3 ພາກສ່ວນ ມອບເຂົ້າສານໃຫ້ແຂວງສາລະວັນ

ຂ່າວ: ທິດລານີ ໂຄດໂຍທາ

   ວັນທີ 10 ພະຈິກ 2021 ທີ່ຫ້ອງວ່າການແຂວງສາລະວັນ, ສະພາການຄ້າ ແລະອຸດສາຫະກຳການຄ້າແຂວງ ແລະສະພາການຄ້າເມືອງສະໝວ້ຍ, ບໍລິສັດຄູນຊັບ ຂາອອກ-ຂາເຂົ້າ ຈຳກັດຜູ້ດຽວ ນຳເອົາເຂົ້າສານໜຽວ ຈຳນວນ 4,7 ໂຕນ ມູນຄ່າ 25 ລ້ານກວ່າກີບ ມອບໃຫ້ອົງການປົກຄອງ ແຂວງສາລະວັນ ເພື່ອປະກອບສ່ວນເຂົ້າໃສ່ວຽກງານປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຊຶ່ງມອບໂດຍທ່ານ ນາງ ວົງຈັນ ພັນ ທະວົງ ຮອງປະທານສະພາການຄ້າ ແລະອຸດສາຫະກຳການຄ້າແຂວງພ້ອມຄະນະ, ຮັບໂດຍທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຫົວໜ້າຄະນະສະເພາະກິດໂຄວິດ-19 ພ້ອມດ້ວຍຄະນະ.

 ເຂົ້າຈຳນວນດັ່ງກ່າວນີ້ແມ່ນຈະໄດ້ສືບຕໍ່ນໍາໄປມອບໃຫ້ພໍ່ແມ່ປະຊາຊົນທີ່ໄດ້ຮັບການຈຳກັດບໍລິເວນຢູ່ເມືອງສະໝ້ວຍຫຼາຍຄອບຄົວໂດຍສະເພາະແມ່ນບ້ານລະຮາງ, ບ້ານເທສະບານເມືອງ, ເນື່ອງຈາກພາຍຫຼັງເມືອງສະໝ້ວຍພົບຜູ້ຕິດເຊື້ອພະຍາດໂຄວິດ-19 ເຮັດໃຫ້ເກີດການແຜ່ລະບາດເປັນວົງກວ້າງ ແລະ ມີການເຂັ້ມງວດການເຂົ້າ-ອອກບ້ານ, ເຮືອນຂອງຜູ້ທີ່ສຳຜັດໃກ້ຊິດ ແລະແນໃສ່ຄວບຄຸມສະພາບການດັ່ງກ່າວໃຫ້ທ່ວງທັນ, ທັງເລັ່ງແກ້ໄຂຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບ.

แชร์