.

ທ່ານກ່າວຕື່ມວ່າ: ສປປ ລາວ ໄດ້ກຳນົດເປົ້າໝາຍການສັກວັກແຊງໃນປີ 2021 ໃຫ້ໄດ້ຫຼາຍກວ່າ 50% ຂອງ ພົນລະເມືອງລາວ ແລະປີ 2022 ໃຫ້ໄດ້ຫຼາຍກວ່າ 80% ຂອງພົນລະເມືອງ, ສະນັ້ນຈຶ່ງສາມາດຢືນຢັນໄດ້ວ່າການຊ່ວຍເຫຼືອວັກແຊງຂອງລັດຖະບານຈີນໃຫ້ແກ່ລັດຖະບານລາວແມ່ນເປັນການປະກອບສ່ວນທີ່ສໍາຄັນຕົ້ນຕໍໃຫ້ແກ່ການປະຕິບັດເປົ້າໝາຍດັ່ງກ່າວຂອງລັດຖະບານລາວຊຶ່ງໝາກຜົນຂອງການປະຕິບັດບັນລຸເປົ້າໝາຍດັ່ງກ່າວນັ້ນຈະເປັນພື້ນຖານອັນສໍາຄັນໃຫ້ແກ່ການເປີດປະເທດໃນເງື່ອນໄຂທີ່ທັງຮັບປະກັນໄດ້ຊີວິດຂອງປະຊາຊົນບໍ່ໃຫ້ສູນເສຍກັບການກະຕຸ້ນເສດຖະກິດຂອງປະເທດໃຫ້ມີການຟື້ນຕົວ ແລະພັດທະນາໃນຕໍ່ໜ້າ. ຍ້ອນໄດ້ຮັບການຊ່ວຍເຫຼືອ ແລະສະໜັບສະໜູນຈາກ ສປ ຈີນ, ສປປ ລາວ ມີຄວາມໝັ້ນໃຈ ແລະໄດ້ກໍາລັງແຮງເພີ່ມຂຶ້ນອີກເພື່ອຮ່ວມກັບບັນດາປະເທດອ້ອມຂ້າງກໍ່ຄືສາກົນເພື່ອພັດທະນາປະເທດໃນຍຸກການດໍາລົງຊີວິດແບບໃໝ່.

ລັດຖະບານລາວຈະສືບຕໍ່ປະສານສົມທົບກັບຝ່າຍຈີນເພື່ອປະຕິບັດການຕົກລົງເປັນເອກະພາບຂອງການນໍາສູງສຸດຂອງສອງພັກ ແລະສອງລັດຂອງສອງປະເທດໂດຍສະເພາະການເປັນຄູ່ຮ່ວມມືຍຸດທະສາດຮອບດ້ານ, ບົນຈິດໃຈ 4 ດີ ແລະການເປັນຄູ່ຮ່ວມຊາຕາກຳສອງຊາດລາວ-ຈີນ ໃຫ້ເກີດດອກອອກຜົນ, ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດຢ່າງແທ້ຈິງ, ພັກ-ລັດຖະບານ ແລະປະຊາຊົນລາວຂໍສະແດງຄວາມຂອບໃຈຢ່າງຈິງໃຈ ແລະຮູ້ບຸນຄຸນເປັນຢ່າງສູງໂດຍຜ່ານທ່ານ ຈ່ຽງ ຈ່າຍ ຕົ່ງ ໄປຍັງພັກ-ລັດຖະບານ  ແລະປະຊາຊົນຈີນອ້າຍນ້ອງຕໍ່ການຊ່ວຍເຫຼືອອັນລໍ້າຄ່າດັ່ງກ່າວ ແລະອວຍພອນໃຫ້ທ່ານ ຈ່ຽງ ຈ່າຍຕົ່ງ ຈົ່ງມີສຸຂະພາບແຂງແຮງມີພະລານາໄມສົມບູນ ແລະປະສົບຜົນສຳເລັດອັນໃໝ່ໃຫຍ່ຫຼວງກວ່າເກົ່າໃນໜ້າທີ່ອັນມີກຽດຂອງທ່ານ.

แชร์