ກອງປະຊຸມໃຫຍ່ຜູ້ແທນນັກຮົບເກົ່າແຫ່ງຊາດລາວ

ກອງປະຊຸມໃຫຍ່ຜູ້ແທນນັກຮົບເກົ່າແຫ່ງຊາດລາວທົ່ວປະເທດ ຄັ້ງທີ IV ໄດ້ຈັດຂຶ້ນໃນວັນທີ 9 ພະຈິກນີ້ທີ່ສະໂມສອນຫ້ອງວ່າການກະຊວງປ້ອງກັນປະເທດໂດຍເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດ ແຫ່ງ ສ ປປ ລາວ ຊຶ່ງການເປັນປະທານຂອງທ່ານ ພົນເອກ ຈັນ ສະໜອນ ຈັນຍາລາດ ຄະນະບໍລິຫານງານສູນກາງພັກຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ,ມີບັນດາປະທານສະຫະພັນກັນຮົບເກົ່າ,ຮອງປະທານ ສະຫະພັນນັກຮົບເກົ່າຂັ້ນແຂວງ, ນະຄອນຫຼວງ ແລະແຂກຖືກເຊີນເຂົ້າຮ່ວມ.

ກອງປະຊຸມຄັ້ງນີ້, ທ່ານ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວໄດ້ຂຶ້ນລາຍງານສະພາບລວມ ແລະ ຈຸດພິເສດຂອງຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວສະໄໝທີ III ໃນ ໄລຍະ 5 ປີຜ່ານມາວ່າ: ມີທັງຂໍ້ສະດວກທີ່ເອື້ອອຳນວຍ ແລະຂໍ້ຫຍຸ້ງຍາກຫຼາຍປະການຊຶ່ງເປັນຜົນກະທົບພະຍາດອັກເສບປອດຈາກເຊື້ອຈຸລະໂຣກ (ໂຄວິດ-19) ແລະໄພພິບັດທຳມະຊາດທີ່ເກີດຂຶ້ນຊຶ່ງເປັນຜົນກະທົບໂດຍກົງ ແລະທາງອ້ອມຕໍ່ການພັດທະນາເສດຖະກິດ-ສັງຄົມຢູ່ປະເທດເຮົາກໍຄືການນຳພາຂອງຄະນະບໍລິຫານງານສະຫະພັນນັກຮົບເກົ່າຂອງພວກເຮົາ,ແຕ່ໃນຄະນະດຽວກັນນັ້ນຄະນະບໍລິຫານງານສະຫະພັນນັກຮົບເກົ່າແຕ່ລະຂັ້ນໃນຂອບເຂດທົ່ວປະເທດໄດ້ສຸມໃສ່ປະຕິບັດກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ຄັ້ງທີ III ແລະແຜນພັດທະນານັກຮົບເກົ່າຕາມ 4 ແຜນງານ 17 ໂຄງການ ແລະຊຸກຍູ້ຂະບວນການຫັນລົງຫາກຖານຕາມ 4 ເນື້ອໃນ 4 ຄາດໝາຍ, ຊຸກຍູ້ຂະບວນການປະຕິບັດຕາມເນື້ອໃນຂໍ້ແຂ່ງຂັນ 3 ດີ 6 ຮັກສາຂອງນັກຮົບເກົ່າຕິດພັນກັບຂະບວນການແຂ່ງຂັນຮັກຊາດ-ພັດທະນາ.

ຕະຫຼອດໄລຍະ 5 ປີຜ່ານມາໄດ້ມີຜົນສຳເລັດໃນການນຳພາວຽກງານໃນແຕ່ລະດ້ານຄື: ວຽກງານກໍ່ສ້າງພື້ນຖານໂຄງລ່າງ ແລະຊຸກຍູ້ສົ່ງເສີມນັກຮົບເກົ່າທຳການຜະລິດແກ້ໄຂຄວາມທຸກຍາກຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວໄດ້ຍາດແຍ່ງທຶນຮອນນຳພັກ-ລັດຖະບານເພື່ອຂໍງົບປະມານມາປັບປຸງກໍ່ສ້າງພື້ນຖານໂຄງລ່າງຫ້ອງການເຮັດວຽກຊຶ່ງລັດຖະບານໄດ້ອະນຸມັດໂຄງການສໍ່ສ້າງຫ້ອງການສຳນັກງານໃຫຍ່ ແລະເຮືອນຮັບແຂກສຳເລັດ 50,24% ຫໍມູນເຊື້ອ 1 ຫຼັງສຳເລັດ 100%,ຫ້ອງການນັກຮົບເກົ່າຂັ້ນເມືອງໄດ້27 ຫຼັງ,ສຳເລັດ 21 ຫຼັງ ແລະສ້າງເຮືອນໃຫ້ນັກຮົບເກົ່າຜູ້ທຸກຍາກປ່ຽວພອຍ 19 ຫຼັງສຳເລັດ 17 ຫຼັງ,ຄະນະບໍລິຫານງານພວກເຮົາໄດ້ເອົາໃຈໃສ່ປະສານສົມທົບກັບຄະນະພັກ-ອຳນາດການປົກຄອງທ້ອງຖິ່ນ ແລະ ກະຊວງກ່ຽວຂ້ອງຂຶ້ນແຜນສ້າງເສດຖະກິດຄອບຄົວ, ແກ້ໄຂຊີວິດການເປັນຢູ່ລຶບລ້າງຄວາມທຸກຍາກຂອງນັກຮົບເກົ່າ, ປຸກລະດົບຖັນແຖວພະນັກງານນັກຮົບເກົ່າເສີມຂະຫຍາຍມູນເຊື້ອເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ສ້າງກອງທຶນ ແລະສາມາດເຮັດໃຫ້ຄອບຄົວນັກຮົບເກົ່າຜູ້ທຸກຍາກຫຼຸດລົງ ແລະຄອບຄົວຕົວແບບໃນການຜະລິດນັບມື້ນັບເພີ່ມຂຶ້ນ.

ກອງປະຊຸມໃຫຍ່ຜູ້ແທນນັກຮົບເກົ່າແຫ່ງຊາດລາວທົ່ວປະເທດຄັ້ງທີ IV ຍັງໄດ້ຮັບຮອງເອົາທ່ານ ພົນໂທ ແສງນວນ ໄຊຍະລາດເປັນປະທານ ແລະທ່ານ ພົນຈັດຕະວາ ຄຳຫອມ ແສງບົວລົມ, ທ່ານ ພົນຈັດຕະວາ ລຳພອນນົນຈັນທະວົງ, ທ່ານພົນຈັດຕະວາ ຄຳໝັ້ນ ວັນນະວົງ, ທ່ານພົນຈັດຕະວາ ພອນໃຈ ພັນທະວົງ ເປັນຮອງປະທານ,ຮັບຮອງເອົາປະທານກັບຮອງປະທານກວດກາດັ່ງນີ້: ທ່ານ ພົນຈັດຕະວາ ຄຳໝັ້ນ ວັນນະວົງ ເປັນປະທານກວດກາ,ທ່ານພັນເອກ ນາງ ຄຳພູ ສິດທິເສນ ເປັນຮອງປະທານກວດກາ.

แชร์