ນວ ໄດ້ຮັບເງິນຊ່ວຍເຫຼືອຈາກກຸ່ມແມ່ຍິງນັກການທູດອາຊຽນ

   ໃນອາທິດຜ່ານມາກຸ່ມແມ່ຍິງນັກການທູດອາຊຽນ ທີ່ນະຄອນຫຼວງວຽງຈັນ (ນວ) (ASEAN Women’s Circle in Vientiane-AWCV) ໂດຍສົມທົບກັບສະຫະພັນແມ່ຍິງກະຊວງການຕ່າງປະເທດນໍາໂດຍທ່ານ ນາງ ອາລຸນີ ກົມມະສິດ ປະທານກິດຕິມະສັກກຸ່ມແມ່ຍິງນັກການທູດອາຊຽນທີ່ນະຄອນຫຼວງວຽງຈັນ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ພັນລະຍາທ່ານລັດຖະມົນຕີກະຊວງການຕ່າງປະເທດໄດ້ມອບເງິນຊ່ວຍເຫຼືອ ຈໍານວນ 32 ລ້ານກີບໃຫ້ແກ່ອົງການປົກຄອງນະຄອນຫຼວງ ວຽງຈັນ. ເພື່ອເປັນການປະກອບ ສ່ວນເຂົ້າໃນວຽກງານປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດໂຄວິດ-19 ຢູ່ ນະຄອນຫຼວງວຽງຈັນ.

   ໃນໂອກາດມອບເຄື່ອງຊ່ວຍເຫຼືອດັ່ງກ່າວ, ທ່ານ ນາງ ອາລຸນີ ກົມມະສິດ ໄດ້ສະແດງຄວາມເປັນຫ່ວງເປັນໄຍຕໍ່ບັນດາໜ່ວຍງານດ່ານໜ້າກໍ່ຄືພະນັກງານແພດໝໍ, ທະຫານ, ຕໍາຫຼວດ ແລະຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນນະຄອນຫຼວງ, ເມືອງ ແລະບ້ານທີ່ຕ້ອງໄດ້ ແບກຮັບພາລະຢ່າງໜັກໜ່ວງໃນການປະຕິບັດໜ້າທີ່ວຽກງານຢ່າງຕໍ່ເນື່ອງພ້ອມທັງໄດ້ສະແດງຄວາມຊົມເຊີຍທຸກພາກສ່ວນທີ່ກ່ຽວຂ້ອງທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນຢ່າງຕັ້ງໜ້າໃນການປະກອບສ່ວນເຂົ້າໃນວຽກງານສະກັດກັ້ນ ແລະຕ້ານການລະບາດຂອງພະຍາດໂຄວິດ-19.

   ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ໄດ້ໃຫ້ກຽດຕ້ອນຮັບ ແລະ ສະແດງຄວາມຂອບໃຈມາຍັງກຸ່ມແມ່ຍິງນັກການທູດອາຊຽນທີ່ນະຄອນຫຼວງວຽງຈັນ ແລະສະຫະພັນແມ່ຍິງກະຊວງການຕ່າງປະເທດກໍ່ຄືການປະກອບສ່ວນຈາກບັນດາສະມາຊິກ ແລະສະຖານທູດອາຊຽນ ປະຈໍາ ສປປ ລາວ ທີ່ໄດ້ ປະກອບສ່ວນສົມທົບທຶນເພື່ອສະໜັບສະໜູນທາງດ້ານສະບຽງອາຫານໃຫ້ແກ່ຄະນະສະເພາະກິດ ແລະພະນັກງານດ່ານໜ້າໃນການ ປະຕິບັດໜ້າທີ່ວຽກງານເພື່ອຮັບ ມືກັບການລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ, ພ້ອມທັງໄດ້ຝາກສະແດງຄວາມຊົມເຊີຍໄປຍັງຄະນະພັກ-ຄະນະນຳກະຊວງການຕ່າງປະເທດມາໃນໂອກາດນີ້ດ້ວຍ.

   ກຸ່ມແມ່ຍິງນັກການທູດອາຊຽນທີ່ນະຄອນຫຼວງວຽງຈັນສ້າງຕັ້ງຂຶ້ນໃນປີ 2016, ຈຸດປະສົງເພື່ອສົ່ງເສີມຄວາມສາມັກຄີໃນອາຊຽນ, ການຮ່ວມມື ແລະ ຄວາມ ເຂົ້າໃຈເຊິ່ງກັນ ແລະກັນລະຫວ່າງສະມາຄົມແມ່ຍິງອາຊຽນ ທີ່ນະຄອນຫຼວງວຽງຈັນດ້ວຍການແລກປ່ຽນທາງດ້ານວັດທະນະທຳ ແລະສັງຄົມລະຫວ່າງສະມາຊິກໂດຍຜ່ານການຈັດກິດຈະກຳຕ່າງໆ ຮ່ວມກັນເຊັ່ນ: ການໄປແລກປ່ຽນວັດທະນະທຳຂອງແຕ່ລະປະເທດສະມາຊິກໃນກຸ່ມ, ຈັດງານລ້ຽງນໍ້າຊາພົບປະສ້າງສັນແລະແລກປ່ຽນວັດທະນະທຳປະຈຳປີຂອງສະຫະພັນແມ່ຍິງກະຊວງການຕ່າງປະເທດ ແລະ ນັກການທູດຍິງ ແລະ ທູຕານຸທູດເພດຍິງຈາກບັນດາສະຖານທູດ ແລະ ອົງການຈັດຕັ້ງ ສາກົນ ປະຈຳ ສປປ ລາວ. ນອກຈາກນັ້ນ, ຍັງໄດ້ຈັດກິດຈະກຳເພື່ອປະກອບສ່ວນຊ່ວຍເຫຼືອສັງຄົມເປັນຕົ້ນການລະດົມທຶນຊ່ວຍເຫຼືອແມ່ຍິງແລະເດັກນ້ອຍຜູ້ທຸກຍາກທີ່ຢູ່ຫ່າງໄກສອກຫຼີກ ແລະອື່ນໆ.

แชร์