ການຜະລິດກະສິກຳເປັນສິນຄ້າຂະຫຍາຍຕົວເພີ່ມຂຶ້ນ

  ໃນປີ 2020 ຜ່ານມາ, ເຖິງວ່າການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ຫຼາຍຂະແໜງການເຮັດໃຫ້ການຂະຫຍາຍຕົວຂອງຂະແໜງການຕ່າງໆຊ້າລົງ, ສະເພາະຂະແໜງກະສິກຳກໍ່ໄດ້ຮັບຜົນກະທົບ, ແຕ່ດ້ວຍຄວາມເອົາໃຈໃສ່ນໍາພາ-ຊີ້ນຳຂອງພັກ ແລະລັດຖະບານກໍ່ ຄືກະຊວງກະສິກຳ ແລະປ່າໄມ້ເຮັດໃຫ້ການຜະລິດກະສິກຳເປັນສິນຄ້າສາມາດຂະຫຍາຍຕົວເພີ່ມຂຶ້ນເລື່ອຍໆ.

  ຊຶ່ງໃນແຜນພັດທະນາກະສິກຳ, ປ່າໄມ້ ແລະພັດທະນາຊົນນະບົດ 5 ປີ ຄັ້ງທີ IX (2021-2025) ໄດ້ສະຫຼຸບຕີລາຄາການຈັດຕັ້ງປະຕິບັດແຜນພັດທະນາກະສິກໍາ, ປ່າ ໄມ້ ແລະພັດທະນາຊົນນະບົດ 5 ປີ ຄັ້ງທີ VIII (2016-2020) ໄດ້ລະບຸວ່າ: ການຊຸກຍູ້ສົ່ງເສີມການຜະລິດກະສິກໍາເປັນສິນຄ້າໃນປີ 2020 ຜ່ານມາ ມີການຂະ ຫຍາຍຕົວດີສົມຄວນເຊັ່ນ: ກາເຟ, ມັນຕົ້ນ, ໝາກເດືອຍ, ສາລີອາຫານສັດແມ່ນເພີ່ມຂຶ້ນຫຼາຍສົມຄວນ ແລະພືດບາງຊະນິດປະຕິ ບັດໄດ້ລື່ນແຜນການເປັນຕົ້ນແມ່ນ ການຜະລິດກາເຟສາມາດປະຕິ ບັດໄດ້ 158.190 ໂຕນ ລື່ນແຜນການ 32% (120.000 ໂຕນ); ມັນຕົ້ນປະຕິບັດໄດ້ 4,63 ລ້ານ ໂຕນ, ແຜນການ 5 ປີ 3 ເທົ່າຕົວ (1,5 ລ້ານໂຕນ); ໝາກເດືອຍປະຕິບັດໄດ້ 196.427 ໂຕນ, ບັນລຸ 92% ຂອງແຜນການ 5 ປີ (213.200 ໂຕນ); ອ້ອຍປະຕິບັດໄດ້ 1,19 ລ້ານໂຕນ ບັນລຸ 59% ຂອງແຜນການ 5 ປີ (2 ລ້ານໂຕນ), ສໍາລັບການຜະລິດສາລີແຂງເຫັນໄດ້ວ່າມີທ່າອ່ຽງຫຼຸດລົງຈາກ 1,24 ລ້ານໂຕນ ໃນປີ 2016 ມາເປັນ 518.126 ໂຕນໃນປີ 2020, ທັງນີ້ເນື່ອງຈາກຊາວກະສິກອນ ໄດ້ຫັນໄປປູກພືດອື່ນຫຼາຍຂຶ້ນ ໂດຍ ສະເພາະແມ່ນມັນຕົ້ນ ນອກຈາກນັ້ນກໍ່ມີການປູກພືດອື່ນໆຕາມທ່າແຮງຂອງແຕ່ລະທ້ອງຖິ່ນ.

  ການລ້ຽງສັດເປັນສິນຄ້າກໍ່ສາມາດຂະຫຍາຍຕົວດີພໍສົມຄວນບັນຫາສໍາຄັນແມ່ນສາມາດຜະລິດ ຮັບໃຊ້ຢູ່ພາຍໃນພຽງພໍ ໂດຍພື້ນຖານ, ໂດຍສະເພາະແມ່ນໝູ, ໄຂ່, ໄກ່ຊີ້ນ, ປາ ແລະງົວ, ການລ້ຽງສັດ ແລະລ້ຽງປາ ແມ່ນໄດ້ຫັນ ເປັນຟາມ, ເປັນໜອງ, ເປັນກະຊັງ ຊຶ່ງກ່ໍຖືເປັນການຫັນໄປສູ່ການຜະລິດແບບອຸດສະຫະກໍາ ແລະທັນສະ ໄໝໄດ້ມີທ່າອ່ຽງການຂະຫຍາຍຕົວສົມຄວນເຊັ່ນ: ປີ 2020 ຟາມ ລ້ຽງຄວາຍ ມີ 28 ຟາມ ຊຶ່ງມີ ຄວາຍ 1.550 ໂຕ; ຟາມລ້ຽງງົວ 387 ຟາມ, ມີງົວ 46.500 ໂຕ; ຟາມລ້ຽງໝູພັນ 442 ຟາມ, ມີໝູ 468.800 ໂຕ; ລ້ຽງແບ້ 53  ຟາມ, ມີແບ້ 5.230 ໂຕ; ຟາມລ້ຽງໄກ່ພັນໄຂ່ 263 ຟາມ, ມີໄກ່ ແມ່ໄຂ່ 1.612.430 ໂຕ; ຟາມລ້ຽງໄກ່ພັນຊີ້ນ 123 ຟາມ, ມີໄກ່ພັນຊີ້ນ 1.778.880 ໂຕ, ເປັດພັນໄຂ່ ແລະພັນຊີ້ນມີ 92 ຟາມ, ມີເປັດທັງໝົດ 347.500 ໂຕ.

  ຄຽງຄູ່ກັບການຜະລິດສັດເພື່ອສະໜອງການຊົມໃຊ້ພາຍໃນແລ້ວ, ຍັງໄດ້ສົ່ງອອກສັດໃຫຍ່ງົວ-ຄວາຍຕາມຊາຍແດນລາວ-ຈີນ, ລາວ-ໄທ ແລະຊາຍແດນລາວ-ຫວຽດນາມ ຊຶ່ງມີຫຼາຍກວ່າ 100.000 ໂຕ (ໃນນັ້ນ, ມີຄວາຍປະມານ 12.000 ໂຕ ແລະງົວ 88.000 ໂຕ).

----

ໜັງສືພິມ ເສດຖະກິດ-ສັງຄົມ

แชร์