ເຈົ້າແຂວງຫຼວງນໍ້າທາ ຊຸກຍູ້ວຽກງານການຕ້ານໂຄວິດຢູ່ເມືອງນາແລ

ຂ່າວ: ກອງແກ້ວ ແສນທະວີ

  ໃນວັນທີ 8 ພະຈິກ 2021 ທ່ານ ຄໍາໄຫຼ ສີປະເສີດ ເຈົ້າແຂວງຫຼວງນໍ້າທາ ພ້ອມດ້ວຍທີມງານຂັ້ນແຂວງລົງຊຸກຍູ້ວຽກງານການຕ້ານແລະສະກັດກັນການແຜ່ລະບາດພະຍາດໂຄວິດ-19 ຢູ່ເມືອງນາແລໂດຍມີທ່ານ ບຸນປີໄລປະເສີດ ເຈົ້າເມືອງໆນາແລ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການຮອງຫົວໜ້າຫ້ອງການໃຫ້ການຕ້ອງຮັບ.

   ທ່ານເຈົ້າເມືອງໆນາແລໄດ້ລາຍງານສະພາບການການຈັດຕັ້ງປະຕິບັດການປ້ອງກັນສະກັດກັ້ນແກ້ໄຂການລະບາດຂອງພະຍາດໂຄວິດ-19 ແລະແຜນສືບຕໍ່ຈັດຕັ້ງປະຕິບັດໃນຕໍ່ໜ້າ, ເມືອງນາແລ ແຂວງຫຼວງນໍ້າທາ ເປັນເມືອງພູດອຍກວມ 98% ມີ 3 ຊົນເຜົ່າ, ມີພົນລະເມືອງທັງໜົດ 26.208 ຄົນ, ຍິງ 13.398 ຄົນ, ມີ 58 ບ້ານ, ມີ 4.556 ຫຼັງຄາ, ມີ 5.048 ຄອບຄົວ, ເລີ່ມແຕ່ວັນທີ 28 ສິງຫາ 2021 ມາຮອດປະຈຸບັນເມືອງນາແລ ມີສູນກັກກັ້ນບໍລິເວນຂອງເມືອງມີ 2 ສູນຄື: ສູນມໍຕົ້ນຄອນຈັນ, ສູນມໍສໍເທສະບານເມືອງ, ມີຜູ້ຖືກກັກກັ້ນທັງໝົດ 301 ຄົນ, ຈໍານວນທີ່ຄົບກໍານົດກັກກັນ 14 ວັນກວດບໍ່ພົບເຊື້ອປ່ອຍຕົວອອກ 243 ຄົນ, ປະຈຸບັນຍັງຢູ່ສູນ 58 ຄົນ, ຍິງ 20 ຄົນ, ມີໂຮງໝໍພາກສະໜາມ 2 ແຫ່ງ ຄື: ສະໂມສອນເມືອງ ແລະໂຮງຮຽນປະຖົມວັງມີໄຊກໍາລັງປິ່ນປົວຜູ້ທີ່ຕິດເຊື້ອຢູ່ໂຮງໝໍ 14 ຄົນ, ຍິງ 4 ຄົນ, ຕິດຢູ່ໃນຊຸມຊົນ 13 ຄົນ, ເຊື້ອນໍາເຂົ້າ 1 ຄົນ, ທົ່ວເມືອງມີບ້ານແດງ 8 ບ້ານຄື: ບ້ານນາແລ້ງ, ພູຄາ, ສາຍນໍ້າທິບ, ຄອນຈັນ, ວັງມີໄຊ, ນໍ້າແຫງ, ພູລວງ ແລະບ້ານສາງແຫນ.

   ທ່ານເຈົ້າແຂວງຫຼວງນໍ້າທາໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ເມືອງຍາດມາໄດ້ໃນໄລຍະຜ່ານມາທ່ານຍັງໄດ້ຮຽກຮ້ອງໃຫ້ຄະນະນໍາຂອງເມືອງສືບຕໍ່ປະກາດແຈ້ງການ, ມາດຕະການ, ຂໍ້ກໍານົດກົດລະບຽບຕ່າງໆຂອງຂັ້ນເທິງວາງອອກຕໍ່ການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ພໍ່ແມ່ປະຊາຊົນພາຍໃນເມືອງໃຫ້ທົ່ວເຖິງກັນ, ປຸກລະດົມຜູ້ທີ່ບໍ່ທັນມາສັກຢາຄົບສອງເຂັມມາ, ງົດການອອກຈາກເຮືອນຄົນໃນຫ້າມອອກຄົນນອກຫ້າມເຂົ້າ, ປິດບ້ານ ແຕ່ລະຄອບຄົວຕ້ອງຄຸ້ມຄອງສະມາຊິກຄອບຄົວຂອງຕົນເອງຖ້າບໍ່ມີວຽກຈໍາເປັນຫ້າມອອກຈາກເຮືອນ, ປະຕິບັດຢາງເຂັມງວດຫຼັກການດ້ານການແພດ, ຫຼີກລຽງໄປບ່ອນທີ່ຊຸມຊົນຄົນແອອັດສະຖານທີ່ສຽງ, ຕ້ອງໜັ່ນລ້າງມື, ດ້ວຍສະບູເຈລປະສົມເຫຼົ້າເກົ້າສິບທຸກຄັ້ງພະຍາດນີ້ມັນເຂົ້າມາທາງປາກ,ທາງດັງ, ທາງຕາ, ໄພພິບັດແບບນີ້ຂໍໃຫ້ທຸກຄົນຕ້ອງມີສະຕິລະວັງຕົວສູງຖ້າມີອາການຕ້ອງໄປຫາແພດໝໍ, ບໍ່ຕ້ອງເຊື່ອຖືແບບງົມງວາຍແຕ່ລະຄົນຕ້ອງເປັນເຈົ້າການນໍາກັນຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ເມືອງນາແລໃຫ້ຫຼຸດໜ້ອຍຖອຍລົງ.

 ໃນມື້ດຽວກັນທ່ານເຈົ້າແຂວງຫຼວງນໍ້າທາກໍ່ໄດ້ລົງໂອ້ລົມອົງການຈັດຕັ້ງບ້ານນາແລ້ງທີ່ເປັນບ້ານແດງ ແລະຜູ້ທີ່ຕິດໂຄວິດ-19 ສູນກັກກັ້ນສະໂມສອນເມືອງພ້ອມທັງນໍາເອົາຜ້າອັດປາກອັດດັງ ແລະເຈລລ້າງມືຈໍານວນໜຶ່ງມອບໃຫ້ບ້ານດັ່ງກ່າວນຳອີກ.

แชร์