ນວ ຫ້າມ 12 ບ້ານຢູ່ 2 ເມືອງ ຊື້-ຂາຍສິດໃຊ້ທີ່ດິນ

   ນະຄອນຫຼວງວຽງຈັນ ອອກແຈ້ງການເລກທີ 083/ຫວນວ ລົງວັນທີ 10 ພະຈິກ 2021 ໂດຍຫ້າມບໍ່ໃຫ້ປຸກສ້າງ, ຕໍ່ເຕີມ, ຊື້-ຂາຍ, ຊວດຈຳ ຫຼືໂອນຊິດໃຊ້ ທີ່ດິນ,ຈົກໜອງນໍ້າ,ຈົກດິນຂາຍຢູ່ຂອບເຂດໂຄງການພັດທະນາເມືອງທັນສະໄໝ (Smart City) ຊຶ່ງກວມເອົາ 2 ເມືອງ ໄຊເສດຖາ 5 ບ້ານ ແລະຫາດຊາຍຟອງ 7 ບ້ານ.

   ຫ້ອງວ່າການນະຄອນຫຼວງວຽງຈັນ ຈຶ່ງແຈ້ງຮູ້ວ່າ: ຂອບເຂດພື້ນທີ່ໂຄງການພັດທະນາເມືອງທັນສະໄໝ Smart City ທີ່ກົມທີ່ດິນກະຊວງຊັບພະຍາກອນທຳມະຊາດ ແລະສິ່ງແວດລ້ອມໄດ້ຢື້ນຢັ້ງ ແລະຮັບຮອງເຂດສຶກສາຄວາມເປັນໄປໄດ້ຂອງໂຄງການຕາມເອກະສານ ສະບັບເລກທີ 0371 ລົງວັນທີ 4 ກຸມພາ 2021 ຊຶ່ງກວມຢູ່ໃນ 2 ເມືອງຄື: ເມືອງໄຊເສດຖາ ມີຈຳນວນ 5 ບ້ານເຊັ່ນ: ບ້ານຈອມສີ, ບ້ານນາຄວາຍໃຕ້, ບ້ານນາຄວາຍກາງ, ບ້ານນາໂນ ແລະບ້ານນາໄຫ ສ່ວນເມືອງຫາດຊາຍຟອງ 7 ບ້ານ ເຊັ່ນ ບ້ານດົງໂພນແຮ່, ບ້ານຄຳຈະເລີນ, ບ້ານໜອງແປນເໜືອ, ບ້ານໜອງແປນໃຕ້, ບ້ານຊຽງຄວນ, ບ້ານທ່າພະ ແລະບ້ານໜອງພົງ.

   ຊຶ່ງບ້ານຈຳນວນດັ່ງກ່າວມາແມ່ນຈະໄດ້ເຂົ້າຮ່ວມ ແລະ ຄວາມຮ່ວມມືກັບບໍລິສັດໃນການລົງສຳຫຼວດປັກຂອບເຂດພື້ນທີ່ຕົວຈິ່ງຕາມຂໍ້ຕົງລົງຂອງທ່ານເຈົ້າຄອງ ນະຄອນຫຼວງວຽງຈັນ ສະບັບເລກທີ 705/ຈນວ, ລົງວັນທີ 31 ສິງຫາ 2021.

   ຫ້າມບໍ່ໃຫ້ບຸກຄົນ, ນິຕິບຸກຄົນ ແລະການຈັດຕັ້ງຕະຫຼອດຮອດພະນັກງານ, ທະຫານ, ຕຳຫຼວດ ແລະພະນັກງານບ້ານເຂົ້າໄປບຸກລຸກ ຫຼືກະທຳການໃດໆ ຢູ່ໃນຂອບເຂດໂຄງການ 2 ເມືອງດັ່ງກ່າວ ແລະບໍ່ໃຫ້ມີການຕໍ່ເຕີມ, ປຸກສ້າງ, ຊື້-ຂາຍ, ແລກປ່ຽນມອບໂອນສິດໃຊ້, ນຳໃຊ້ທີ່ດິນ, ຊວດຈຳ, ຈົກໜອງນໍ້າ, ຈົກດິນຂາຍ, ທຳການຜະລິດ, ພັດທະນາທີ່ດິນໃດໆຢູ່ໃນຂອບເຂດ, ຫ້າມນາຍບ້ານ ແລະອົງການປົກຄອງຂັ້ນຕ່າງໆທີ່ກ່ຽວຂ້ອງເຊັນໜັງສືອະນຸມັດຫຼືອຳນວຍຄວາມສະດວກໃດໆທີ່ເປັນການລະເມີດຕໍ່ຂໍ້ຫ້າມທີ່ກ່າວມາເທິງ.

   ແນວໃດກໍ່ຕາມສຳລັບແຈ້ງການມອບໃຫ້ 2 ເມືອງລົງເຜີຍແຜ່ແຈ້ງການສະບັບນີ້ໃຫ້ອົງການປົກຄອງບ້ານພາກສ່ວນກ່ຽວຂ້ອງຕະຫຼອດຮອດປະຊາຊົນໃກ້ຄຽງຈັດຕັ້ງປະຕິບັດແຈ້ງການຢ່າງເຂັ້ມງວດ.

แชร์