ເຊກອງ ກວດພົບ 25 ຫົວຈ່າຍນ້ຳມັນບໍ່ໄດ້ມາດຖານ

   ລະຫວ່າງວັນທີ 4-5 ແລະວັນທີ 11-12 ມີນາ 2019 ນີ້ ທ່ານ ບຸນປະຄອງ ສິມມາວັດ ຮອງຫົວໜ້າຂະແໜງຊັບສິນທາງປັນຍາ, ມາດຕະຖານ ແລະວັດແທກພະແນກວິທະຍາສາດ ແລະເຕັກໂນໂລຊີແຂວງເຊກອງພ້ອມດ້ວຍວິຊາການ ແລະພາກສ່ວນກ່ຽວຂ້ອງໄດ້ລົງກວດສອບຫົວຈ່າຍນໍ້າມັນເຊື້ອໄຟ ແລະອອກໃບອະນຸຍາດປະຈໍາປີ 2019 ໃຫ້ຜູ້ປະກອບການປໍ້ານໍ້າມັນເຊື້ອໄຟພາຍໃນເມືອງລະມາມ ແລະເມືອງທ່າແຕງ, ທັງນີ້ເພື່ອຄວາມຖືກຕ້ອງ, ຊັດເຈນ ແລະການບໍ່ເອົາປຽບກັນລະຫວ່າງຜູ້ດໍາເນີນທຸລະກິດກັບຜູ້ຊົມໃຊ້.

  ໂດຍການລົງກວດສອບຫົວຈ່າຍນໍ້າມັນເຊື້ອໄຟຢູ່ 2 ເມືອງໃນຄັ້ງນີ້ລວມມີທັງໝົດ 18 ປໍ້າ 46 ຕູ້ 74 ຫົວຈ່າຍ ໃນນີ້ສະເພາະຢູ່ເມືອງລະມາມມີ 10 ປໍ້າ 26 ຕູ້ 42 ຫົວຈ່າຍ ແລະເມືອງທ່າແຕງ 8 ປໍ້າ 20 ຕູ້ 32 ຫົວຈ່າຍ ຊຶ່ງຜ່ານການກວດສອບ ແລະກວດທຽບຕົວຈິງເຫັນວ່າມີຫົວຈ່າຍນໍ້າມັນຜິດປົກກະຕິ ແລະບໍລິມາດບໍ່ຢູ່ໃນເກນມາດຕະຖານການອະນຸຍາດບວກ 5 ລົບ 5 ຈໍານວນທັງໝົດ 25 ຫົວຈ່າຍ ທັງນີ້ກໍເນື່ອງຈາກວ່າບາງຫົວຈ່າຍເປັນເຄື່ອງເກົ່າ ແລະໃຊ້ງານຫຼາຍ, ສະນັ້ນພະນັກງານພະແນກວິທະຍາສາດ ແລະເຕັກໂນໂລຊີຈຶ່ງໄດ້ປັບຄືນໃໝ່ໃຫ້ຢູ່ໃນເກນມາດຕະຖານທີ່ກໍານົດ, ພ້ອມອອກໃບຢັ້ງຢືນ, ຕິດສະຕິກເກີ້ ແລະເຮັດບົດບັນທຶກການກວດສອບຮ່ວມກັບເຈົ້າຂອງປໍ້າເພື່ອເປັນການຢັ້ງຢືນວ່າທາງປໍ້າໄດ້ຜ່ານການກວດສອບ ແລະໄດ້ບໍລິມາດຕາມມາດຕະຖານທີ່ກໍານົດໄວ້ແລ້ວ.

  ທ່ານ ບຸນປະຄອງ ສິມມາວັດ ກ່າວວ່າ: ການລົງກວດສອບຄັ້ງນີ້ກໍເພື່ອຄວາມຖືກຕ້ອງ, ຊັດເຈນ, ການບໍເອົາລັດເອົາປຽບກັນລະຫວ່າງຜູ້ດໍາເນີນທຸລະກິດ ແລະຜູ້ຊົມໃຊ້ເພື່ອເຮັດໃຫ້ສັງຄົມມີຄວາມຍຸຕິທຳ.  ຊຶ່ງລະບຽບການແມ່ນຈະກວດສອບໃນ 3 ເດືອນຕົ້ນປີ, 3 ເດືອນ ຕາມໄຕມາດ ແລະ 6 ເດືອນຕົ້ນປີ ຫຼື 3 ຄັ້ງຕໍ່ປີຕໍ່ໜຶ່ງປໍ້າ, ກວດສອບຕາມການສະເໜີຂອງຜູ້ປະກອບການ ແລະກວດສອບຕາມການສະເໜີຂອງປະຊາຊົນ.

ຂ່າວ: ສັນຍາ 

แชร์