ປາກຊ່ອງ ມີ 166 ບໍລິສັດ ເຊົ່າ-ສໍາປະທານດິນລັດ

ຂ່າວ: ຈັນທະວີສັກ

  ກອງປະຊຸມປຶກສາຫາລືກ່ຽວກັບການຊຸກຍູ້ຕິດຕາມ ແລະກວດກາສັນຍາການເຊົ່າ-ສໍາປະທານ ແລະເກັບລາຍຮັບງົບປະມານຈາກເນື້ອທີ່ດິນລັດຢູ່ເມືອງປາກຊ່ອງ ແຂວງຈໍາປາສັກ ຈັດຂຶ້ນໃນວັນທີ 17 ພະຈິກ 2021 ໃຫ້ກຽດເຂົ້າຮ່ວມຂອງ ທ່ານ ຈັນທະບູນ ສີປະເສີດ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມທັງເປັນຫົວໜ້າຄະນະກໍາມະການຊຸກຍູ້, ຕິດຕາມ ແລະກວດກາສັນຍາການເຊົ່າ-ສໍາປະທານ ແລະເກັບລາຍຮັບງົບປະມານຈາກເນື້ອທີ່ດິນລັດໃນທົ່ວແຂວງຈໍາປາສັກ, ທ່ານ ພິມພອນ ພັນດານຸວົງ ເຈົ້າເມືອງປາກຊ່ອງ, ມີພະແນກການ-ຂະແໜງການກ່ຽວຂ້ອງເຂົ້າຮ່ວມ.

ໃນເມືອງປາກຊ່ອງມີຈໍານວນບໍລິສັດ ທັງໝົດ 166 ບໍລິສັດ, ມີ 201 ກິດຈະການ, ເນື້ອທີ່ 52.921,66 ເຮັກຕາ (ບໍ່ມີເນື້ອທີ່ 78 ບໍລິສັດ) ໃນນັ້ນບໍລິສັດເຊົ່າຈໍານວນ 36 ບໍລິສັດ, ມີ 36 ກິດຈະການ ເນື້ອທີ່ 302,66 ເຮັກຕາ (ບໍ່ມີເນື້ອທີ່ 14 ບໍລິສັດ) ແລະມີບໍລິສັດເຊົ່າພາຍໃນ 17 ບໍລິສັດເນື້ອທີ່ 142,07 ເຮັກຕາ, (ບໍ່ ມີເນື້ອທີ່ 14 ບໍລິສັດ).

ການສໍາປະທານມີຈໍານວນ 130 ບໍລິສັດ, ມີ 165 ກິດຈະການ, ເນື້ອທີ່52.619 ເຮັກຕາ, (ບໍ່ມີເນື້ອທີ່ 64 ບໍລິສັດ) ໃນນັນສໍາປະທານພາຍໃນ 55 ບໍລິສັດ, ເນື້ອທີ່ 4.202,42 ເຮັກຕາ (ບໍ່ ມີເນື້ອທີ່ 58 ບໍລິສັດ), ສໍາປະທານຕ່າງ ປະເທດ ຈໍານວນ 75 ບໍລິສັດ, ເນື້ອທີ່ 48.416,6 ເຮັກຕາ (ບໍ່ມີເນື້ອທີ່ 6 ບໍລິສັດ, ສໍາລັບຖານຂໍ້ມູນດັ່ງກ່າວທາງຄະນະກໍາມະການຈະໄດ້ລົງຕິດຕາມຊຸກຍູ້ ແລະກວດກາສັນຍາການເຊົ່າ-ສໍາປະທານ ເພື່ອປັບປຸງໃຫ້ແທດເໝາະກັບຕົວຈິງໃນແຕ່ລະດ້ານທັງແນໃສ່ໃຫ້ບັນດາບໍລິສັດກໍ່ຄືຫົວໜ່ວຍທຸລະກິດດໍາເນີນກິດຈະການຖືກຕ້ອງຕາມລະບຽບກົດໝາຍ, ປະກອບສ່ວນຢ່າງແຂງແຮງໃນການເສຍພັນທະອາກອນ.

แชร์