ບໍ່ແກ້ວ ກຳນົດເອົາສະໂມສອນໃຫຍ່ແຂວງເປັນໂຮງໝໍສະໜາມປົວຜູ້ຕິດເຊື້ອໂຄວິດ

ຄະນະສະເພາະກິດແຂວງບໍ່ແກ້ວໄດ້ສືບຕໍ່ກຳນົດເອົາສະໂມສອນໃຫຍ່ຂອງແຂວງກຽມເປັນໂຮງໝໍພາກສະໜາມຂັ້ນແຂວງ ແລະເປັນບ່ອນກັກກັນຜູ້ຕິດເຊື້ອຫຼຸດຜ່ອນຄວາມແອອັດເພື່ອຮອງຮັບຜູ້ຕິດເຊື້ອໂຄວິດ-19 ທີ່ອາດເພີ່ມຂຶ້ນເປັນຈໍານວນຫຼາຍໃນກໍລະນີທີ່ຜູ້ຕິດເຊື້ອລົ້ນໂຮງໝໍ. ເນື່ອງຈາກສະພາບການລະບາດຂອງພະຍາດໂຄວິດ-19 ຢູ່ແຂວງບໍ່ແກ້ວມີຈຳນວນຜູ້ຕິດເຊື້ອມີທ່າອ່ຽງເພີ່ມຂຶ້ນ ແລະຈຳນວນຜູ້ຕິດເຊື້ອສະສົມຮອດວັນທີ 29 ຕຸລາ ມີ 1.783 ຄົນປິ່ນປົວຫາຍດີ 1,417 ຄົນ, ພວມປິ່ນປົວ365 ຄົນ, ປົວດີໃໝ່ 10 ຄົນ, ເສຍຊີວິດສະສົມ 1 ຄົນ.


ປະຈຸບັນທົ່ວແຂວງມີສູນປິ່ນປົວ 7 ແຫ່ງຄື: ໂຮງໝໍແຂວງ, ສູນປິ່ນປົວທະຫານແຂວງ, ສູນປີ່ນປົວມົກກະຈອກ, ໂຮງໝໍເມືອງຕົ້ນເຜິ້ງ, ໂຮງໝໍສະໜາມເມືອງປາກທາ, ໂຮງໝໍເມືອງຜາອຸດົມ ແລະໂຮງໝໍສະໜາມເຂດເສດຖະກິດພິເສດແຂວງບໍ່ແກ້ວ ແລະເພື່ອເປັນການຮອງຮັບກໍລະນີຕິດເຊື້ອພະຍາດໂຄວິດ-19 ເພີ່ມຂຶ້ນນັ້ນ, ຄະນະສະເພາກິດແຂວງບໍ່ແກ້ວຈຶ່ງໄດ້ສືບຕໍ່ຂະຫຍາຍໂຮງໝໍສະໜາມເພີ່ມຢູ່ເມືອງຫ້ວຍຊາຍ, ຊຶ່ງກຳລັງແຮງງານຂອງຊາວໜຸ່ມຕະລຸ່ມບອນແຂວງນຳໂດຍທ່ານ ນາງ ດວງຕາ ໄຊຍະຫົງ ເລຂາຄະນະບໍລິຫານງານຊາວໜຸ່ມແຂວງບໍ່ແກ້ວໄດ້ອານາໄມ, ປັດກວາດ, ຈັດຕຽງນອນໃຫ້ເປັນລະບຽບ.


ຕາມຂໍ້ມູນຈາກພະແນກສາທະລະນະສຸກແຂວງໃຫ້ຮູ້ວ່າ: ໃນວັນທີ 29 ຕຸລາ 2021 ນີ້, ຫ້ອງວິເຄາະໂຮງໝໍແຂວງໄດ້ເກັບຕົວຢ່າງໄປວິເຄາະຫາເຊື້ອຈໍານວນ 472 ຕົວຢ່າງ ແລະພົບກໍລະນີຜູ້ຕິດເຊື້ອໃໝ່ໃນຊຸມຊົນ 52 ຄົນ ທັງໝົດແມ່ນຢູ່ເມືອງຫ້ວຍຊາຍຄື: ບ້ານປ່າອ້ອຍ 38 ຄົນ, ບ້ານນໍ້າງາວ 4 ຄົນ, ບ້ານໜອງຄຳ 3 ຄົນ, ບ້ານຫ້ວຍຊາຍເໜືອ 2 ຄົນ, ບ້ານອຸດົມ 5 ຄົນ, ບ້ານປາກງາວ 1 ຄົນ, ບ້ານໂພນໄຊ 1 ຄົນ ແລະບ້ານຫ້ວຍຊາຍໃຕ້ 1 ຄົນ.


ຂ່າວ: ຄຳພັນ ແກ້ວມະນີ

แชร์