ອົງການກາແດງລາວ ກຽມເຄື່ອງໃຫ້ກາແດງແຂວງນຳໄປຊ່ວຍຜູ້ທຸກຍາກ

   ໃນວັນທີ 9 ພະຈິກ ອົງການກາແດງລາວ ໄດ້ກະກຽມເຄື່ອງຊ່ວຍເຫຼືອໃຫ້ອົງການກາແດງແຂວງວຽງຈັນ ແລະແຂວງບໍລິຄຳໄຊ ເພື່ອນຳໄປຊ່ວຍເຫຼືອປະຊາຊົນຜູ້ທຸກຍາກພາຍໃນແຂວງໂດຍມີພິທີມອບ-ຮັບ ແລະຈັດສົ່ງເຄື່ອງຢູ່ທີ່ສາງກາແດງຫຼັກ 16 ນະຄອນຫຼວງວຽງຈັນ, ກ່າວມອບໂດຍທ່ານ ພູທອນ ເມືອງປາກ ປະທານອົງການ ກາແດງລາວ ແລະກ່າວຮັບໂດຍ ທ່ານ ນາງ ວັນເພັງ ໄຊສົງຄາມ ຫົວໜ້າອົງການກາແດງແຂວງບໍລິຄຳໄຊ ແລະທ່ານ ບຸນເນົາ ພະຈອມພົນ ຫົວໜ້າອົງການກາແດງແຂວງວຽງຈັນ.

 ເຄື່ອງທີ່ຈັດສົ່ງໄປໃນຄັ້ງນີ້, ປະກອບມີ: ເຄື່ອງນຸ່ງຫົ່ມປະສົມປະເພດໂສ້ງ, ເສື້ອ ແລະເກີບໂດຍມອບໃຫ້ອົງການກາແດງແຂວງບໍລິຄຳໄຊຈຳນວນ 150 ແກັດ ໃນນັ້ນ, ມີເຄື່ອງນຸ່ງຫົ່ມປະສົມຈຳນວນ 50 ແກັດ, ເກີບ 100 ແກັດ ແລະມອບໃຫ້ອົງການກາແດງແຂວງວຽງຈັນ 200 ແກັດ, ມີເຄື່ອງນຸ່ງຫົ່ມປະສົມ 100 ແກັດ ແລະເກີບຈຳນວນ 100 ແກັດ, ຊຶ່ງເປັນຜະລິດຕະພັນຂອງຟີລາ (FILA) ແລະໄດ້ຮັບການສະໜັບສະໜູນຈາກກາແດງ ສ.ເກົາຫຼີ ລວມມູນຄ່າ 711 ລ້ານກວ່າກີບ, ທັງນີ້ກໍ່ເພື່ອນຳໄປແຮໄວ້ເພື່ອໃຫ້ການຊ່ວຍເຫຼືອປະຊາຊົນຜູ້ທຸກຍາກພາຍໃນແຂວງໄດ້ຢ່າງທັນເວລາ.

ໂອກາດນີ້, ທ່ານຫົວໜ້າອົງການກາແດງທັງສອງແຂວງກໍ່ໄດ້ສະແດງຄວາມຂອບໃຈມາຍັງຄະນະນຳອົງການກາແດງລາວທີ່ເຫັນໄດ້ເຖິງຄວາມສຳຄັນໃນວຽກງານການຊ່ວຍເຫຼືອບັນເທົາທຸກລົງສູ່ທ້ອງຖິ່ນ, ຊຶ່ງອົງການກາແດງແຂວງວຽງຈັນຈະນຳເອົາເຄື່ອງຊ່ວຍເຫຼືອດັ່ງກ່າວໄປມອບໃຫ້ໂຮງຮຽນກິນ-ນອນຊົນເຜົ່າ ແລະປະຊາຊົນຜູ້ທີ່ທຸກຍາກ ແລະປະສົບໄພພິບັດພາຍໃນແຂວງ, ສ່ວນແຂວງບໍລິຄຳໄຊກໍ່ຈະໄດ້ໄປຊ່ວຍເຫຼືອຜູ້ທຸກຍາກ, ຜູ້ດ້ອຍໂອກາດຢູ່ພາຍໃນແຂວງເຊັ່ນດຽວກັນ.

แชร์