ສຳມະນາ “ການຫຼຸດຜ່ອນໃຊ້ປລາສຕິກ ທີ່ນໍາໃຊ້ເທື່ອດຽວ”

  ໃນອາທິດຜ່ານມາກົມສິ່ງ ແວດລ້ອມ, ກະຊວງຊັບພະຍາກອນທຳມະຊາດ ແລະສິ່ງແວດລ້ອມ (ກຊສ) ຮ່ວມກັບອົງການສະຫະປະຊາຊາດເພື່ອການພັດທະນາປະຈຳ ສປປ ລາວ (UNDP in Lao PDR) ໄດ້ຈັດກອງປະຊຸມສຳມະນາແບບອອນລາຍພາຍໃຕ້ຫົວຂໍ້ “ການຫຼຸດຜ່ອນການນຳໃຊ້ປລາສຕິກທີ່ນໍາໃຊ້ເທື່ອດຽວ” ໂດຍການເປັນປະທານຂອງທ່ານ ອໍລະຫັນ ບຸນຍະພາລົມ, ຮອງຫົວໜ້າກົມສິ່ງແວດລ້ອມ ແລະຂອງທ່ານ ນາງ ຣິຄາດາ ຣີເກີ, ຜູ້ຕາງໜ້າອົງການ UNDP ປະຈຳ ສປປ ລາວ ມີຜູ້ເຂົ້າຮ່ວມຕາງໜ້າຈາກແຕ່ລະກົມ ແລະສະຖາບັນຂອງ ກສຊ.

  ກອງປະຊຸມສຳມະນາຄັ້ງນີ້ຈັດຂຶ້ນເພື່ອຈຸດປະສົງໃນການຫຼຸດຜ່ອນການນຳໃຊ້ປລາສຕິກທີ່ໃຊ້ເທື່ອດຽວ ແລະກໍ່ຍັງເປັນກິດຈະກຳໜຶ່ງໃນການສະເຫຼີມສະຫຼອງວັນສິ່ງ ແວດລ້ອມແຫ່ງຊາດ ແລະວັນສິ່ງແວດລ້ອມໂລກ 2021 ເພື່ອໃຫ້ແກ່ບັນດາຫ້ອງການ, ກົມ ແລະສະຖານບັນພາຍໃນ ກຊສ ຮັບຮູ້ ແລະເຂົ້າໃຈກ່ຽວກັບການຄຸ້ມຄອງ ສິ່ງເສດເຫຼືອທີ່ເປັນປະໂຫຍດໂດຍສະເພາະຈະໄດ້ຮັບຟັງການນຳສະເໜີສະພາບລວມ ແລະບັນຫາ, ປະເພດຂີ້ເຫຍື້ອ, ການຫຼຸດຜ່ອນນຳໃຊ້ຂີ້ເຫຍື້ອປລາສະຕິກ, ວຽກງານດ້ານບໍລິການສິ່ງເສດເຫຼືອ ແລະ ການນຳສະເໜີຜົນຈາກການເຮັດບົດສຳຫຼວດການນໍາໃຊ້ປລາສະຕິກໃນກອງປະຊຸມ ແລະ ການສ້າງຈິດສຳນຶກດ້ານສິ່ງແວດລ້ອມ.

   ໃນກອງປະຊຸມທ່ານ ນາງ ຣິຄາດາ ໄດ້ຍົກໃຫ້ເຫັນບັນຫາສຳຄັນທີ່ແຕ່ລະປະເທດຍົກມາປຶກສາຫາລືກັນລວມເຖິງການກ່ຽວພັນກັນລະຫວ່າງການນຳໃຊ້ນໍ້າມັນເຊື້ອໄຟຟອດຊິລ ແລະການຜະລິດປລາສຕິກ, ບັນຫາຈັດການສິ່ງເສດເຫຼືອໂດຍສະເພາະແມ່ນປລາສຕິກທີ່ນຳໃຊ້ເທື່ອດຽວ.

แชร์