ປູກພືດເປັນສິນຄ້າສ້າງລາຍຮັບເຂົ້າຄອບຄົວ

 ເພື່ອເປັນການສົ່ງເສີມວຽກງານກະສິກຳການປູກພືດເປັນສິນຄ້າຂອງປະຊາຊົນພາຍໃນເມືອງທັງເປັນການສ້າງລາຍໄດ້ໃຫ້ກັບປະຊາຊົນກໍ່ຄືນັກລົງທຶນຂອງຕ່າງ ປະເທດທີ່ມາລົງທຶນເຂົ້າໃສ່ໃນການປູກພືດລະດູແລ້ງໃນວັນທີ 9 ພະຈິກ 2021 ນີ້, ທ່ານ ກອງສີ ວົງສີ ເຈົ້າເມືອງປາກລາຍ, ມີຫ້ອງການສົ່ງເສີມກະສິກຳ ແລະປ່າໄມ້ເມືອງ, ພ້ອມດ້ວຍໜ່ວຍງານທີ່ກ່ຽວຂ້ອງໄດ້ລົງຊຸກຍູ້ວຽກງານການປູກພືດອຸດສາຫະກຳລະດູແລ້ງເປັນສິນຄ້າຢູ່ 2 ບ້ານຄື: ບ້ານແສນພົນ ແລະບ້ານຕາກແດດ ເມືອງປາກລາຍ ແຂວງໄຊຍະບູລີ ໂດຍມີນາຍບ້ານທັງສອງບ້ານຮ່ວມນໍາພາເບິ່ງພື້ນທີ່ທຳການຜະລິດຂອງປະຊາຊົນເຂດດັ່ງກ່າວ.

ທ່ານ ບັນລຸດ ຊາວກະສິກອນ ບ້ານແສນພົນໄດ້ໃຫ້ຮູ້ວ່າ: ການປູກພືດອຸດສາຫະກຳເປັນສິນຄ້າຄອບຄົວຂອງຕົນເອງແມ່ນມີເນື້ອທີ່ທັງໝົດ3,11 ເຮັກຕາ ພືດທີ່ປູກສ່ວນໃຫຍ່ແມ່ນສາລີ ແລະຖົ່ວແດງ, ສາມາດສ້າງລາຍຮັບໃຫ້ແກ່ຄອບຄົວປີໜຶ່ງ 50 ລ້ານກວ່າກີບ, ປະຈຸບັນຄອບຄົວຂອງຂ້າພະເຈົ້າໄດ້ຮັບການຢັ້ງຢືນເປັນຄອບຄົວພັດທະນາ, ຫຼຸດພົ້ນອອກຈາກຄວາມທຸກຍາກມາເປັນຄອບຄົວກຸ້ມຢູ່ກຸ້ມກິນຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນເປັນກ້າວໆ.

ທ່ານ ນາງ ດຳດີ ຍັງໃຫ້ຮູ້ວ່າ: ຄອບຄົວຂອງຕົນມີເນື້ອທີ່ໃນການປູກພືດອຸດສາຫະກໍາເປັນສິນຄ້າທັງໝົດມີ 5 ເຮັກຕາ ໃນນີ້ແມ່ນຈະແບ່ງເປັນໂຊນເພື່ອປູກພືດແຕ່ລະປະເພດເຊັ່ນ: ປູກມັນຕົ້ນ, ສາລີ ແລະຖົ່ວແດງ, ມາຮອດປະຈຸບັນສວນຖົ່ວແດງແມ່ນກຳລັງບົວລະບັດຮັກສາ, ໃສ່ຝຸ່ນ, ເສຍຫຍ້າ, ຂ້າແມງໄມ້, ສ່ວນສວນມັນຕົ້ນ ແລະສາລີແມ່ນເກັບກູ້ຢູ່ຄາດວ່າຈະມີລາຍຮັບຈາກຜົນຜະລິດດັ່ງກ່າວນີ້ 80-90 ລ້ານກວ່າກີບ.

ການຜະລິດລະດູແລ້ງຂອງປະຊາຊົນເມືອງປາກລາຍໃນປີນີ້ແມ່ນເປັນຂະບວນຟົດຟື້ນ ແລະປູກສໍາເລັດ 100% ທັນຕາມລະດູການ, ສໍາລັບການປູກພືດອຸດສາຫະກໍາເປັນສິນຄ້າຂອງປະຊາຊົນໃນຂອບເຂດບ້ານແສນພົນ ແລະບ້ານຕາກແດດພືດທີ່ປະຊາຊົນປູກສ່ວນໃຫຍ່ແມ່ນມັນຕົ້ນ, ສາລີ, ໝາກງາ, ຖົ່ວດິນ, ຖົ່ວແດງ ແລະ ອື່ນໆ, ມາຮອດປະຈຸບັນແມ່ນກໍາລັງບົວລະບັດຮັກສາ, ໃສ່ຝຸ່ນ ແລະເສຍຫຍ້າ-ຂ້າແມງໄມ້.

ການລົງຊຸກຍູ້ການປູກພືດເປັນສິນຄ້າໃນຄັ້ງນີ້ທ່ານ ກອງສີ ວົງສີ ເຈົ້າເມືອງປາກລາຍກໍ່ໄດ້ຊົມເຊີຍຕໍ່ປະຊາຊົນຊາວກະສິກອນທີ່ໄດ້ເອົາໃຈໃສ່ໃນການປູກພືດອຸດສາຫະກຳເປັນສິນຄ້າເພື່ອສົ່ງອອກພ້ອມທັງຮຽກຮ້ອງໃຫ້ປະຊາຊົນຈົ່ງສືກຕໍ່ເອົາໃຈໃສ່ບົວລະບັດຮັກສາ, ໃສ່ຝຸ່ນ, ເສຍຫຍ້າ, ຂ້າແມງໄມ້, ເຝົ້າລະວັງການລະບາດຂອງສັດຕູພືດ ແລະອື່ນໆ ເພື່ອຮັບປະກັນໃຫ້ການຜະລິດດັ່ງກ່າວໄດ້ຮັບໝາກຜົນສູງຕາມແຜນການທີ່ວາງໄວ້ການເຄື່ອນໄຫວດັ່ງກ່າວເພື່ອຊຸກຍູ້ ແລະສົ່ງເສີມຂະບວນການຜະລິດເປັນສິນຄ້າ, ສົ່ງເສີມການສ້າງຈິດສຳນຶກໃຫ້ແກ່ຜູ້ຜະລິດຂອງຊຸມຊົນ ແລະຜູ້ປະກອບການຂະໜາດນ້ອຍ, ກາງໄດ້ເຂົ້າໃຈ ແລະເຫັນໄດ້ຄວາມສຳຄັນຂອງວຽກງານສົ່ງເສີມກະສິກໍາ, ໃນໂອກາດດຽວກັນນີ້ທ່ານຍັງໄດ້ລົງຢ້ຽມຢາມສວນໝາກໂມຂອງບໍລິສັດຄຳເງິນ ແສງຈັນ ແລະ ບໍລິສັດໄຊຍະບູລີຊົນຢວນສິບສອງພັນນາການຄ້າຂາອອກ-ຂາເຂົ້າ ຈຳກັດຜູ້ດຽວ ຕັ້ງຢູ່ບ້ານຕາກແດດ ເມືອງປາກລາຍແຂວງໄຊຍະບູລີຕື່ມອີກ.

แชร์