ເປີດກອງປະຊຸມໂຕະມົນລະດັບສູງ

ວັນທີ 17 ພະຈິກ 2021 ທີ່ນະຄອນຫຼວງວຽງຈັນ, ໄດ້ມີກອງປະຊຸມໂຕະມົນລະດັບສູງ ຄັ້ງທີ 13 ໃນ ສປປ ລາວ ທາງອອນລາຍພາຍໃຕ້ຫົວຂໍ້: “ເພີ່ມທະວີການເປັນຄູ່ຮ່ວມເພື່ອຍົກສູງປະສິດທິຜົນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແນໃສ່ເລັ່ງລັດການບັນລຸເປົ້າໝາຍການພັດທະນາແບບຍືນຍົງ ແລະການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນໄລຍະຟື້ນຟູຜົນກະທົບຈາກການລະບາດຂອງພະຍາດໂຄວິດ-19”, ໂດຍການໃຫ້ກຽດເຂົ້າຮ່ວມກ່າວເປີດກອງປະຊຸມຂອງທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ກອງປະຊຸມດັ່ງກ່າວພາຍໃຕ້ການເປັນປະທານຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະການລົງທຶນ ແລະທ່ານ ນາງ ຊາຣາ ເຊເກນເນັສ ຜູ້ປະສານງານອົງການ ສປຊ ປະຈຳ ສປປ ລາວ, ມີບັນດາພາສ່ວນກ່ຽວຂ້ອງ ແລະຄູ່ຮ່ວມພັດທະນາເຂົ້າຮ່ວມ.

ກອງປະຊຸມໂຕະມົນແມ່ນເວທີປືກສາຫາລື ແລະແລກປ່ຽນຂໍ້ມູນຂ່າວສານກ່ຽວກັບຄວາມຄືບໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດຂອງ ສປປ ລາວ ໃນແຕ່ລະໄລຍະລະຫວ່າງລັດຖະບານ ແລະຄູ່ຮ່ວມພັດທະນາ.

   ໃນໂອກາດດັ່ງກ່າວ, ທ່ານ ພັນຄຳ ວິພາວັນ ໄດ້ກ່າວເປີດກອງປະຊຸມວ່າ: ກອງປະຊຸມໂຕະມົນລະດັບສູງໃນປີນີ້ແມ່ນຜົນຂອງຄວາມພະຍາຍາມຮ່ວມກັນລະຫວ່າງລັດຖະບານ ສປປ ລາວ ແລະຄູ່ຮ່ວມພັດທະນາທີ່ໄດ້ມີສ່ວນຮ່ວມເຂົ້າໃນການໂອ້ລົມ ແລະການປຶກສາຫາລືກ່ຽວກັບບັນຫາການພັດທະນາຂອງ ສປປ ລາວ ດ້ວຍເຫດນີ້, ຂ້າພະເຈົ້າຈຶ່ງຫວັງທີ່ຈະໄດ້ເຫັນຄວາມມຸ້ງໝັ້ນຈາກທາງຄູ່ຮ່ວມພັດທະນາທັງພາຍໃນ ແລະຕ່າງປະເທດເພື່ອສະໜັບສະໜູນການພັດທະນາເສດຖະກິດ-ສັງຄົມຂອງ ສປປລາວ, ໂດຍສະເພາະການຈັດຕັ້ງປະຕິບັດວາລະແຫ່ງຊາດໄລຍະ 2021-2023 ວ່າດ້ວຍການຫຼຸດຜ່ອນຜົນກະທົບທາງດ້ານເສດຖະກິດ ແລະການເງິນພ້ອມທັງການສະກັດກັ້ນການຄ້າຂາຍຢາເສບຕິດ; ການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ ຄັ້ງທີ 9; ການຫຼຸດພົ້ນອອກຈາກສະຖານະພາບດ້ອຍພັດທະນາພາຍໃນປີ 2026 ແລະການບັນລຸເປົ້າໝາຍພາຍໃຕ້ວາລະ 2030 ເພື່ອການພັດທະນາແບບຍືນຍົງ ແລະທ່ານກ່າວເນັ້ນຕື່ມວ່າ: ລັດຖະບານຈະສືບຕໍ່ເອົາໃຈໃສ່ການປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດໄຂ້ຫວັດສາຍພັນໃໝ່ໂຄວິດ-19, ສໍາລັບ ສປປ ລາວ ມີເປົ້າໝາຍສັກວັກແຊງໃຫ້ພົນລະເມືອງລາວຢ່າງໜ້ອຍໃຫ້ໄດ້ 50% ພາຍໃນປີ 2021 ນີ້ ແລະສະເໜີໃຫ້ບັນດາຄູ່ຮ່ວມພັດທະນາສືບຕໍ່ຊ່ວຍເຫຼືອວັກແຊງຕ້ານພະຍາດໂຄວິດ-19.

ພ້ອມນີ້, ທ່ານ ອາຄີມ ສະໄຕເນີ (Achim Steiner) ຮອງປະທານກຸ່ມການພັດທະນາແບບຍືນຍົງ, ຜູ້ບໍລິຫານອົງການ UNDP ໄດ້ມີຄຳເຫັນຜ່ານການບັນທຶກພາບ ແລະ ສຽງວ່າ: ແຜນພັດທະນາເສດຖະກິດ-ສັງຄົມ ແຫ່ງຊາດຄັ້ງທີ 9 ແມ່ນກາລະໂອກາດຂອງ ສປປ ລາວ ໃນການບັນລຸການຫຼຸດພົ້ນຢ່າງຫຼ່ຽນໄຫຼຂອບວຽກການຟື້ນຟູເພື່ອສ້າງຄືນໃໝ່ໃຫ້ດີກວ່າເກົ່າຈາກຜົນກະທົບຂອງພະຍາດໂຄວິດ-19 ນັ້ນຈະຕ້ອງແມ່ນພາກສ່ວນໜຶ່ງຂອງແຜນການ 5 ປີດັ່ງກ່າວ, ນີ້ແມ່ນສິ່ງທີ່ສຳຄັນຍ້ອນການແຜ່ລະບາດໄດ້ເຮັດໃຫ້ຄວາມບໍ່ສະເໝີພາບທີ່ມີຢູ່ແລ້ວຮ້າຍແຮງຂຶ້ນກວ່າເກົ່າ, ຊຶ່ງຜູ້ທີ່ມີຄວາມອ່ອນໄຫວສູງສຸດແມ່ນຜູ້ທີ່ໄດ້ຮັບຜົນກະທົບທີ່ຮຸນແຮງທີ່ສຸດ, ການພັດທະນາບໍ່ແມ່ນການໃຫ້ທຶນ ຫຼືວິຊາການແຕ່ຢ່າງດຽວ, ແຕ່ຕ້ອງໄດ້ຄໍານຶງເຖິງຫຼັກການການສ້າງ ແລະການລົງທຶນຮ່ວມກັນ ແລະດ້ວຍເຫດນີ້, ໜ່ວຍງານທັງໝົດຂອງອົງການສະຫະປະຊາຊາດແມ່ນພ້ອມແລ້ວທີ່ຈະໃຫ້ການຊ່ວຍເຫຼືອ ສປປ ລາວ ໃນການບັນລຸວາລະ2030.

แชร์