ຄຳມ່ວນ ຫາລືກະກຽມຄວາມພ້ອມເຜີຍແຜ່ບັນຫາຢາເສບຕິດ

ໃນວັນທີ 4 ພະຈິກ 2021 ຢູ່ທີ່ຫ້ອງປະຊຸມກອງບັນຊາການ ປກສ ແຂວງຄຳມ່ວນ ໄດ້ມີການປຶກສາຫາລືເພື່ອກະກຽມຄວາມພ້ອມໃຫ້ແກ່ກອງປະຊຸມເຜີຍແຜ່ເອກະສານວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023 ) ໂດຍການເຂົ້າຮ່ວມຂອງ ທ່ານ ພັອ ແກ່ນຈັນ ພົມມະຈັກ ຮອງກົມໃຫຍ່ຕໍາຫຼວດກະຊວງ ປກສ ຄະນະອານຸກຳມະການກອງເລຂາການຈັດຕັ້ງເຜີຍແຜ່ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ( 2021-2023 ) ພ້ອມດ້ວຍຄະນະ, ມີທ່ານຫົວໜ້າ-ຮອງຫົວໜ້າກອງບັນຊາການ ປກສ ແຂວງຄຳມ່ວນເຂົ້າຮ່ວມ.
ໃນກອງປະຊຸມບັນດາທ່ານຜູ້ເຂົ້າຮ່ວມແມ່ນໄດ້ພ້ອມກັນຄົ້ນຄວ້າປຶກສາຫາລືຫຼາຍວຽກງານທີ່ສໍາຄັນເປັນຕົ້ນແມ່ນດ້ານວຽກງານຕ້ານ ແລະປ້ອງກັນພະຍາດໂຄວິດ-19 ເພື່ອໃຫ້ສອດຄ່ອງກັບ ມາດຕະການປ້ອງກັນເຊື້ອພະຍາດໂຄວິດ-19 ທີ່ທາງຄະນະສະເພາະກິດໄດ້ກໍານົດໄວ້. ນອກນີ້ກໍ່ເພື່ອສ້າງເງື່ອນໄຂ ແລະອໍານວຍຄວາມສະດວກໃຫ້ແກ່ຄະນະນຳກະຊວງໃນການເຄື່ອນໄຫວການຈັດຕັ້ງເຜີຍແຜ່ເອກະສານກ່ຽວກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ 2021 - 2023 ທີ່ຈະຈັດຂຶ້ນໃນວັນທີ 5 ພະຈິກ 2021 ນີ້ ໃຫ້ມີຄວາມພ້ອມໃນການກະກຽມທາງດ້ານສະຖານທີ່, ດ້ານເນື້ອໃນໃຫ້ມີຜົນສໍາເລັດຢ່າງຈົບງາມ.

แชร์