ແຮງງານລາວ ໜຶ່ງໃນ 3 ປະເທດທີ່ໄທຕ້ອງການ 4 ແສນຄົນ

ຂ່າວ: ຮສສ

ເພື່ອເປັນການກຽມຄວາມພ້ອມໃນການຮັບມື ແລະຈັດສັນໃຫ້ກັບແຮງງານເຄື່ອນຍ້າຍທັງພາຍໃນ ແລະຕ່າງປະເທດໄລຍະໃໝ່ກໍ່ຄືພາຍຫຼັງທີ່ບັນດາປະເທດອາຊຽນ, ໃນນັ້ນກໍ່ລວມມີປະເທດໄທນຳທີ່ຈະເປີດຮັບແຮງງານຈາກ 3 ສັນຊາດ ຈຳນວນ 4 ແສນຄົນ ໃນເດືອນທັນວາທີ່ຈະມາເຖິງນີ້, ດັ່ງນັ້ນກະຊວງແຮງງານ ແລະສະຫວັດດີການສັງຄົມຈຶ່ງໄດ້ຈັດກອງປະຊຸມຫາລືທົ່ວປະເທດຜ່ານທາງໄກຂຶ້ນໃນວັນທີ 16 ພະຈິກ 2021 ທີ່ເຮືອນຮັບແຂກກະຊວງແຮງງານ.

 ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ) ກ່າວໃນພິທີເປີດກອງປະຊຸມທາງໄກລະຫວ່າງກະຊວງ ແລະພະແນກ ຮສສ ທົ່ວປະເທດກ່ຽວກັບການຮັບມືກັບບັນຫາການເຄື່ອນຍ້າຍແຮງງານພາຍໃນ ແລະໄປຕ່າງປະເທດ ໃນໄລຍະໃໝ່, ຊຶ່ງໃນນັ້ນທ່ານໄດ້ຍົກໃຫ້ເຫັນບາງບັນຫາເຊັ່ນ ວ່າ: ປະຈຸບັນໄດ້ມີຫຼາຍປະເທດກຳລັງກັບເຂົ້າສູ່ພາວະປົກກະຕິແບບໃໝ່ດ້ວຍການເປີດປະເທດຄື: ເປີດການທ່ອງທ່ຽວ, ເປີດການລົງທຶນ, ເປີດການໄປມາຫາສູ່ ຫຼືການຄ້າຂາຍລະຫວ່າງປະເທດ ແລະໜຶ່ງໃນບັນດາປະເທດເຫຼົ່ານັ້ນແມ່ນປະເທດບ້ານໃກ້ເຮືອນຄຽງຂອງເຮົາເຊັ່ນ: ປະເທດໄທກໍ່ໄດ້ມີນະໂຍບາຍ ແລະເປີດປະເທດຢ່າງເປັນທາງການນັບແຕ່ວັນທີ 1 ພຶດສະພາ 2021 ເປັນຕົ້ນມາການເປີດປະເທດຂອງໄທແມ່ນລວມເອົາທັງການມີນະໂຍບາຍຮັບເອົາແຮງງານຕ່າງດ້າວເຂົ້າໄປເຮັດວຽກຢູ່ໄດ້ຄາດຄະເນວ່າຈະເລີ່ມຮັບເອົາແຮງງານທີ່ໄປແບບຖືກຕ້ອງຕາມກົດໝາຍນັບແຕ່ວັນທີ 1 ທັນວາ 2021 ເປັນຕົ້ນໄປ, ຈະດຳເນີນການຂຶ້ນທະບຽນແຮງງານຕ່າງດ້າວທີ່ກຳລັງເຮັດວຽກຢູ່ໄທໃຫ້ສາມາດເຮັດວຽກຕໍ່ໄດ້ຈົນຮອດ ປີ 2023 ແລະຈະປາບປາມແຮງງານຕ່າງດ້າວທີ່ເຂົ້າໄປໃໝ່ຢ່າງເຂັ້ມງວດ.

ຊຶ່ງປະເທດໄທເປັນຈຸດໝາຍປາຍທາງຂອງແຮງງານລາວທີ່ອອກໄປເຮັດວຽກທີ່ຫຼາຍທີ່ສຸດໃນຜ່ານມາ,ລວມທັງໄປຖືກຕ້ອງຕາມກົດໝາຍ ແລະບໍ່ຖືກຕ້ອງຕາມກົດໝາຍ, ໂດຍບົດຮຽນທີ່ລັດຖະບານໄດ້ຮັບຈາກການໄປເຮັດວຽກຢູ່ໄທແບບບໍ່ຖືກຕ້ອງຕາມກົດໝາຍຂອງແຮງງານລາວໃນຜ່ານມາສະແດງໃຫ້ເຫັນວ່າລັດຖະບານຕ້ອງໄດ້ແບກຫາບພາລະອັນໜັກໜ່ວງໃນການເບິ່ງແຍງດູແລ ແລະໃຫ້ການຊ່ວຍເຫຼືອໃນກໍລະນີເກີດເຫດການສຸກເສີນຕ່າງໆ ເຊັ່ນ: ພະຍາດໂຄວິດ-19, ສະນັ້ນ, ຈຶ່ງມີຄວາມ ຈຳເປັນຫຼາຍທີ່ໃນນາມອົງການລັດຄຸ້ມຄອງແຮງງານທັງຂັ້ນສູນກາງ ແລະທ້ອງຖິ່ນຈະໄດ້ຮ່ວມກັນພິຈາລະນາຄືນໃໝ່,ເພາະຜ່ານມາການເກັບກຳຂໍ້ມູນດ້ານແຮງງານຍັງຖືວ່າເຮັດບໍ່ໄດ້ດີ, ການໂຄສະນາເຜີຍແຜ່, ການບັງຄັບໃຊ້ກົດໝາຍ, ລະບຽບການຕ່າງໆດ້ານແຮງງານກໍ່ຍັງແບບເບົາບາງບໍ່ທົ່ວເຖິງ, ການຮ່ວມມືກັບອົງການລັດ, ອົງການຈັດຕັ້ງມະຫາຊົນໃນການເຮັດໜ້າທີ່ດ້ານແຮງງານກໍ່ຍັງບໍ່ເຂັ້ມແຂງ ແລະບັນຫາອື່ນໆທີ່ພວກເຮົາຕ້ອງໄດ້ເອົາໃຈໃສ່ຫຼາຍຂຶ້ນ.

  ພ້ອມນີ້ທ່ານຍັງໄດ້ເນັ້ນຢໍ້າໃຫ້ພະແນກການທ້ອງຖິ່ນຕັ້ງຈຸດການຂຶ້ນຖະບຽນຄວາມຕ້ອງການຂອງແຮງງານເປັນ 3 ເປົ້າໝາຍຄວາມຕ້ອງການແຮງງານທີ່ຢາກເຮັດວຽກຢູ່ພາຍໃນປະເທດຕຳແໜ່ງງານໃດ, ເປົ້າໝາຍແຮງງານທີ່ຕ້ອງການໄປເຮັດວຽກຢູ່ຕ່າງປະເທດຄືນ ແລະເປົ້າໝາຍຢາກຝຶກວິຊາຊີບ, ຝຶກວິຊາໃດຢ່າງຮີບຮ້ອນ ແລະເລັ່ງດ່ວນທີ່ສຸດ.

 ຂະນະທີ່, ທ່ານ ນາງ ອານຸສອນ ຄຳສິງສະຫວັດ ຫົວໜ້າກົມພັດທະນາສີມືແຮງງານ ແລະຈັດຫາງານໄດ້ລາຍງານໃຫ້ຮູ້ວ່າ: ແຕ່ເດືອນມີນາ 2020-ຕຸລາ 2021 ມີແຮງງານລາວທີ່ເຮັດວຽກຢູ່ຕ່າງປະເທດທັງໝົດ 2,24 ແສນຄົນ, ໃນນັ້ນກັບຄືນແລ້ວ 2,15 ແສນຄົນ, ກັບໃນປີ 2020 ຈໍານວນ 1,56 ແສນຄົນ ແລະກັບໃນປີນີ້59.504 ຄົນ, ໄປຖືກຕ້ອງຕາມ MOU ມີ 84.267 ຄົນ, ກັບຄືນປະເທດແລ້ວ 77.255 ຄົນ, ສ່ວນທີ່ເຫຼືອແມ່ນໄປບໍ່ຖືກ 1,39 ແສນຄົນ, ອັດຕາການວ່າງງານມາຮອດກັນຍາ 2021 ແມ່ນ 21,8%, ຄວາມຕ້ອງການແຮງງານໄດ້ 25.254 ຕໍາແໜ່ງ ແລະບັນຈຸເຂົ້າເຮັດວຽກໄດ້ 18.628  ຄົນ, ລັດຖະບານໄທເປີດປະເທດນັບແຕ່ວັນທີ 1 ພະຈິກ ແລະປະກາດກະກຽມອະນຸຍາດນຳເຂົ້າແຮງງານຈາກ 3 ສັນຊາດເລີ່ມເດືອນທັນວານີ້ເປັນຕົ້ນໄປໃນຈຳນວນ 4 ແສນຄົນ.

แชร์