6 ບໍລິສັດຈະຢຸດຜະລິດລົດນຳໃຊ້ນໍ້າມັນໃນປີ 2040

6 ບໍລິສັດຜູ້ຜະລິດລົດແຖວໜ້າໃນໂລກຈະຢຸດຜະລິດລົດນຳໃຊ້ນໍ້າມັນພາຍໃນປີ 2040 ຊຶ່ງນັບວ່າເປັນອີກໜຶ່ງຄວາມທ້າທາຍໃນການປ່ຽນໄປສູ່ການປ່ອຍມົນລະມິດເປັນສູນໃນອະນາຄົດ.

   ຕາມຂ່າວຕ່າງປະເທດລາຍງານວ່າ: ບໍລິສັດຜະລິດລົດແຖວໜ້າຂອງໂລກລວມມີບໍລິສັດ Volvo ຂອງຊູແອດ, Ford Motor Co, General Motors Co (GM), MercedesBenz ຂອງ Daimler AG, ບໍລິສັດ BYD ຂອງຈີນ ແລະບໍລິສັດ Jaguar Land Rover ໄດ້ລົງນາມໃນຂໍ້ ຕົກລົງຮ່ວມກັນເພື່ອຢຸດການຜະລິດລົດນຳໃຊ້ນໍ້າມັນພາຍໃນປີ 2040 ເປັນສ່ວນໜຶ່ງໃນຄວາມພະຍາຍາມຫຼຸດຜ່ອນການປ່ອຍອາຍພິດກາກບອນໃນຊັ້ນບັນຍາກາດໂລກ, ຂະນະທີ່ Volvo ໄດ້ໃຫ້ຄຳໝັ້ນສັນຍາວ່າຈະຜະລິດລົດຂັບເຄື່ອນດ້ວຍໄຟຟ້າຢ່າງເຕັມຮູບແບບພາຍໃນປີ 2030.

ຫຼັງຈາກຂໍ້ມູນຈາກອົງການພະລັງງານສາກົນ (IEA) ລະບຸໃນວັນທີ 10 ພະຈິກນີ້ວ່າ: ລົດບັນທຸກ, ລົດໂດຍສານທົ່ວໄປ, ເຮືອ ແລະເຮືອບິນມີອັດຕາສ່ວນການປ່ອຍອາຍພິດກາກບອນປະມານ 1 ໃນ 4 ແລະປະລິມານອາຍພິດກາກບອນສ່ວນໃຫຍ່ມາຈາກລົດທີ່ແລ່ນຢູ່ເທິງຖະໜົນ.

แชร์