ສັບພະຄຸນທາງຢາຂອງມອກບໍ່ວາຍຈັດໜ້ອຍຄົນທີ່ຈະຮູ້

 

  ມອກບໍ່ວາຍຈັດ ເປັນພືດລົ້ມລຸກຂະໜາດນ້ອຍ, ອາຍຸຫຼາຍ ປີ. ລຳຕົ້ນສູງ 2-3 ຊມ. ໃບດ່ຽວ, ອອກວຽນສະຫຼັບເປັນວົງລັດສະໝີບໍລິເວນໂຄນຕົ້ນ, ຮູບບ່ວງ ຫຼື  ຮູບໄຂ່, ປ່ຽນໄປເຮັດໜ້າທີ່ດັກແມງໄມ້, ກວ້າງ 1-2.5 ຊມ, ສີຂຽວປົນແດງ, ມີຂົນປົກຄຸມຢ່າງໜາແໜ້ນ, ປາຍຂົນມີຕ່ອມນໍ້າເມືອກໜຽວໃຊ້ສຳລັບຈັບແມງໄມ້ຊໍ່ດອກແບບກະຈະ, ກາບດອກມີ 5 ກາບ, ສີແດງປົນຂຽວ, ສີຂົນ ກີບດອກມີ 5 ກີບ, ສີຂາວ ຫຼື ສີບົວອ່ອນ, ເກສອນເພດຜູ້ມີ 5 ອັນ, ໝາກຮູບກົມ, ຂະໜາດນ້ອຍ, ໝາກແກ່ແລ້ວແຕກພົບຕາມທົ່ງ ຫຍ້າເຂດກາງແຈ້ງ, ຕາມດິນຊາຍ ຫຼື ດິນຊຸ່ມນໍ້າ.

ສັບພະຄຸນ: ທັງຕົ້ນນຳມາຕາກແຫ້ງແລ້ວດອງເຫຼົ້າດື່ມແກ້ທ້ອງໄຂ່, ຕົ້ນສົດບົດໃຫ້ລະອຽດໃຊ້ທາ ແກ້ກາກເກື້ອນ, ຈຸລັງຜິວໜັງອັກເສບ, ຮັກສາງູກັດ, ນຳມາປຸ່ງເປັນ ຢາແກ້ບິດ, ຮັກສາຕ່ອມນໍ້າເຫຼືອງອັກເສບ, ແກ້ໄຂ້ມາລາເຣຍ ແລະເຮັດໃຫ້ຜິວໜັງແດງຈາກເລືອດຂັງ.

----

ຮຽບຮຽງໂດຍ: ຟ້າ

แชร์