ທພລ ໃຫ້ບໍລິການທຸລະກຳການເງິນແກ່ໄຟຟ້າ

  ພິທີເຊັນສັນຍາສະໜອງການໃຫ້ບໍລິການທຸລະກຳທາງດ້ານການເງິນລະຫວ່າງທະນາຄານພັດທະນາລາວ (ທພລ) ສາຂາສະຫວັນນະເຂດ ກັບສາຂາ ລັດວິສາຫະກິດໄຟຟ້າລາວແຂວງສະຫວັນນະເຂດ ໄດ້ຈັດຂຶ້ນຢ່າງເປັນທາງການໃນວັນທີ 1 ພະຈິກ 2021, ທີ່ ທພລ ໂດຍການເຂົ້າຮ່ວມເປັນປະທານ ແລະຕາງໜ້າລົງນາມໃນສັນ ຍາຂອງທ່ານ ພົງສະຫວັດ ພົມມະແສງ ຫົວໜ້າ ທພລ ສາຂາສະຫວັນນະເຂດ ແລະທ່ານ ສອນປະສິດ ມາລາວົງ ຮອງຫົວໜ້າສາຂາລັດວິສາຫະກິດໄຟຟ້າລາວ ແຂວງສະຫວັນນະເຂດ ຈາກນີ້ກໍ່ມີຫົວໜ້າຫົວໜ້າຫ້ອງການ, ຫົວໜ້າຂະແໜງທີ່ນອນໃນກົງຈັກການຈັດຕັ້ງຂອງທັງສອງຝ່າຍເຂົ້າຮ່ວມນຳ.
   ທ່ານ ພົງສະຫວັດ ພົມມະແສງ ກໍ່ໄດ້ກ່າວລາຍງານຄວາມເປັນມາຂອງການຕອບສະໜອງການໃຫ້ບໍລິການໂອນເງິນເດືອນ ແລະເຮັດທຸລະກຳທາງດ້ານການເງິນຜ່ານທະນາຄານລະຫວ່າງ ທພລ ກັບລັດວິສາຫະກິດໄຟຟ້າລາວໃນຂອບເຂດທົ່ວປະເທດເວົ້າສະເພາະແມ່ນ ທພລ ສາຂາສະຫວັນນະເຂດ ແລະສາຂາລັດວິສາຫະກິດໄຟຟ້າລາວ ແຂວງສະຫວັນນະເຂດ. ທພລ ປະກອບມີສຳນັກງານໃຫຍ່ທີ່ນະຄອນຫຼວງວຽງຈັນ, ມີ 18 ສາຂາ, 82 ໜ່ວຍບໍລິການ, 14 ໜ່ວຍແລກປ່ຽນ ແລະ 1 ຫ້ອງນັບເງິນ, ມີລະບົບບໍລິການຕູ້ ATM ທັງໝົດ 263 ຕູ້. ສະເພາະສາຂາສະຫວັນນະເຂດປະກອບມີ 7 ໜ່ວຍບໍລິການ, ມີຕູ້ ATM 21 ໜ່ວຍ. ປະຈຸບັນ, ທພລ ພວກເຮົາກຳລັງປັງປຸງບັນດາຜະລິດຕະພັນທັນສະໄໝເປັນຕົ້ນແມ່ນການປັບປຸງນະວັດຕະກຳທາງດ້ານການເງິນເທິງມືຖື (LDB-Trust)ເພື່ອຕອບສະໜອງຜູ້ໃຊ້ບໍລິການ ໃຫ້ມີຄວາມສະດວກ ແລະງ່າຍຕໍ່ການນຳໃຊ້, ປັບປຸງລະບົບເຮັດທຸລະກຳທາງການເງິນສຳລັບຫ້ອງການ-ອົງກອນ ຕ່າງໆ (LDB-Ebank) ລະບົບດັ່ງກ່າວ ຈະຊ່ວຍໃຫ້ຫ້ອງການບໍລິການຈັດການຄຸ້ມຄອງ ແລະ ດຳເນີນການທຸລະກຳທາງດ້ານການເງິນດ້ວຍຕົນເອງຢ່າງປອດໄພ ແລະ ສາມາດກວດສອບຜົນການດຳເນີນການໄດ້.
   ສະເພາະຂອບເຂດການຮ່ວມມືລະຫວ່າງສາຂາລັດວິສາຫະກິດໄຟາລາວ ແຂວງສະຫວັນນະເຂດ ແລະ ທພລ ໃນຜ່ານມາແມ່ນເປັນການຮ່ວມມືທີ່ດີຕະຫຼອດມາເປັນຕົ້ນ: ທພລ ໄດ້ສະໜອງການໃຫ້ບໍລິການຮັບເງິນສົດຮອດສະຖານທີ່, ການຊຳລະໃບບິນໄຟຟ້າຜ່ານຊ່ອງທາງຕ່າງໆ ເປັນຕົ້ນ LDB Trust, LDB-Wallet, ATM, Teller ໃນນີ້ສຳລັບການຮ່ວມມືໃນການຕອບສະໜອງການໃຫ້ບໍລິການໂອນເງິນເດືອນ ແລະທຸລະກຳທາງດ້ານການເງິນຂອງແຂວງສະຫວັນນະເຂດພວກເຮົາ ແມ່ນເປັນ ໄປຕາມຍຸດທະສາດການຮ່ວມມືລະຫວ່າງ ທພລ ກັບລັດວິສາຫະກິດໄຟຟ້າລາວ ແລະເປັນການປະຕິບັດຕາມສັນຍາ ເລກທີ 4579/ທພລ, ລົງວັນທີ 30 ກັນຍາ 2021 ທີ່ຜູ້ບໍລິຫານລະດັບສູງຂອງທັງ 2 ຝ່າຍໄດ້ລົງນາມຮ່ວມກັນ.
  ໂອກາດນີ້, ທ່ານ ພົງສະຫວັດ ພົມມະແສງ ແລະທ່ານ ສອນປະດິດ ມາລາວົງ ກໍ່ໄດ້ຕາງໜ້າໃຫ້ ທພລ ສາຂາສະຫວັນນະເຂດ ແລະສາຂາລັດວິສາຫະກິດໄຟຟ້າລາວແຂວງສະຫວັນນະເຂດລົງນາມໃນສັນຍາໃນຄັ້ງນີ້ໂດຍຊ້ອງໜ້າພະນັກງານຂອງທັງສອງຝ່າຍ.

แชร์