ມອບ-ຮັບ ວຽກງານປຸງແຕ່ງກະສິກຳ ແລະປ່າໄມ້

 ໂດຍອີງຕາມການການຕົກລົງຂອງລັດຖະບານ, ກະຊວງອຸດສາຫະກຳ ແລະການຄ້າໄດ້ມອບວຽກງານປຸງແຕ່ງກະສິກຳ ແລະປ່າໄມ້ ຂັ້ນຕົ້ນ, ເຊິ່ງໃນນີ້ປະກອບມີ: ໂຮງສີເຂົ້າ, ໂຮງງານປຸງແຕ່ງແປ້ງມັນຕົ້ນ, ໂຮງງານປຸງແຕ່ງອ້ອຍ, ໂຮງງານຂ້າສັດ, ໂຮງງານຜະລິດ ອາຫານສັດ, ໂຮງງານຜະລິດວັກຊິນ, ຢາປາບສັດຕູພືດ, ຢາປົວສັດ ແລະເຄື່ອງມືສັດຕະວະແພດ, ໂຮງງານປຸງແຕ່ງໄມ້, ໂຮງເລື່ອຍ, ໂຮງຊອຍ, ໂຮງງານເຟີນີເຈີ, ໂຮງງານປຸງແຕ່ງຢາງພາລາ ແລະເຄື່ອງປ່າຂອງດົງ, ໂຮງງານຜະລິດຝຸ່ນຊີວະພາບ ແລະອົງຄະທາດ, ໂຮງງານຄັດແຍກເມັດພັນ ແລະຫຸ້ມຫໍ່ຜົນຜະລິດກະສິກຳ, ໂຮງງານຜະລິດເຄື່ອງມື ແລະກົນຈັກກະສິກຳໃຫ້ກະຊວງກະສິກຳ ແລະ ປ່າໄມ້ເພື່ອຄຸ້ມຄອງ, ຊຸກຍູ້, ສົ່ງເສີມ ແລະພັດທະນາຕາມດຳລັດ ສະບັບເລກທີ 603/ນຍ ແລະດຳລັດ ສະບັບເລກທີ 604/ນຍ, ລົງວັນທີ 15 ຕຸລາ 2021.

   ໃນວັນທີ 11 ພະຈິກ 2021 ນີ້, ກະຊວງກະສິກຳ ແລະປ່າໄມ້ໄດ້ຈັດພິທີ ມອບ-ຮັບ ວຽກງານດັ່ງກ່າວຂຶ້ນ, ທີ່ສະໂມສອນກະຊວງກະສິກຳ ແລະປ່າໄມ້, ຕາງໜ້າກະຊວງອຸດສາຫະກຳ ແລະການຄ້າເຊັນມອບໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ, ຕາງໜ້າກະຊວງກະສິກຳ ແລະ ປ່າໄມ້ ເຊັນຮັບໂດຍ ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້. ເຊິ່ງມີທ່ານ ຄຳລາວັນ ຈັນທະລາວັນ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ທ່ານ ນາງ ລີວົງ ລາວລີ ຮອງລັດຖະມົນຕີກະຊວງພາຍໃນ,ທ່ານຫົວໜ້າກົມ-ຮອງຫົວໜ້າກົມ,ຫ້ອງການ,ສະຖາບັນຂອງ 2 ກະຊວງເຂົ້າຮ່ວມເປັນສັກຂີພະຍານ.

แชร์