ປກສ ແຂວງສະຫວັນນະເຂດ ຈູດທໍາລາຍຢາເສບຕິດ 668,910 ກຣາມ

    ຢາເສບຕິດແມ່ນສິ່ງທ້າທາຍອັນໃຫຍ່ຫລວງທີ່ເປັນໄພອັນຕະລາຍຕໍ່ມວນມະນຸດ, ເປັນບໍ່ເກີດແຫ່ງການກໍ່ອາດຊະຍາກໍາ, ການສໍ້ລາດບັງຫລວງ, ກົດໜ່ວງຖ່ວງດຶ່ງການສ້າງສາພັດທະນາເສດຖະກິດ-ສັງຄົມ, ສະນັ້ນມາໃນວັນທີ 29 ຕຸລາ 2021 ນີ້ ກອງບັນຊາການ ປກສ ແຂວງສະຫວັນນະເຂດ ໄດ້ຈັດພິທີທໍາລາຍຢາເສບຕິດ ເນື່ອງໃນວັນແຫ່ງຊາດຕ້ານຢາເສບຕິດ (12 ຕຸລາ 2001 ຫາ 12 ຕຸລາ 2021) ຄົບຮອບ 20 ປີ ໂດຍການເປັນທານຂອງ ທ່ານ ສັນຕິພາບ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆສະຫວັນນະເຂດ.


   ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ, ທັງເປັນປະທານກະກຽມສະເຫລີມສະຫລອງວັນແຫ່ງຊາດຕ້ານຢາເສບຕິດໄດ້ໃຫ້ຮູ້ວ່າ: ໄລຍະໜຶ່ງປີຜ່ານມາ ກອງບັນຊາການ ປກສ ແຂວງສະຫວັນນະເຂດ ສາມາດມ້າງຄະດີ ແລະຈັບກຸມຜູ້ກະທໍາຜິດຄ້າຂາຍຢາເສບຕິດໄດ້ທັງໝົດ 342 ລາຍ, ຜູ້ຖືກຫາ 592 ຄົນ, ຍິງ 53 ຄົນໃນນັ້ນມີຕ່າງປະເທດ 10 ຄົນ, ຢຶດຂອງກາງຄະດີປະເພດຢາບ້າໄດ້ 1.578.413 ເມັດ, ຢາໄອສ໌ 13 ຖົງໃຫຍ່ 8 ຖົງກາງ 144 ຖົງນ້ອຍ ແລະ 23 ຫລອດ,ກັນຊາແຫ້ງ 1.070 ແທ່ງກັບ 3 ກິໂລກຣາມ, ຢາເຄ 1 ຖົງນ້ອຍ,ໂຄເຄນ 0,7948 ກຣາມ ແລະໄດ້ຢຶດຊັບສິນປະເພດຕ່າງໆເຊັ່ນ: ພາຫະນະ, ສິ່ງປຸກສ້າງ, ອາວຸດ ແລະວັດຖຸມີຄ່າເປັນຈໍານວນຫຼວງຫຼາຍ.


   ສ່ວນຂອງກາງຄະດີປະເພດຢາເສບຕິດທີ່ສານຕັດສິນໃຊ້ໄດ້ຢ່າງເດັດຂາດທີ່ນໍາອອກທໍາລາຍຄັ້ງນີ້ລວມນໍ້າໜັກ 668,910 ກຣາມ ໃນນີ້ມີຢາບ້າ 621.247 ເມັດ, ນໍ້າໜັກ 76.910 ກຣາມ, ຢາໄອສ໌ 1.014 ກຣາມ ແລະກັນຊາແຫ້ງ 590,515 ກຣາມ.

แชร์