ຮ່ວມມືດ້ານວິຊາການໃຫ້ບໍລິສັດຂົງເຂດຫຼັກຊັບ

   ໃນທ້າຍ​ອາ​ທິດ​ຜ່ານ​ມານີ້ທີ່ສໍານັກງານຄະນະກໍາມະການຄຸ້ມຄອງຫຼັກຊັບ ນະ​ຄອນຫຼວງວຽງ​ຈັນ ໄດ້ຈັດພິທີເຊັນບົດບັນທຶກຄວາມເຂົ້າໃຈສອງຝ່າຍລະຫວ່າງສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ກັບສະພາວິຊາຊີບນັກບັນຊີ ແລະນັກກວດສອບ (ສວ-ບກລ) ຮ່ວມມືດ້ານວິຊາການສ້າງພື້ນຖານຂີດຄວາມສາມາດໃຫ້ບໍລິສັດໃນຂົງເຂດຫຼັກຊັບກ່ຽວກັບການຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນ (IFRS) ທີ່ໄດ້ກໍານົດໃນກົດໝາຍວ່າດ້ວຍການບັນຊີ.
ການຕາງໜ້າເຊັນບົດບັນທຶກຄັ້ງ​ນີ້, ໂດຍທ່ານ ສຽວສະຫວາດ ທິລະກຸນ ຮອງຫົວໜ້າ ສຄຄຊ ແລະ ທ່ານ ນາງ ພິລານີ ພິດສະໄໝ ປະທານ ສວ-ບກລ, ມີທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ຜູ້ຊີ້ນຳວຽກງານສຳນັກງານຄະນະ ກຳມະການຄຸ້ມຄອງຫຼັກຊັບ, ​ມີພາກສ່ວນ ທີ່ກ່ຽວຂ້ອງ​ຈາກກະ​ຊວງ​ການ​ເງິນ, ທະ​ນາ​ຄານ​ແຫ່ງ ສ​ປ​ປ​ ລາວ ແລະ ຕາງ​ໜ້າ​ ຈາກທະ​ນາ​ຄານ​ໂລກເຂົ້າຮ່ວມ.
    ການຮ່ວມມືດ້ານວິຊາການດັ່ງກ່າວ, ແມ່ນເນັ້ນໃສ່ກ່ຽວກັບການຊຸກຍູ້ ແລະສົ່ງເສີມກ່ຽວກັບການຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນ (IFRS) ທີ່ໄດ້ກໍານົດໃນກົດໝາຍວ່າດ້ວຍການບັນຊີ ໃຫ້ວິສາຫະກິດທີ່ຮັບໃຊ້ຜົນປະໂຫຍດສາທາລະນະຊຶ່ງລວມມີບໍລິສັດຈົດທະບຽນ, ບໍລິສັດຫຼັກຊັບ, ສະຖາບັນການເງິນ, ທະນາຄານທຸລະກິດ, ບໍລິສັດ ປະກັນໄພ ແລະອື່ນໆ ຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນ, ເພາະເປັນມາດຕະຖານສາກົນທີ່ນໍາໃຊ້ກັນໃນຫຼາຍກວ່າ 140 ປະເທດທົ່ວໂລກ ຊຶ່ງຖ້ານໍາໃຊ້ມາດຕະຖານດຽວກັນຈະຊ່ວຍໃຫ້ເຂົ້າໃຈງ່າຍ, ສ້າງຄວາມໂປ່ງໃສ ແລະຄວາມເຊື້ອໝັ້ນໃຫ້ນັກລົງທຶນຕ່າງປະເທດມາ ລົງທຶນຢູ່ ສປປ ລາວ ນຳອີກດ້ວຍ.


(ຂ່າວ-ພາບ: ກະ​ຊວງ​ການ​ເງິນ)

แชร์