ຈີນ ຜະລິດຖ່ານຫີນເພີ່ມຂຶ້ນເພື່ອບັນເທົາວິກິດພະລັງງານ

 

  ເຈົ້າໜ້າທີ່ ສປ ຈີນ ເປີດເຜີຍວ່າ: ໄດ້ຜະລິດຖ່ານຫີນເພີ່ມຂຶ້ນວັນລະຫລາຍກວ່າ 1 ລ້ານໂຕນ ເພື່ອຫຼຸດຜ່ອນວິກິດການຂາດແຄນພະລັງງານ, ໃນຂະນະທີ່ຜູ້ນຳໂລກ ພວມປະຊຸມກ່ຽວກັບການແກ້ໄຂບັນຫາໂລກຮ້ອນຢູ່ສະກອດແລນ.

  ຕາມຂ່າວຕ່າງປະເທດລາຍງານວ່າ: ຈີນ ໃນຖານະຜູ້ນຳເຂົ້າຖ່ານຫີນລາຍໃຫຍ່ສຸດຂອງໂລກຕ້ອງປັນສ່ວນໄຟຟ້າຈົນສົ່ງຜົນກະທົບຕໍ່ຄວາມຕ້ອງການໃນຊຸມເດືອນ ຜ່ານມາເນື່ອງຈາກຕ້ອງຫຼຸດຜ່ອນການປ່ອຍກາກບອນຕາມເປົ້າໝາຍ ແລະລາຄາເຊື້ອໄຟຟ້າຊິນເພີ່ມສູງຂຶ້ນເປັນປະຫວັດການ, ຄະນະກຳມະທິການພັດທະນາ ແລະປະຕິຮູບແຫ່ງຊາດ ຊຶ່ງເປັນໜ່ວຍງານວາງແຜນທາງເສດຖະກິດລະດັບສູງຂອງຈີນຖະແຫຼງວ່າວິກິດການພະລັງງານໃນຈີນຫຼຸດລົງແລ້ວເນື່ອງຈາກຈີນໄດ້ເພີ່ມກຳລັງການຜະລິດຖ່ານຫີນພາຍໃນປະເທດເປັນວັນລະຫຼາຍກວ່າ 11 ລ້ານ 5 ແສນໂຕນ ນັບແຕ່ກາງເດືອນຕຸລາ ໂດຍເພີ່ມຂຶ້ນວັນລະ 1 ລ້ານ 1 ແສນໂຕນ ຈາກທ້າຍເດືອນກັນຍາ.

  ປະກອບກັບລາຄາຖ່ານຫີນໃນປະຈຸບັນໄດ້ຫຼຸດລົງຢ່າງຫຼວງຫຼາຍ ແລະສັນຍາການຊື້ຂາຍຖ່ານຫີນຫຼຸດລົງເຄິ່ງໜຶ່ງເຫຼືອໂຕນລະ 970 ຢວນໃນໄລຍະ 8 ວັນທີ່ຜ່ານມາ.

----

ໜັງສືພິມ ເສດຖະກິດ-ສັງຄົມ

แชร์