ເມືອງງາ ກຽມພັດທະນາ 5 ແຫຼ່ງທ່ອງທ່ຽວ

ຂ່າວ: ແສງອາທິດ
ເພື່ອເປັນການກຽມຄວາມພ້ອມຕ້ອນຮັບນັກທ່ອງທ່ຽວທີ່ຈະເຂົ້າມາທ່ຽວໃນແຂວງອຸດົມໄຊ ເວົ້າລວມເວົ້າສະເພາະກໍ່ຄືເມືອງງາ ແຂວງອຸດົມໄຊ ໃຫ້ມີຄວາມພ້ອມໃນການຕອນຮັບນັກທ່ອງທ່ຽວໃນອະນາຄົດ, ຊຶ່ງເມືອງງາກໍ່ມີທ່າແຮງໃນການພັດທະນາແຫຼ່ງທ່ອງທ່ຽວຫຼາຍແຫ່ງ ແລະອີກຢ່າງໜຶ່ງເມືອງງາ ກໍ່ເປັນເມືອງໜຶ່ງທີ່ເສັ້ນທາງລົດໄຟແລ່ນຜ່ານມີສະຖານີລົດໄຟທີ່ໃຫຍ່ສະນັ້ນຈຶ່ງມີຄວາມສະດວກຫຼາຍທີ່ນັກທ່ອງທ່ຽວຈະມາທ່ຽວໃນເມືອງງາໃນຕໍ່ໜ້າ. ດັ່ງນັ້ນພະແນກ ຖວທ ແຂວງອຸດົມໄຊ ໂດຍສະເພາະແມ່ນຂະແໜງທ່ອງທ່ຽວຈຶ່ງໄດ້ສົມທົບກັບເມືອງເພື່ອສຳຫຼວດວາງແຜນການພັດທະນາແຫຼ່ງທ່ອງທ່ຽວໃນ ເມືອງງາ ຈຳນວນ 5 ໂຄງການ ເພື່ອຈະສ້າງໃຫ້ເປັນເມືອງທ່ອງທ່ຽວທາງດ້ານທຳມະຊາດ ແລະ ຊີວິດວັດທະນະທຳຊົນ ເຜົ່າຕາມຝັ່ງແມ່ນໍ້າຂອງເພື່ອເຊື່ອມຈອດການທ່ອງທ່ຽວລະຫວ່າງປາກແບງ, ບໍ່ແກ້ວ ແລະ ຫຼວງພະບາງຕິດພັນກັບການຊຸກຍູ້ສົ່ງເສີມວັດທະນະທຳຮີດຄອງປະເພນີຂອງປະຊົນບັນດາເຜົ່າໃນທົ່ວເມືອງ ແລະອື່ນໆ.


    ມີໂຄງການດັ່ງນີ້: 1 ສໍາຫຼວດ ແລະພັດທະນາໜອງລົ່ມບ້ານກອນຖ່ອຍໃຫ້ເປັນແຫຼ່ງທ່ອງທ່ຽວທາງທຳມະຊາດຕິດພັນກັບວິຖີຊີວິດຊົນເຜົ່າຂະມຸ (ຂັ້ນເມືອງ ), 2 ພັດທະນາການທ່ອງທ່ຽວປ່າຊາ 1000 ປີ, ເຂດພູຫວດ ແລະສະຖານທີ່ພັກແຮມທີ່ເປັນເອກະລັກ (ຂັ້ນແຂວງ ), 3 ອະນຸລັກສັດນໍ້າສັດປ່າສິ່ງແວດລ້ອມໜ້າເຂື່ອນນໍ້າງາ 2 ພັດທະນາ ເຂດໜ້າເຄື່ອນໃຫ້ເປັນແຫຼ່ງທ່ອງທ່ຽວດ້ານການປະມົງ (ຂັ້ນເມືອງ), 4 ສຳຫຼວດສ້າງລາຍການທ່ອງທ່ຽວປ່າຊາທໍາມະຊາດຕິດພັນກັບ


ວິຖີຊີວິດຊາວບ້ານ ແລະລາຍການທ່ອງທ່ຽວຂີ່ເຮືອລ່ອງແພຊົມທໍາມະຊາດໜ້າເຂື່ອນນໍ້າງາ (ຂັ້ນເມືອງ ), 5 ສ້າງສວນສາທາລະນະໝາກພ້າວ 1.000 ຕົ້ນ, ປູກດອກສະບັນງາໃຫ້ເປັນເອກະລັກຕາມສະໂລແກຼນ ເຂົ້ານາຊານ ໝາກພ້າວ ບ້ານຖິ່ນ ກິນເຫຼົ້າຂາວພື້ນບ້ານດອກສະບັນງາຫອມຫວນ (ຂັ້ນເມືອງ), ຊຶ່ງບັນດາໂຄງການດັ່ງກ່າວແມ່ນເປັນແຜນການພັດທະນາຂອງພະແນກ ຖວທ ຮ່ວມກັບເມືອງໃນຊຸມປີ 2021-2025 ປະຈຸບັນບາງສະຖານທ່ອງທ່ຽວທ່ຽວກໍໄດ້ພັດທະນາບາງສ່ວນແລ້ວໂດຍສະເພາະປ່າຊາພັນປີ, ການອະນຸລັກສັດນໍ້າສັດປ່າເຂດໜ້າເຂື່ອນໄຟຟ້ານໍ້າງາ ແລະອື່ນໆຈຳນວນໜຶ່ງ.

แชร์