ສຳເລັດ 60% ບຸກເບີກເນື້ອທີ່ທຳການຜະລິດຜູ້ປະສົບໄພສະໜາມໄຊ

  ໃນວັນທີ 12 ມີນາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີທັງເປັນປະທານຄະນະສະເພາະກິດແກ້ໄຂໄພພິບັດລະດັບຊາດພ້ອມດ້ວຍຄະນະນຳ ຂັ້ນສູງຂອງແຂວງອັດຕະປື ໄດ້ລົງຕິດຕາມ, ຊຸກຍູ້, ກວດກາການຈັດຕັ້ງປະຕິບັດວຽກງານໂຄງການຟື້ນຟູໄຟພິບັດຢູ່ 4 ຈຸດຕັ້ງບ້ານໃໝ່ຂອງເມືອງສະໜາມໄຊ ຈຳນວນ 9 ເຂດ, ເນື້້ອທີ່ທັງໝົດ 2, 1 ພັນເຮັກຕາ, ໃນນັ້ນ,ຈຸດຫີນລາດ 510,13 ເຮັກຕາ,ຈຸດທ່າແສງຈັນມີ 138,95 ເຮັກຕາ,ຈຸດດົງບາກ 1,02 ພັນເຮັກຕາ, ຈຸດສະໝອງໃຕ້ 468,09 ເຮັກຕາ.

  ພ້ອມກັນນັ້ນ, ທ່ານຮອງນາຍົກລັດຖະມົນຕີຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດຈາກພາກສ່ວນກ່ຽວຂ້ອງ ແລະປະຊາຊົນກ່ຽວກັບຂໍ້ສະ ດວກ, ຫຍຸ້ງຍາກວິຖີການດຳລົງຊີວິດທຳມາຫາກິນ, ການສຶກສາຂອງນ້ອງນ້ອຍນັກຮຽນ, ການຮັກສາສຸຂະອະນາໄມ ແລະອື່ນໆ.

  ນອກນີ້ຍັງລົງຕິດຕາມກວດກາການພັດທະນາຂອງວຽກບຸກເບີກເນື້ອທີ່ທຳການຜະລິດຂອງປະຊາຊົນ, ວຽກງານຈັດສັນທີ່ພັກຊົ່ວຄາວ ແລະຖາວອນ, ວຽກ ງານການຄຸ້ມຄອງ-ບໍລິຫານສູນ, ວຽກງານປະເມີນຜົນກະທົບສິ່ງແວດລ້ອມ ແລະ ການຊົດເຊີຍຜົນເສຍຫາຍ ແລະວຽກພື້ນຟູໄລຍະສັ້ນ,ໄລຍະກາງ,ໄລຍະຍາວ ມາຮອດປັດຈຸບັນມີທ່າອ່ຽງດີຂຶ້ນຫລາຍໂດຍສະເພາະການບຸກເບີກເນື້້ອທີ່ທຳການຜະລິດໄດ້ 60% ເພື່ອຮັບປະກັນກັບລະດູການຜະລິດໃນປີນີ້, ບຸກເບີກເນື້ອທີ່ປຸກສ້າງເຮືອນຖາວອນສໍາເລັດ 100% ແລະວຽກອື່ນໆໄດ້ສຳເລັດເປັນກ້າວໆ.

    ທ່ານ ສອນໄຊ ສີພັນດອນ ຍັງໄດ້ຮຽກຮ້ອງໃຫ້ປະຊາຊົນຈົ່ງເພີ່ມທະວີຄວາມເອົາໃຈໃສໃນການລົງຊີວິດດ້ວຍຈິດໃຈທີ່ແຂັ້ມແຂງ, ຢູ່ຮ່ວມກັນໃຫ້ມີຄວາມສາມັກຄີຮັກແພງ-ຊ່ວຍເຫຼືອເຊິ່ງກັນ ແລະກັນ ແລະພ້ອມກັນອອກແຮງເພີ່ມພູນຜະລິດຜົນສ້າງວຽກເຮັດງານທຳໃຫ້ຄອບຄົວມີຢູ່ກິນ, ໃຫ້ມີສະຕິເຝົ້າລະວັງການແຜ່ລະບາດຂອງພະຍາດໄຂ້ຍຸງລາຍ, ນອນໃນມຸ້ງ-ດື່ມນໍ້າຕົ້ມ ແລະ ເອົາໃຈໃສ່ປະຕິບັດບັນດາມະຕິ; ຄໍາສັ່ງຂອງຂັ້ນເທິງວາງອອກຢ່າງເຂັ້ມງວດ.

ຂ່າວ: ຊິບປະໄຊ     

แชร์