ປະກາດ 5 ບ້ານຂອງເມືອງໜອງບົກເປັນບ້ານແບບຢ່າງກະສິກຳ

   ພິທີປະກາດຮັບຮອງບ້ານ ກຸດຈັບ, ບ້ານນາຈໍາປາ, ບ້ານນາຄໍາ, ບ້ານດອນຂຽວໃຕ້ ແລະບ້ານນາວາງໃຫຍ່ເປັນບ້ານທີ 5-9 ຂອງເມືອງໜອງບົກ ແລະເປັນບ້ານທີ 49-53 ຂອງແຂວງຄຳມ່ວນ, ໄດ້ຈັດຂຶ້ນໃນອາທິດທີ່ຜ່ານມາທີ່ໂຮງຮຽນປະຖົມບ້ານກຸດຈັບໂດຍການເຂົ້າຮ່ວມຂອງທ່ານ ສົມມາລາ ອ່ອນສີລິວົງ ຮອງເຈົ້າເມືອງໆໜອງບົກ, ທ່ານ ເດດສັກດາ ມະນີຄໍາ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ຄໍາມອນ ພົມພິພັກ ຫົວໜ້າຫ້ອງການກະສິ ກຳ ແລະປ່າໄມ້ເມືອງໜອງບົກພ້ອມດ້ວຍບັນດາແຂກຈາກພາກສ່ວນພະແນກການຂອງແຂວງ, ເມືອງ ແລະບ້ານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

  ທ່ານ ປີດາ ອຸປະໄຊ ນາຍບ້ານໆດອນຂຽວໃຕ້ ໄດ້ຕາງໜ້າໃຫ້ແກ່ນາຍບ້ານທັງ 5 ບ້ານລາຍງານຜົນການເຄື່ອນໄຫວຈັດຕັ້ງປະຕິບັດການສ້າງບ້ານແບບຢ່າງດ້ານກະສິ ກໍາເຊິ່ງໃນຈໍານວນ 5 ບ້ານດັ່ງກ່າວ ເປັນບ້ານທີ່ຕັ້ງຢູ່ໃນເຂດທົ່ງພຽງ, ມີເນື້ອທີ່ທັງໝົດ 2.342 ເຮັກຕາ, ໄດ້ແບ່ງອອກເປັນແຕ່ລະເຂດດິນ ຄື: ເຂດດິນກະສິກໍາ 1.629 ເຮັກ ຕາກວມເອົາ 69,5% ເຂດດິນ ປ່າໄມ້ 322 ເຮັກຕາກວມເອົາ 13,7% ແລະເຂດດິນອື່ນໆ 487 ເຮັກຕາກວມເອົາກວມເອົາ 20,7%, ດິນດັ່ງກ່າວໄດ້ສໍາເລັດ ການຈັດສັນ-ແບ່ງເຂດຕອນດິນ ແລ້ວ; ຈໍານວນ 5 ບ້ານມີ 1.062 ຄອບຄົວ, ຈຳນວນພົນລະເມືອງ 6.352 ຄົນ ຍິງ 3.190 ຄົນ. ໃນນັ້ນເປັນຄອບຄົວທີ່ເຮັດການຜະ ລິດກະສິກໍາທັງໝົດ 98% ປະກອບດ້ວຍ 2 ຊົນເຜົ່າໃຫຍ່ຄື: ເຜົ່າລາວ 78%, ເຜົ່າພຸໄທ 22%.

  ໃນເມື່ອກ່ອນປະຊາຊົນໄດ້ພາກັນດໍາລົງຊີວິດທໍາມາຫາກິນແບບອາໄສທຳມະຊາດຕິດພັນກັບປ່າໄມ້ເປັນຕົ້ນຕໍ, ການຕັ້ງຖິ່ນຖານບ້ານເຮືອນແມ່ນເລາະລຽບໄປຕາມແຄມສາຍນໍ້າເຊບັ້ງໄຟ, ນໍ້າຂອງ ແລະສາຍນໍ້າສາຂາຕ່າງໆເປັນເຂດທີ່ເໝາະສົມໃຫ້ແກ່ການປູກຝັງ-ລ້ຽງສັດ; ໃນຕອນດິນກະສິກໍາມີເນື້ອທີ່1.629 ເຮັກຕາ, ເນື້ອທີ່ປູກເຂົ້າ 1.109 ເຮັກຕາ, ເນື້ອທີ່ປູກພືດຊະນິດຕ່າງໆ 620 ເຮັກຕາ, ຈໍານວນສັດລ້ຽງມີ: ຄວາຍ 223 ໂຕ, ງົວ 1.363 ໂຕ, ໝູ 230 ໂຕ, ແບ້ 347 ໂຕແລະ ສັດປີກ 9.473 ໂຕ; ເນື້ອທີ່ໜອງປາທໍາມະຊາດ 66 ໜອງ, ຈຳນວນໜອງປາລ້ຽງມີ 8 ໜອງ, ຈໍານວນປາທີ່ລ້ຽງ 1,12 ແສນ ໂຕ, ມີລົດກົນຈັກ-ໄຖນາເດີນຕາມ-ເຄື່ອງປັ່ນເຂົ້າ 753 ຊຸດ; ມີເງີນກອງທຶນພັດທະນາບ້ານປະມານ 600 ລ້ານກວ່າກີບ, ມີການຈັດຕັ້ງກຸ່ມຜະລິດກະສິກຳ 10 ກຸ່ມມີ ສະມາຊິກ 121 ຄົນເຊັ່ນ: ກຸ່ມຜະ ລິດແນວພັນເຂົ້າ, ກຸ່ມຜະລິດພືດ ຜັກປອດສານພິດ, ກຸ່ມຜະລິດເຂົ້າ ເປັນສິນຄ້າ, ກຸ່ມລ້ຽງງົວ, ກຸ່ມປູກຜັກບົວຫົວແດງ, ກຸ່ມປູກຢາສູບ. ມີສູນບໍລິການເຕັກນິກກະສິກໍາ 1 ແຫ່ງ ມີລະບົບຊົນລະປະທານ 1 ລະບົບຄື: ລະບົບຊົນລະປະທານຈັກສູບນໍ້າດ້ວຍໄດສາມາດຫົດໄດ້ 311,22 ເຮັກຕາ, ໄດ້ມີການຝຶກ ອົບຮົມດ້ານວິຊາການ-ວິຊາຊີບ ດ້ານກະສິກຳ ແລະປ່າໄມ້ ແລະ ສ້າງໄດ້ວິຊາການກະສິກຳ ແລະ ປ່າໄມ້ປະຈໍາຢູ່ບ້ານ ເພື່ອນໍາພາຕົວຈິງຈໍານວນ 68 ຄົນ ໃນນັ້ນມີວິຊາການດ້ານຜະລິດແນວພັນເຂົ້າ, ຜະລິດເປັນສິນຄ້າ, ການລ້ຽງງົວ, ປູກຜັກບົວແດງ ແລະຢາສູບ.

  ສໍາລັບຄອບຄົວກະສິກຳ ແລະ ປ່າໄມ້ຕົວແບບສະຫຼຸບແລ້ວຄອບຄົວພາຍໃນບ້ານບັນລຸມາດຕະຖານທີ່ກຳນົດກວມເອົາ 98%, ສໍາລັບບ້ານແບບຢ່າງດ້ານກະສິກຳ ແລະ ປ່າໄມ້ສະຫຼູບແລ້ວບ້ານບັນລຸມາດຕະຖານທີ່ກຳນົດກວມເອົາ 98%.

  ໃນພິທີຕາງໜ້າຄະນະຫ້ອງການພາຍໃນເມືອງໄດ້ຜ່ານຂໍ້ຕົກລົງຂອງເຈົ້າເມືອງໆໜອງບົກວ່າດ້ວຍການຢັ້ງຢຶນບ້ານທີ່ສຳເລັດການຈັດສັນທີ່ດິນກະສິກຳ ແລະ ປ່າໄມ້ພ້ອມທັງໃບຢັ້ງຢຶນຍ້ອງຍໍກົມກອງ-ບຸກຄົນດີເດັ່ນປະຈຳປີ 2018 ຂໍ້ຕົກລົງຂອງເຈົ້າແຂວງຄຳມ່ວນ ວ່າດ້ວຍການອອກໃບຢັ້ງຢືນບ້ານແບບຢ່າງດ້ານກະສິກໍາ ແລະປ່າໄມ້ເປັນກຽດມອບໃບຢັ້ງຢືນບ້ານທີ່ສຳເລັດການຈັດສັນທີ່ດິນກະສິກຳ ແລະປ່າໄມ້ພ້ອມທັງໃບຍ້ອງຍໍກົມກອງ-ບຸກຄົນດີເດັ່ນໃນຂະບວນການປະກາດບ້ານແບບຢ່າງດ້ານກະສິກໍາ ແລະປ່າໄມ້ໂດຍແມ່ນ ທ່ານ ສົມມາລາ ອ່ອນສີລິວົງ ຮອງເຈົ້າເມືອງໜອງບົກ ແລະ ມອບໃບຢັ້ງຢຶນບ້ານແບບຢ່າງດ້ານກະສິກໍາ ແລະປ່າໄມ້ໂດຍແມ່ນທ່ານ ເດດສັກດາ ມະນີຄໍາ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ. ຫຼັງຈາກນັ້ນການນໍາຂັ້ນແຂວງ, ຂັ້ນເມືອງກໍໄດ້ນໍາພາບັນດາແຂກທຸກພາກສ່ວນທີ່ເຂົ້າຮ່ວມພ້ອມກັນເປີດປ້າຍ ແລະ ລັ່ນຄ້ອງ 9 ບາດ ເພື່ອປະກາດຮັບຮອງທັງ 5 ບ້ານ ເປັນບ້ານແບບຢ່າງດ້ານກະສິກໍາ ແລະ ປ່າໄມ້ຢ່າງເປັນທາງການ.

ໂດຍ: ແດງສະຫວັດ ແສນພານິດ  

แชร์