ເມືອງແບງ ກໍານົດລາຄາສິນຄ້າຢູ່ຕະຫຼາດ

  ໃນວັນທີ 2 ພະຈິກຜ່ານ ມາທ່ານ ຄໍາແດງ ສີອໍາໄພ ຮັກສາການຫົວໜ້າຫ້ອງການອຸດສາຫະກໍາ ແລະການຄ້າເມືອງແບງ ແຂວງອຸດົມໄຊ ພ້ອມດ້ວຍທີມງານໄດ້ລົງຕິດຕາມລາຄາສິນຄ້າຢູ່ຕະຫຼາດ ເມືອງແບງ ໃນການລົງເຄື່ອນໄຫວຄັ້ງນີ້ເພື່ອປະຕິບັດຕາມຂໍ້ຕົກລົງຂອງທ່ານເຈົ້າເມືອງໆ ແບງວ່າດ້ວຍການກໍານົດລາຄາຂາຍສົ່ງຂາຍຍ່ອຍປະເພດຊີ້ນ, ກະດູກ ແລະສ່ວນຕ່າງໆຂອງສັດຢູ່ພາຍໃນເມືອງແບງໃຫ້ຢູ່ໃນເກນທີ່ຮັບໄດ້ທັງຜູ້ຂາຍ ແລະຜູ້ຊື້.

  ທ່ານ ຄໍາແດງ ສີອໍາໄພ ໄດ້ໃຫ້ຮູ້ວ່າ: ເພື່ອແກ້ໄຂບັນຫາຄວາມຫຍຸ້ງຍາກຂອງເສດຖະກິດເຮັດໃຫ້ສິນຄ້າມີລາຄາແພງ ແລະປະຕິບັດຕາມວາລະແຫ່ງຊາດໃນການສຸມໃສ່ການຜະລິດ ແລະສະໜອງສິນຄ້າພາຍໃນໃຫ້ພຽງພໍຫ້ອງການອຸດສາຫະກໍາ ແລະການຄ້າເມືອງແບງໄດ້ສົມທົບກັບຜູ້ປະກອບການເພື່ອກໍານົດໂຄງປະກອບລາຄາສິນຄ້າປະເພດສະບຽງອາຫານໃຫ້ມີຄວາມເໝາະສົມ.

  ການລົງເຄື່ອນໄຫວຂອງຄະນະທີມງານຄັ້ງນີ້ແມ່ນໄດ້ນໍາເອົາແຜ່ນປ້າຍກໍານົດລາຄາປະເພດຊີ້ນ, ກະດູກ ແລະສ່ວນຕ່າງໆຂອງສັດໄປຕິດຢູ່ຕາມຕະຫຼາດພ້ອມນີ້ຍັງມີມາດຕະການປັບໃໝຕໍ່ຜູ້ລະເມີດຂຶ້ນລາຄາ, ສວຍໂອກາດກັກຕຸ້ນລາຄາສິນຄ້າໂດຍບໍ່ໄດ້ຮັບອະນຸຍາດນອກນີ້ຍັງມີຂໍ້ຫ້າມອື່ນໆທີ່ເປັນປະໂຫຍດໃຫ້ແກ່ຜູ້ບໍລິການ ແລະຜູ້ບໍລິໂພກພ້ອມທັງໄດ້ສຸ່ມກວດຕາຊີງຢູ່ຕາມບັນດາຮ້ານຂາຍຊີ້ນ ແລະພືດຜັກອື່ນໆໃຫ້ຢູ່ໃນເກນມາດຕະຖານ.

-----

ໜັງສືພິມ ເສດຖະກິດ-ສັງຄົມ

แชร์