ອົງການພັດທະນາສາກົນ ສະຫນອງທຶນ 525 ລ້ານກວ່າກີບ ໃຫ້ສະພາທະນາຍຄວາມລາວ

   ວັນທີ 28 ຕຸລານີ້ ທີ່ສໍານັກງານສານປະຊາຊົນນະຄອນຫຼວງວຽງຈັນ, ອົງການພັດທະນາສາກົນປະເທດສະຫະລັດອາເມລິກາ ຫຼື USAID ໄດ້ສະໜັບສະໜູນທຶນ ມູນຄ່າ 525,16 ລ້ານກີບ ໃຫ້ແກ່ສະພາທະນາຍຄວາມລາວ.

  ທຶນດັ່ງກ່າວນີ້ເປັນສ່ວນຫນຶ່ງຂອງແຜນງານການຊ່ວຍເຫຼືອທາງດ້ານກົດໝາຍສະໜັບສະຫນູນໂດຍອົງການພັດທະນາສາກົນປະເທດສະຫະລັດອາເມລິກາທີ່ຈັດຕັ້ງປະຕິບັດໂດຍມູນນິທິເອເຊຍ. ສະພາທະນາຍຄວາມລາວຈະນໍາໃຊ້ທຶນນີ້ໃນສືບຕໍ່ການດໍາເນີນງານຂອງຫ້ອງການຊ່ວຍເຫຼືອທາງດ້ານກົດໝາຍ 17 ແຫ່ງ ຢູ່ ນະຄອນຫຼວງວຽງຈັນ, ຈໍາປາສັກ, ສະຫວັນນະເຂດ, ສາລະວັນ, ຫຼວງພະບາງ, ອຸດົມໄຊ, ໄຊຍະບູລີ ແລະແຂວງວຽງຈັນ.

   ທ່ານ ໄມເຄິລ ຣອນນິ້ງ ຜູ້ຕາງໜ້າອົງການພັດທະນາສາກົນປະເທດສະຫະລັດອາເມລິກາກ່າວວ່າ: ການສະຫນັບສະຫນູນທຶນດັ່ງກ່າວນີ້ເປັນການຢືນຍັນເຖິງຄວາມມຸ່ງໝັ້ນຂອງສະຫະລັດອາເມລິກາກັບລັດຖະບານແຫ່ງ ສປປ ລາວ ພາຍໃຕ້ກອບການເປັນຄູ່ຮ່ວມມືຮອບດ້ານລະຫວ່າງສອງປະເທດເພື່ອສົ່ງເສີມນະໂຍບາຍການສ້າງລັດທີ່ຄຸ້ມຄອງລັດຄຸ້ມຄອງສັງຄົມດ້ວຍກົດໝາຍໃນ ສປປ ລາວ. ອົງການພັດທະນາສາກົນປະເທດສະຫະລັດອາເມລິກາມີຄວາມມຸ່ງໝັ້ນທີ່ຈະສືບຕໍ່ສະຫນັບສະຫນູນ ແລະຄຽງຄູ່ກັບລັດຖະບານລາວ".

แชร์