ຫຼວງພະບາງ ເນັ້ນແກ້ຫຍຸ້ງຍາກເສດຖະກິດ-ການເງິນ

ຂ່າວ: ສີສຸວັນ

ແນໃສ່ສ້າງຄວາມເຂັ້ມແຂງ ແລະສາມາດແກ້ໄຂບັນຫາເສດຖະກິດ-ການເງິນຂອງແຂວງຫຼວງພະບາງໃຫ້ສາມາດກຸ້ມຕົນເອງໃນອະນາຄົດທຸກພາກສ່ວນຕ້ອງເປັນເຈົ້າການເພື່ອພັດທະນາພື້ນຖານເສດຖະກິດໃຫ້ຫັນໄປສູ່ຄວາມທັນສະໄໝ, ສ້າງເງື່ອນໄຂອັນເອື້ອອໍານວຍໃຫ້ແກ່ການຄ້າ ແລະການລົງທຶນເພີ່ມຂຶ້ນໃນແຕ່ລະປີ.

ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ຊີ້ນໍາໃຫ້ຂະແໜງການທີ່ກ່ຽວຂ້ອງເອົາໃຈໃສ່ສົ່ງເສີມການສ້າງຖານການຜະລິດ-ທຸລະກິດ, ການບໍລິການ ແລະສ້າງຄວາມເຂັ້ມແຂງຂອງຖານລາຍຮັບໂດຍເລີ່ມຈາກການກວດກ ແລະຈັດຕັ້ງການຜະລິດດ້ວຍຫຼາຍຮູບແບບ, ຫຼາຍລະດັບແຕ່ຮາກຖານຂຶ້ນມາສ້າງເງື່ອນໄຂອັນເອື້ອອໍານວຍໃຫ້ແກ່ການຄ້າ ແລະການລົງທຶນເພື່ອຍູ້ແຮງການຜະລິດຕາມທິດສ້າງຄວາມເຂັ້ມແຂງໃຫ້ແກ່ການຜະລິດພາຍໃນ, ເພີ່ມການສົ່ງອອກໃຫ້ຫຼາຍຂຶ້ນ, ປັບປຸງກົນໄກສົ່ງເສີມດ້ວຍການຈັດລຽງບູລິມະສິດ ແລະກໍານົດລາຍການສິນຄ້າ (ຂະແໜງການ) ທີ່ເປັນທ່າແຮງ ແລະເຂດທີ່ຈະຜະລິດຢ່າງລະອຽດ, ດໍາເນີນມາດຕະການສົ່ງເສີມ ແລະປົກປ້ອງຜູ້ຜະລິດພາຍໃນໂດຍສະເພາະແມ່ນຊາວກະສິກອນ, ອໍານວຍການເຄື່ອນຍ້າຍສິນຄ້າຈາກຖານຜະລິດສູ່ຕະຫຼາດຊົມໃຊ້ຄຽງຄູ່ກັບການກໍານົດນະໂຍບາຍສົ່ງເສີມ ແລະພັດທະນາ SMEs ທີ່ຈະແຈ້ງ ແລະເປັນຮູບປະທຳຕ້ອງຫັນເປັນໂຄງການລະອຽດເພື່ອງ່າຍແກ່ການຊຸກຍູ້, ສົ່ງເສີມ ແລະຕິດຕາມປະເມີນຜົນ, ການສົ່ງເສີມການຜະລິດແມ່ນເນັ້ນໃສ່ການຜະລິດເພື່ອທົດແທນການນໍາເຂົ້າ ແລະເພື່ອການສົ່ງອອກຢ່າງແຂງແຮງໄປຍັງຕະຫຼາດໃນພາກພື້ນ ແລະສາກົນເປັນກ້າວໆ.

ສະນັ້ນແລ້ວຕ້ອງຫັນການຄຸ້ມຄອງ ເສດຖະກິດ-ການເງິນ ໃຫ້ເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ບໍ່ຂຶ້ນກັບຕ່າງປະເທດໝົດທຸກຢ່າງ ໂດຍຕ້ອງຍູ້ແຮງຕື່ມປະສິດທິພາບການຄຸ້ມຄອງລັດດ້ວຍກົດໝາຍ, ຫັນໄປສູ່ສັງຄົມການຜະລິດ, ສັງຄົມການຜະລິດ,ສັງຄົມນໍາໃຊ້ເງິນກີບ, ບໍ່ໃຫ້ເປັນສັງຄົມບໍລິໂພກ ແລະນໍາໃຊ້ເງິນຕາຕ່າງປະເທດຢ່າງຊະຊາຍ, ທັງນີ້ກໍ່ເພື່ອແນໃສ່ແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນຢູ່ພາຍໃນແຂວງຫຼວງພະບາງໃຫ້ສາມາດບັນລຸຕາມເປົ້າໝາຍທີ່ວາງໄວ້.

แชร์