ການຄ້າເສລີ ຈະຊ່ວຍຟື້ນຟູເສດຖະກິດຈາກໂຄວິດ

ລັດຖະມົນຕີການຄ້າ ແລະລັດຖະມົນຕີຕ່າງປະເທດກຸ່ມການຮ່ວມມືທາງເສດຖະກິດໃນພາກພື້ນອາຊີປາຊີຟິກ (APEC) ໄດ້ຕົກລົງໃນກອງປະຊຸມທາງໄກວ່າ: ການຄ້າເສລີ ແລະເສດຖະກິດແບບເປີດຈະຂັບເຄື່ອນເອເປັກໃຫ້ຟື້ນຕົວຈາກການແຜ່ລະບາດຂອງໂຄວິດ-19.

ຕາມຂ່າວຕ່າງປະເທດລາຍງານວ່າ: ພາຍຫຼັງລັດຖະມົນຕີຈາກ 21 ປະເທດສະມາຊິກເອເປັກປະຊຸມທາງໄກ 8-9 ພະຈິກນີ້ກ່ອນຈະມີການຈັດກອງປະຊຸມລະດັບຜູ້ນຳ ໃນວັນທີ 13 ພະຈິກນີ້ ທ່ານ ແດນມຽນ ໂອຄອນເນີ, ລັດຖະມົນຕີການຄ້ານູແວນເຊລັງໃນຖານະເປັນເຈົ້າພາບຖະແຫຼງວ່າ: ປະເດັນສຳຄັນໃນກອງປະຊຸມຄັ້ງນີ້ໄດ້ແກ່ ການສະໝັກໃຈຢຸດການສະໜັບສະໜູນເຊື້ອເພີງຟໍເຊລ, ການຮັບປາກເປີດເສລີພາສີວັກແຊງປ້ອງກັນໂຄວິດ-19 ແລະອຸປະກອນທາງການແພດທີ່ກ່ຽວຂ້ອງລວມ ທັງການຫຼີກລ່ຽງການຕັ້ງອຸປະສັກທາງການຄ້າເພາະການຄ້າເສລີເປັນທຳ ແລະເປີດກວ້າງຈະຊ່ວຍໃຫ້ເສດຖະກິດເອເປັກຫຼຸດພົ້ນຈາກສະຖານະການຂອງການແຜ່ລະບາດເຊື້ອພະຍາດ ແລະຂັບເຄື່ອນການເຕີບໂຕເສດຖະກິດໂລກເຖິງວ່າ: ປະຈຸບັນອາຊີປາຊີຟິກມີຄົນວ່າງງານຫຼາຍກວ່າ 80 ລ້ານຄົນ ແລະເອເປັກຈະບໍ່ຍອມໃຫ້ໃຊ້ນະໂຍບາຍການປົກປ້ອງທາງການຄ້າ.

ນອກຈາກນີ້ຍັງປຶກສາຫາລືການເປີດປະເທດໂດຍບໍ່ເຮັດໃຫ້ເຊື້ອພະຍາດແຜ່ລະບາດ, ການເຮັດໃຫ້ເສດຖະກິດຟື້ນໂຕຢ່າງເທົ່າທຽມກັນ ແລະເດີນໜ້າກ້າວໄປສູ່ ເສດຖະກິດທີ່ບໍ່ມີກາກບອນ.

แชร์