ພືດຕະກຸນໝາກກ້ຽງລາວເລີ່ມເຈາະຕະຫຼາດຈີນ ຄັ້ງທຳອິດຕົ້ນປີໜ້າ

   ນັບເປັນຄວາມພາກພູມໃຈນຳຊາວສວນທີ່ ສປປ ລາວ ຈະເລີ່ມສົ່ງອອກພືດຕະກຸນໝາກກ້ຽງຄັ້ງທຳອິດໄປຍັງຕະຫຼາດໃຫຍ່ ສປ ຈີນ ໃນຕົ້ນໜ້າໂດຍເບື້ອງຕົ້ນຄາດວ່າຈະມີສົ່ງໄດ້ປະມານ 50 ພັນກວ່າໂຕນ ມູນຄ່າ 50 ລ້ານໂດລາ ຂະນະທີ່ເວລານີ້ຢູ່ທົ່ວປະເທດ ລາວມີເນື້ອທີ່ລວມປູກພືດຕະກຸນນີ້ 3,6 ພັນເຮັກຕາ 70% ແມ່ນປູກສະເພາະສົ່ງອອກ.

ເພື່ອຢືນຢັນການຈະສົ່ງອອກດັ່ງກ່າວໃນວັນທີ 5 ພະຈິກ 2021 ຈຶ່ງໄດ້ຈັດພິທີເຊັນອານຸສັນຍາທາງໄກກ່ຽວກັບຂໍ້ກຳນົດເງື່ອນໄຂດ້ານສຸຂານາໄມພືດສຳລັບການສົ່ງອອກພືດຕະກູນໝາກກ້ຽງ (ໝາກກ້ຽງເປືອກໜາ, ໝາກຜຸກ ແລະ ໝາກນາວເຫຼືອງ) ຂອງ ສປປ ລາວ ໄປ ສປ ຈີນ ໃຫ້ກຽດເຊັນຝ່າຍລາວໂດຍທ່ານ ເພັດ ພົມພີພັກ ລັດຖະມົນຕີກະຊວງກະສິກຳ ແລະປ່າໄມ້, ເຊັນຝ່າຍຈີນ ໂດຍທ່ານ ນີ ຢົວ ເຟິ່ງ ລັດຖະມົນຕີອົງການບໍລິຫານພາສີແຫ່ງ ສປ ຈີນ ໂດຍມີຫົວໜ້າ, ຮອງຫົວໜ້າກົມ, ຫົວໜ້າຫ້ອງການ ແລະພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານຢ່າງພ້ອມພຽງ.

   ການລົງນາມຄັ້ງນີ້ແມ່ນເພື່ອຈັດຕັ້ງປະຕິບັດໃນການຜັນຂະຫຍາຍວາລະແຫ່ງຊາດ ແລະມະຕິຂອງສະພາແຫ່ງຊາດກ່ຽວກັບການຜະລິດພືດເປັນສິນຄ້າເພື່ອສົ່ງອອກນໍາເອົາເງິນຕາເຂົ້າມາປະເທດໃນປີ 2021, ຊຶ່ງມີເນື້ອທີ່ປູກພືດຕະກຸນໝາກກ້ຽງທົ່ວປະເທດທັງໝົດ 3.620 ເຮັກຕາ, ຜົນຜະລິດ 57,5 ພັນເຮັກຕາ. ໃນນີ້, ເນື້ອທີ່ຜະລິດເປັນສິນຄ້າເພື່ອສົ່ງອອກມີ 2,5 ພັນເຮັກຕາ ຫຼືເທົ່າກັບ 70%, ຜົນຜະລິດປະມານ 50 ພັນກວ່າໂຕນ.

   ທັງໝົດນັ້ນແມ່ນກວມເອົາ 9 ແຂວງຄື: ຫຼວງນໍ້າທາ, ບໍ່ແກ້ວ, ໄຊຍະບູລີ, ຫຼວງພະບາງ, ນະຄອນຫຼວງວຽງຈັນ, ບໍລິຄໍາໄຊ, ສະຫວັນນະເຂດ, ຈຳປາສັກ ແລະແຂວງອັດຕະປືໂດຍມີ 9 ບໍລິສັດ ພາຍໃນທັງພາຍໃນ ແລະຕ່າງປະເທດ ໄດ້ຊຸກຍູ້ ແລະລົງທຶນໃນຮູບແບບ 2 ບວກ 3 ແລະເຊົ່າດິນນຳປະຊາຊົນ, ຄາດຄະເນຜົນຜະລິດເບື້ອງຕົ້ນທີ່ຈະສົ່ງອອກໄປ ສປ ຈີນ ມີປະມານ 50,000 ໂຕນ ຄິດເປັນມູນຄ່າປະມານ 50 ລ້ານໂດລາສະຫະລັດ ໃນຕົ້ນປີ 2022 ເປັນຕົ້ນໄປ.

   ສຳລັບຕົວເລກການສົ່ງອອກພືດພາຍໃນ 10 ເດືອນ ຂອງປີ 2021 ຜ່ານມາມີທັງໝົດ 800 ກວ່າລ້ານໂດລາສະຫະລັດ ທຽບໃສ່ໄລຍະເວລາດຽວກັນ ປີ 2020 ຜ່ານມາ (623 ລ້ານໂດລາສະຫະລັດ) ເຫັນວ່າເພີ້ມຂຶ້ນ 29% ຫຼື ເທົ່າກັບ 148 ລ້ານໂດລາສະຫະລັດ. ໃນນີ້,ຫຼາຍກວ່າ80% ຂອງມູນຄ່າສົ່ງອອກທັງໝົດແມ່ນຕະຫຼາດ ສປ ຈີນ ແລະພືດທີ່ສົ່ງອອກຫຼາຍກວ່າໝູ່ແມ່ນມັນຕົ້ນ, ໝາກກ້ວຍ, ໝາກໂມ, ອ້ອຍ, ຢາງພາລາ. 

   ສຳລັບການຈະສົ່ງອອກພືດຕະກຸນໝາກກ້ຽງລາວນີ້ກົມປູກຝັງໃນນາມເປັນອົງການປ້ອງກັນພືດແຫ່ງຊາດ (NPPO) ຂອງ ສປປ ລາວ ໄດ້ດຳເນີນການເຈລະຈາເຕັກນິກເປີດຕະຫຼາດກັບກົມກັກກັນພືດ ແລະສັດ, ອົງການບໍລິຫານພາສີແຫ່ງຊາດ ສປ ຈີນ ເພື່ອສົ່ງອອກໝາກຜຸກ, ໝາກກ້ຽງ ແລະໝາກນາວໄປ ສປ ຈີນ ໂດຍໃຊ້ເວລາເກືອບ 3 ປີ ເລີ້ມແຕ່ ປີ 2019 ເປັນຕົ້ນມາໂດຍຜ່ານຂະບວນການເຈລະຈາ ແລະປະຕິບັດຕາມຂັ້ນຕອນຕາມຄຳສັ່ງຂອງລັດຖະມົນຕີກະຊວງກະສິກໍາ ແລະປ່າໄມ້ ເລກທີ 0101/ກປ, ລົງວັນທີ 20 ມັງກອນ 2020 ແລະຄໍາແນະນຳຂອງລັດຖະມົນຕີກະຊວງກະສິກໍາ ແລະປ່າໄມ້ ເລກທີ 1288/ກປ ລົງວັນທີ 30 ກັນຍາ 2021.

แชร์