ເຜີຍແຜ່ຂໍ້ມູນກ່ຽວກັບພະຍາດໂຄວິດໃຫ້ສື່ມວນຊົນລາວ

   ກອງປະຊຸມເຜີຍແຜ່ບາງຂໍ້ມູນກ່ຽວກັບພະຍາດໂຄວິດ-19 ໃຫ້ແກ່ສື່ມວນຊົນລາວເພື່ອນຳໄປເຜີຍແຜ່ໃຫ້ສັງຄົມຮັບຮູ້ໄດ້ຈັດຂຶ້ນໃນວັນທີ 5 ພະຈິກຜ່ານມາທີ່ນະຄອນຫຼວງວຽງຈັນໂດຍການເປັນປະທານຂອງທ່ານ ວິສິດ ຄໍາລືຊາ ຫົວໜ້າສູນສື່ສານເພື່ອສຸຂະພາບ ແລະສຸຂະສຶກສາກະຊວງສາທາລະນະສຸກພ້ອມດ້ວຍພາກສ່ວນ ກ່ຽວຂ້ອງ ແລະສື່ມວນຊົນລາວເຂົ້າຮ່ວມ.


   ຈຸດປະສົງກອງປະຊຸມເພື່ອອັບເດດຂໍ້ມູນໃຫ້ແກ່ສື່ມວນຊົນກ່ຽວກັບສະຖານະການຂອງພະຍາດໂຄວິດ-19; ປຶກສາຫາລືກ່ຽວ ກັບກຸ່ມເປົ້າໝາຍໃນການສັກວັກແຊງ ແລະອັດຕາການສັກວັກຊິນທີ່ຕໍ່າໃນແຕ່ລະແຂວງ ແລະວິທີການທີ່ສື່ມວນຊົນຈະຊ່ວຍຫຼຸດຜ່ອນ ຫຼືຢຸດການແຜ່ເຊື້ອດ້ວຍການນໍາໃຊ້ຂໍ້ມູນຂ່າວສານ.
ໃນກອງປະຊຸມຄັ້ງນີ້ຜູ້ເຂົ້າຮ່ວມໄດ້ຮັບຟັງການປັບປ່ຽນມາດ ຕະການທາງສາທາລະນະສຸກ ແລະສັງຄົມ; ສະຖານະການໂຄວິດ-19 ໃນ ສປປ ລາວ, ຄວາມສ່ຽງຂອງ ການລະບາດ ແລະມາດຕະການປ້ອງກັນ; ອັບເດດການສັກວັກແຊງ ສປປ ລາວ, ຂໍ້ມູນສໍາຄັນກ່ຽວກັບວັກແຊງກັນພະຍາດໂຄວິດ-19 ແລະຄໍາແນະນໍາຈາກອົງການອະນາໄມໂລກ.
   ໃນໂອກາດດັ່ງກ່າວ, ທ່ານ ວິສິດ ຄຳລືຊາ ໄດ້ໃຫ້ຮູ້ວ່າ: ການສັກວັກແຊງບໍ່ແມ່ນການປ້ອງກັນພະຍາດໂຄວິດ-19 ໂດຍກົງ ແຕ່ຫາກປະຊາຊົນໄດ້ຮັບວັກແຊງຄົບແລ້ວ ແມ່ນຈະສາມາດຫຼຸດອັດຕາຄວາມຮຸນແຮງເວລາຕິດເຊື້ອໂຄວິດ-19 ໄດ້ເພື່ອບໍ່ໃຫ້ເຈັບໜັກ ຫຼືເສຍຊີວິດ ແລະຈະເຮັດໃຫ້ອັດຕາການແຜ່ເຊື້ອຫຼຸດລົງອີກດ້ວຍຊຶ່ງລັດຖະ ບານຂອງ ສປປ ລາວ ແມ່ນເລັ່ງສັກວັກແຊງໃຫ້ປະຊາຊົນເພື່ອບັນລຸເປົ້າໝາຍການສັກຢາກັນພະຍາດໂຄວິດ-19 ໃຫ້ໄດ້ 50% ຂອງປະຊາກອນທັງໝົດໃນປີ 2021.

แชร์