ສຳເລັດກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຊຸດທີ IX

ຂ່າວ: ບຸນນິກ 

ກອງປະຊຸມສະໄໝສາມັນເທື່ອ ທີ 2 ຂອງສະພາແຫ່ງຊາດ ຊຸດທີ IX ໄດ້ອັດລົງດ້ວຍຜົນສໍາເລັດໃນວັນທີ 17 ພະຈິກ 2021, ພາຍຫຼັງດໍາເນີນມາແຕ່ວັນທີ 1-17 ພະຈິກ 2021, ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ທ່ານ ພັນຄໍາ ວິພາວັນ ນາຍົກລັດຖະມົນຕີ, ມີບັນດາການນໍາຂັ້ນສູງພັກ-ລັດ, ສະມາຊິກສະພາແຫ່ງຊາດ ແລະແຂກຖືກເຊີນເຂົ້າຮ່ວມ.

   ທ່ານ ໄຊສົມພອນ ພົມວິຫານ ກ່າວວ່າ: ກອງປະຊຸມຄັ້ງນີ້ໄດ້ພິຈາລະນາຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາປະຈໍາປີ 2001 ແລະທິດທາງແຜນການປະຈໍາປີ 2022, ຍຸດທະສາດພັດທະນາພະລັງ ງານໄຟຟ້າຂອງ ສປປ ລາວ 2021- 2030, ວິໄສທັດການພັດທະນາເສດຖະກິດດິຈິຕອລແຫ່ງຊາດ ໄລຍະ 20 ປີ (2021-2040), ຍຸດທະສາດ 10 ປີ (2021-2030) ແລະແຜນພັດທະນາເສດຖະກິດດິຈິຕອລແຫ່ງຊາດ 5 ປີ (2021-2025), ກອງປະຊຸມໄດ້ຕີລາຄາສູງຕໍ່ຄວາມພະຍາຍາມຊີ້ນໍາຂອງລັດຖະບານ ແລະອົງການທີ່ກ່ຽວຂ້ອງທີ່ໄດ້ ຜ່ານຜ່າຄວາມຫຍຸ້ງຍາກ, ສິ່ງທ້າທາຍຕ່າງໆ, ສູ້ຊົນຈັດຕັ້ງປະຕິບັດ ມະຕິກອງປະຊຸມສະພາແຫ່ງຊາດຕາມ ຂອບເຂດສິດ ແລະພາລະບົດບາດຂອງຕົນທັງມີມາດຕະການໃນການພັດທະນາເສດຖະກິດ ແລະຄວບຄຸມພະຍາດໂຄວິດ-19 ໄປພ້ອມໆກັນສາມາດຍາດໄດ້ຜົນສໍາເລັດພົ້ນເດັ່ນຫຼາຍດ້ານອັນໄດ້ປະກອບສ່ວນເຂົ້າໃນການເຮັດໃຫ້ປະເທດຊາດມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ເສດຖະກິດສືບຕໍ່ມີການຂະຫຍາຍຕົວຢ່າງຕໍ່ເນື່ອງ. 

  ກອງປະຊຸມໄດ້ພິຈາລະນາຮັບຮອງເອົາບົດລາຍງານຂອງອົງການກວດກາແຫ່ງລັດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2021 ແລະແຜນການປະຈໍາປີ 2022, ບົດລາຍງານຜົນການກວດກາຕາມຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2019, ບົດລາຍງານຂອງອົງການກວດສອບແຫ່ງລັດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2021 ແລະ ແຜນການປະຈໍາປີ 2022, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2020 ຊຶ່ງກອງປະຊຸມໄດ້ສະແດງຄວາມຊົມເຊີຍສັນລະເສີນ ແລະຕີລາຄາສູງຕໍ່ອົງການກວດກາແຫ່ງລັດ ແລະອົງການກວດສອບແຫ່ງລັດທີ່ໄດ້ມີຄວາມພະຍາຍາມປະຕິບັດພາລະບົດບາດຂອງຕົນຕາມກົດໝາຍຢ່າງຕັ້ງໜ້າ, ເຮັດໃຫ້ການປະຕິບັດກົດໝາຍມີຄວາມເຂັ້ມງວດທ່ຽງທໍາຂຶ້ນເປັນຕົ້ນສາມາດຊອກເຫັນໄດ້ການລະເມີດວິໄນແຜນການ-ການເງິນ, ເກັບກູ້ງົບປະມານ ແລະຊັບສິນຂອງລັດຄືນມາໄດ້ຈໍານວນໜຶ່ງເຮັດໃຫ້ສັງຄົມມີຄວາມເຊື່ອໝັ້ນຕໍ່ການ ນໍາພາຂອງພັກ ແລະການຄຸ້ມຄອງຂອງລັດ, ພິຈາລະນາຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານຂອງສານປະຊາຊົນສູງສຸດ ແລະອົງການໄອຍະການປະຊາຊົນສູງສຸດ ປະຈໍາປີ 2021 ແລະແຜນການປະຈໍາປີ 2022 ຊຶ່ງກອງປະຊຸມໄດ້ຕີ ລາຄາສູງຕໍ່ສອງອົງການດັ່ງກ່າວທີ່ໄດ້ເອົາໃຈໃສ່ປະຕິບັດພາລະບົດບາດຂອງຕົນດ້ວຍຄວາມຮັບຜິດຊອບສູງ,ໄດ້ຍົກສູງຄຸນນະພາບໃນການດໍາເນີນຄະດີຕາມຂະບວນຍຸຕິທໍານັບມື້ດີຂຶ້ນ,ເອົາໃຈໃສ່ປັບປຸງກົນໄກການປະສານງານກັບພາກສ່ວນກ່ຽວຂ້ອງເພື່ອດໍາເນີນຄະດີໃຫ້ມີຄຸນນະພາບ ແລະວ່ອງໄວ,ການຕິດຕາມກວດກາການປະຕິບັດລັດຖະທໍາມະນູນ ແລະກົດໝາຍຊຶ່ງເປັນການປະສ່ວນເຮັດໃຫ້ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍດີຂຶ້ນ, ກອງປະຊຸມໄດ້ພິຈາລະນາຮັບຮອງເອົາການສະເໜີແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດຊຶ່ງປະກອບດ້ວຍບຸກຄະລາກອນທີ່ມີມາດຕະຖານ, ເງື່ອນໄຂຄົບຖ້ວນ ແລະມີປະສົບການຕົວຈິງ ຊຶ່ງຈະເປັນການປັບປຸງອົງການສິດອໍານາດແຫ່ງລັດຂອງອົງການຕຸລາການໃຫ້ເປັນລະບົບຄົບຊຸດ ແລະ ເຂັ້ມແຂງຂຶ້ນເພື່ອເຮັດໃຫ້ການເຄື່ອນໄຫວວຽກງານຂອງສານປະຊາຊົນແຕ່ລະຂັ້ນມີບາດກ້າວຫັນປ່ຽນທີ່ດີຂຶ້ນປະກອບສ່ວນເຂົ້າໃນການປັບປຸງລະບົບຍຸຕິທໍາໃຫ້ໜັກແໜ້ນຂຶ້ນເພື່ອສ້າງຄວາມເຊື່ອໝັ້ນແກ່ໃຫ້ປະຊາຊົນລາວບັນດາເຜົ່າ.

   ກອງປະຊຸມຍັງໄດ້ພິຈາລະນາ ແລະຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2021 ແລະແຜນການ 2022 ຂອງສະພາແຫ່ງຊາດ, ການປະກອບຄໍາເຫັນຂອງສູນກາງແນວລາວສ້າງຊາດຕໍ່ການເຄື່ອນໄຫວວຽກງານຂອງສະພາແຫ່ງຊາດຊຶ່ງເປັນຂໍ້ມູນທີ່ດີໃຫ້ແກ່ການປັບປຸງການເຄື່ອນໄຫວວຽກງານລວມຂອງສະພາແຫ່ງຊາດ, ກອງປະຊຸມຍັງໄດ້ພິຈາລະນາ ແລະຮັບຮອງເອົາກົດໝາຍ ຈໍານວນ 11 ສະບັບ ໃນນີ້ມີກົດໝາຍສ້າງໃໝ່ຈໍານວນ 4 ສະບັບ ແລະປັບປຸງ 7 ສະບັບ.

แชร์