ກອງປະຊຸມ ຄຄຊ ຄັ້ງທີ III ປະຈຳປີ 2021

   ໃນວັນທີ 10 ພະຈິກຜ່ານມາສຳນັກງານຄະນະກຳມະການຄຸ້ມຄອງຫຼັກຊັບ (ສຄຄຊ) ໄດ້ຈັດກອງປະຊຸມຄະນະກຳມະການຄຸ້ມຄອງຫຼັກຊັບ (ຄຄຊ) ຄັ້ງທີ III ປະຈຳປີ 2021 ຂຶ້ນທີ່ຫ້ອງປະຊຸມ ຊັ້ນ 5 ອາຄານ ສຄຄຊ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ, ປະທານ ຄຄຊ. ໂດຍການເຂົ້າຮ່ວມມີຮອງປະທານ ແລະ ຄຄຊ ພ້ອມດ້ວຍພະນັກງານ ສຄຄຊ ແລະຕະຫຼາດຫຼັກຊັບລາວ (ຕລຊລ) ເຂົ້າຮ່ວມຫຼາຍກວ່າ 20 ກວ່າທ່ານຜ່ານຊອງທາງອອນລາຍ.

   ເພື່ອສືບຕໍ່ ແລະຜັນຂະຫຍາຍວຽກງານຈາກກອງປະຊຸມ ຄຄຊ ຄັ້ງທີ II ປະຈໍາປີ 2021 ທີ່ຜ່ານມາ, ຕ້ອງໄດ້ເອົາໃຈໃສ່ຈັດຕັ້ງປະຕິບັດການເຄື່ອນໄຫວວຽກງານຄຸ້ມຄອງຫຼັກຊັບຢ່າງຕັ້ງໜ້າ. ຜົນສໍາເລັດອັນພົ້ນເດັ່ນແມ່ນໄດ້ສໍາເລັດການຮ່າງຍຸດທະສາດການພັດທະນາຕະຫຼາດທຶນຂອງ ສປປ ລາວ 10 ປີ (2021-2030) ແລະວິໄສທັດຮອດປີ 2035 (ສະບັບປັບປຸງ) ເພື່ອຈະສະເໜີຂໍການຮັບຮອງຈາກກອງປະຊຸມລັດຖະບານພ້ອມທັງສໍາເລັດການສ້າງ ແລະປັບປຸງນິຕິກໍາໃຕ້ກົດໝາຍວ່າດ້ວຍຫຼັກຊັບຈໍານວນໜຶ່ງນອກນັ້ນ, ຄຄຊ ຍັງຕ້ອງໄດ້ສືບຕໍ່ເອົາໃຈໃສ່ຫຼາຍບັນຫາເພື່ອພັດທະນາຕະຫຼາດທຶນລາວໃຫ້ມີປະສິດທິພາບ, ມີຄວາມໜ້າເຊື່ອຖື ແລະມີຄວາມຄຶກຄື້ນກວ່າເກົ່າ.

 ທ່ານ ສຽວສະຫວາດ ທີລະກຸນ ຮອງຫົວໜ້າ ສຄຄຊ ໄດ້ລາຍງານຜົນການຈັດຕັ້ງປະຕິບັດມະຕິກອງປະຊຸມ ຄຄຊ ຄັ້ງທີ II ປີ 2021 ທີ່ຜ່ານມາ; ລາຍງານສະຫຼຸບການເຄື່ອນໄຫວວຽກງານຂອງ ສຄຄຊ ປະຈໍາ 09 ເດືອນ ປີ 2021 ແລະຄາດຄະເນການຈັດຕັ້ງປະຕິບັດໝົດປີ 2021 ແລະ ແຜນປະຈຳປີ 2022; ຄຽງຄູ່ກັນ ນັ້ນ, ທ່ານ ນາງ ສາຍສະໝອນ ຈັນທະຈັກ ຜູ້ອຳນວຍການໃຫຍ່ ຕລຊລ, ກໍ່ໄດ້ລາຍງານສະຫຼຸບສະພາບການເຄື່ອນໄຫວຂອງ ຕລຊລ ປະຈໍາ 09 ເດືອນ ປີ 2021 ແລະແຜນການ 03 ເດືອນທ້າຍປີ 2021 ເພື່ອໃຫ້ທາງ ຄຄຊ ຊາບ ແລະຂໍທິດຊີ້ນໍາໃນການປະຕິບັດວຽກງານຫຼັກຊັບໃນຕໍ່ໜ້າ.

  ກອງປະຊຸມດັ່ງກ່າວໄດ້ດໍາເນີນໄປເປັນເວລາເຄິ່ງວັນ ແລະມີເນື້ອໃນອັນຄົບຖ້ວນບັນດາທ່ານທີ່ເຂົ້າຮ່ວມກອງປະຊຸມໄດ້ສຸມທຸກສະຕິປັນຍາຂອງຕົນເຂົ້າໃນການຄົ້ນຄວ້າ, ປະກອບຄໍາເຫັນຕໍ່ແຕ່ລະເນື້ອໃນຢ່າງລະອຽດ, ຢ່າງກົງໄປກົງມາ ແລະແທດເໝາະກັບສະພາບຄວາມເປັນຈິງເພື່ອໃຫ້ສາມາດນໍາໄປຈັດຕັ້ງປະຕິບັດໄດ້ຢ່າງແທດເໝາະ ແລະມີປະສິດທິພາບສູງບົນພື້ນຖານເພື່ອຜົນປະໂຫຍດລວມຂອງຊາດ.

 ໃນຕອນທ້າຍກອງປະຊຸມ ທ່ານ ສອນໄຊ ສີພັນດອນ ໄດ້ກ່າວເນັ້ນວ່າ: ເພື່ອສືບຕໍ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບໃຫ້ໜັກແໜ້ນເຂັ້ມແຂງກວ່າເກົ່າ, ພາຍຫຼັງສິ້ນສຸດກອງປະຊຸມ ຄຄຊ ຄັ້ງນີ້ແລ້ວຂ້າພະເຈົ້າຂໍມອບໃຫ້ທ່ານຜູ້ວ່າການທະນະຄານແຫ່ງ ສປປ ລາວ, ຮອງ ປະທານ ຄຄຊ ຜູ້ປະຈຳການ ແລະ ສຄຄຊ ຊຶ່ງເປັນກົງຈັກຊ່ວຍວຽກຂອງ ຄຄຊ ໃນການພັດທະນາຕະຫຼາດທຶນຈົ່ງຮີບຮ້ອນປະສານສົມທົບກັບຂະແໜງການກ່ຽວຂ້ອງຕ່າງໆ ເພື່ອຜັນຂະຫຍາຍເນື້ອໃນຈິດໃຈກອງປະຊຸມຄັ້ງນີ້ ເປັນໜ້າວຽກລະອຽດ ແລະຈັດຕັ້ງເຊື່ອມຊຶມໃຫ້ເປັນເອກະພາບກັນ. ພ້ອມທັງ, ຈັດຕັ້ງປະຕິບັດຕາມເນື້ອໃນຈິດໃຈທີ່ກອງປະຊຸມຄັ້ງນີ້ໄດ້ຮັບຮອງເອົາໃຫ້ເປັນຮູບປະທໍາ, ດ້ວຍຄວາມເປັນເຈົ້າການ ແລະ ດ້ວຍຄວາມຮັບຜິດຊອບສູງ. ໃນການຈັດຕັ້ງປະຕິບັດກໍ່ໃຫ້ມີການຕິດຕາມກວດກາ ແລະ ສະຫຼຸບຖອດຖອນບົດຮຽນແຕ່ລະໄລຍະຢ່າງເໝາະສົມ ເພື່ອໃຫ້ການຈັດຕັ້ງປະຕິບັດມີປະສິດທິຜົນສູງ. ຈາກນັ້ນໃຫ້ສະຫຼຸບຕີລາຄາການຈັດຕັ້ງປະຕິບັດດັ່ງກ່າວເພື່ອລາຍງານຕໍ່ກອງປະຊຸມ ຄຄຊ ຄັ້ງຕໍ່ໄປ. ມອບ ໃຫ້ທ່ານ ສອນໄຊ ສິດພະໄຊ, ຜູ້ວ່າການທະນາຄານແຫ່ງ ສປປ ລາວ, ຮອງປະທານ ຄຄຊ ຜູ້ປະຈຳການຊີ້ນໍາໂດຍກົງຕໍ່ການປະຕິບັດໜ້າວຽກດັ່ງກ່າວ.

แชร์