ກະຊວງການເງິນໂຈະບາງລາຍຈ່າຍບໍ່ຈຳເປັນ ສູນກາງ 15% ທ້ອງຖິ່ນ 10%

   ຈາກສະພາບບັນຫາຄວາມຫຍຸ້ງຍາກດ້ານເສດຖະກິດ-ການເງິນຂອງປະເທດເຮົາປະກອບກັບການແຜ່ລະບາດຂອງພະຍາດໂຄວິດ-19 ທີ່ແກ່ເວລາຍາວມາເກືອບປີແລ້ວໄດ້ສົ່ງຜົນກະທົບຢ່າງຫຼີກລ່ຽງບໍ່ໄດ້ຕໍ່ທຸກຂົງເຂດໂດຍສະເພາະແມ່ນແຜນງົບປະມານຂອງລັດຖະບານໂດຍຄາດຄະເນໝົດປີ 2021 ອາດບໍ່ບັນລຸຕາມແຜນການ ຫຼືຈະເກັບໄດ້ທັງໝົດ26.957 ຕື້ກີບ ເທົ່າກັບ 98% ຂອງແຜນການປີຂະນະທີ່ດ້ານລາຍຈ່າຍລັດຈະໄດ້ສືບຕໍ່ສຸມໃສ່ການຈ່າຍທີ່ຈໍາເປັນ ແລະ ບູລິມະສິດຂອງລັດຖະບານໂດຍສະເພາະລາຍຈ່າຍເງິນເດືອນ, ເງິນບໍລິຫານ, ຊໍາລະໜີ້ສິນ, ປ້ອງກັນພະຍາດໂຄວິດ-19 ໃຫ້ສາມາດເຄື່ອນໄຫວໄດ້ເປັນປົກກະຕິ, ພ້ອມທັງຄົ້ນຄວ້າຫຼຸດລາຍຈ່າຍ, ສະລໍລາຍຈ່າຍ ແລະເລື່ອນຈ່າຍບາງຮ່ວງຈໍານວນໜຶ່ງຂອງຂະແໜງການຂັ້ນສູນກາງ 15%, ທ້ອງຖິ່ນ 10% ແລະບາງລາຍຈ່າຍຂອງລັດຖະບານທີ່ເຫັນວ່າບໍ່ຈໍາເປັນ.

ວັນທີ 11 ພະຈິກ 2021 ກະຊວງການເງິນ, ໄດ້ຈັດກອງປະຊຸມທາງໄກຜ່ານລະບົບ VideoCon ference ເພື່ອເປັນການສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 10 ເດືອນ, ແຜນການຄາດຄະເນ 2 ເດືອນທ້າຍປີ ແລະຄາດຄະເນໝົດປີ2021 ຂອງຂະແໜງການເງິນ, ລວມທັງມາດຕະການຄຸ້ມຄອງລາຍຮັບ ແລະລາຍຈ່າຍງົບປະມານແຫ່ງລັດ,

ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີຮອງລັດຖະມົນຕີ, ບັນດາຫົວໜ້າກົມ, ຫົວໜ້າສະຖາບັນ, ລັດວິສາຫະກິດອ້ອມຂ້າງກະຊວງການເງິນ ແລະຫົວໜ້າພະແນກການເງິນ ນວ, ຫົວໜ້າພະແນກການເງິນບັນດາແຂວງເຂົ້າຮ່ວມ.

ໃນກອງປະຊຸມໄດ້ຮັບຟັງການສະເໜີລາຍງານຂອງທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 10 ເດືອນ, ຄາດຄະເນໝົດປີ 2021 ແລະທິດທາງການສ້າງແຜນງົບປະມານແຫ່ງລັດປີ 2022 ຍົກໃຫ້ເຫັນແຜນງົບປະມານແຫ່ງລັດປະຈໍາປີ 2021 ເປັນບາດ ກ້າວເລີ່ມຕົ້ນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະແຜນງົບປະມານແຫ່ງລັດ 5 ປີ (2021-2025), ຊຶ່ງເປັນແຜນທີ່ສະພາບເສດຖະກິດ-ການເງິນຍັງສືບຕໍ່ມີຄວາມຫຍຸ້ງຍາກເນື່ອງຈາກສະພາບ ການຂອງພາກພື້ນ ແລະສາກົນມີການຜັນແປຢ່າງສັບສົນລວມທັງໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19.

ຜ່ານການຈັດຕັ້ງປະຕິບັດແຜນງົບປະມານ 10 ເດືອນກວ່າ, ນັບແຕ່ວັນທີ 1 ມັງກອນຮອດວັນທີ 9 ພະຈິກ 2021 ລາຍຮັບທັງໝົດປະຕິບັດໄດ້ 20.789 ຕື້ກີບເທົ່າກັບ 70% ຂອງແຜນການປີໃນນັ້ນ,ລາຍຮັບສູນກາງ 17.183 ຕື້ກີບ ເທົ່າກັບ 78% ຂອງແຜນການປີ ແລະລາຍຮັບທ້ອງຖິ່ນ 3.605 ຕື້ກີບ ເທົ່າກັບ 65% ຂອງແຜນການປີ.

ດ້ານລາຍຈ່າຍທັງໝົດປະຕິບັດໄດ້ 19.782 ຕື້ກີບເທົ່າກັບ 63% ຂອງແຜນການປີໃນນັ້ນ, ລາຍຈ່າຍສູນກາງປະຕິບັດໄດ້13.273 ຕື້ກີບ ເທົ່າກັບ 58% ຂອງແຜນການປີ ແລະລາຍຈ່າຍທ້ອງຖິ່ນ 6.509 ຕື້ກີບ ເທົ່າກັບ 75% ຂອງແຜນການປີ.

ດ້ານດຸ່ນດ່ຽງສໍາລັບການລະດົມແຫ່ງທຶນເພື່ອມາດຸ່ນດ່ຽງງົບປະມານຈາກພາຍໃນ ແລະຕ່າງປະເທດປະຕິບັດໄດ້ 8.672 ຕື້ກີບ ເທົ່າກັບ 43% ຂອງແຜນການນອກຈາກນັ້ນ, ຍັງມີການທົດແທນຄືນຕົ້ນທຶນເງິນກູ້ຢືມພາຍໃນ ແລະຕ່າງປະທດຢູ່ແຫຼ່ງດຸ່ນດ່ຽງປະຕິບັດໄດ້ 7.411 ຕື້ກີບ ເທົ່າກັບ 45% ຂອງແຜນການປີ.

   ອີງຕາມແຜນການຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດໝົດປີ 2021 ອາດບໍ່ບັນລຸຕາມແຜນການ, ຄາດວ່າຈະສາມາດປະຕິບັດໄດ້ທັງໝົດ 26.957 ຕື້ກີບ ຫຼື ເທົ່າກັບ 98% ຂອງແຜນການປີດ້ານລາຍຈ່າຍຈະໄດ້ສືບຕໍ່ສຸມໃສ່ການຈັດຕັ້ງປະຕິບັດບັນດາລາຍຈ່າຍເພື່ອຮັບປະກັນລາຍຈ່າຍທີ່ຈໍາເປັນ ແລະບຸລິມະສິດຂອງລັດຖະບານ ໂດຍສະເພາະລາຍຈ່າຍເງິນເດືອນ, ເງິນບໍລິຫານ, ຊໍາລະໜີ້ສິນ, ປ້ອງກັນພະຍາດໂຄວິດ-19 ໃຫ້ສາມາດເຄື່ອນໄຫວ ໄດ້ເປັນປົກກະຕິ, ພ້ອມທັງຄົ້ນຄວ້າຫຼຸດລາຍຈ່າຍ,ສະລໍລາຍຈ່າຍ ແລະເລື່ອນຈ່າຍບາງຮ່ວງລາຍຈ່າຍຈໍານວນໜຶ່ງຂອງຂະແໜງການຂັ້ນສູນກາງ 15%, ທ້ອງຖິ່ນ 10% ແລະບາງລາຍຈ່າຍຂອງລັດຖະບານທີ່ເຫັນວ່າບໍ່ຈໍາເປັນ.

ເຖິງຢ່າງໃດກໍຕາມລັດຖະບານໄດ້ຄົ້ນຄວ້າອອກຫຼາຍມາດຕະການເປັນພື້ນຖານໃນການຈັດຕັ້ງຜັນຂະຫຍາຍວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນກໍ່ຄືການເພີ່ມທະວີການຄຸ້ມຄອງ ແລະຕ້ານການຮົ່ວໄຫຂອງລາຍຮັບງົບປະມານແຫ່ງລັດ ແລະຄຸ້ມຄອງລາຍຈ່າຍຕາມນະໂຍບາຍປະຢັດ, ອັດຊ່ອງວ່າງການຮົ່ວໄຫຼຈາກການນໍາເຂົ້ານໍ້າມັນເຊື້ອໄຟ, ດັດສົມບໍລິສັດຂາເຂົ້າ-ຂາອອກ ແລະຕ້ານການຟຸມເຟືອຍແນໃສ່ເພື່ອສູ້ຊົນຈັດຕັ້ງປະຕິບັດແຜນງົບປະມານແຫ່ງລັດໃຫ້ໄດ້ຕາມແຜນທີ່ສະພາແຫ່ງຊາດຮັບຮອງ.

แชร์