ເກືອບ 90% 3 ໂຄງການເທສະບານໄຊສົມບູນ

   ວັນທີ 27 ຕຸລາ 2021 ພະແນກໂຍທາທິການ ແລະຂົນສົ່ງແຂວງໄຊສົມບູນໄດ້ຈັດກອງປະຊຸມປຶກສາຫາລືກ່ຽວກັບການຈັດຕັ້ງປະຕິບັດໂຄງການກໍ່ສ້າງເທເບຕົງຖະໜົນໄຊຊະນະ, ໂຄງການກໍ່ສ້າງເທເບຕົງຖະໜົນອະນຸວົງ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນແຄມນໍ້າຈັ້ງຊ່ວງ 2 ເທສະບານ ແຂວງໄຊສົມບູນ ທີ່ຫ້ອງປະຊຸມສານປະຊາຊົນແຂວງໂດຍການເປັນປະທານຂອງທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງຜູ້ຊີ້ນໍາວຽກງານຂົງເຂດເສດຖະກິດ, ມີປະທານກວດກາພັກ-ລັດ ແຂວງ, ພ້ອມດ້ວຍເຈົ້າເມືອງອະນຸວົງ, ມີຫົວໜ້າ-ຮອງຫົວ ໜ້າພະແນກການຕະຫຼອດຮອດຕ່າງໜ້າຈາກ 3 ບໍລິສັດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ຈາກນັ້ນ ທ່ານ ຄໍາຫຼ້າ ວົງຫຼໍ່ຄໍາ, ຮອງຫົວໜ້າຂະແໜງຄຸ້ມຄອງທາງບົກ-ທາງນໍ້າໄດ້ຂຶ້ນຜ່ານບົດລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດໂຄງການກໍ່ສ້າງເສັ້ນທາງເບຕົງຖະໜົນໄຊຊະນະ, ໂຄງການກໍ່ສ້າງເທເບຕົງຖະໜົນອະນຸວົງ ແລະໂຄງການກໍ່ສ້າງປ້ອງກັນຕາຝັ່ງເຈື່ອນແຄມນໍ້າຈັ້ງ ໃນ 3 ໂຄງການນີ້ແມ່ນໄດ້ຈັດຕັ້ງປະຕິບັດສໍາເລັດແລ້ວ 88,95%. ໃນນີ້ໜ້າວຽກທີ່ຍັງຄ້າງຄາຂອງໂຄງການທີ່ຈະໄດ້ຈັດຕັ້ງປະຕິບັດໃນຕໍ່ໜ້າເປັນຕົ້ນໂຄງການກໍ່ສ້າງເທເບຕົງຖະໜົນໄຊຊະນະແມ່ນຈະໄດ້ສືບຕໍ່ເທເບຕົງທາງ ອ້ອມຫໍຫຼັກເມືອງ,ຕິດຕັ້ງເສົາເຍືອງ ທາງຊ່ວງ 2 ແຕ່ສີແຍກວັດພູເງິນຫາສາມແຈກບ້ານຜາສະຫງົບ, ປິດຂຸມພັກນໍ້າ ແລະອື່ນໆອີກຕາມໜ້າວຽກທີ່ຍັງບໍ່ທັນສໍາເລັດ.

 ໂຄງການກໍ່ສ້າງເທເບຕົງຖະໜົນອະນຸວົງແມ່ນຈະສືບຕໍ່ຕິດຕັ້ງລະບົບໄຟຟ້າເຍືອງທາງຂອງທາງເບຕົງແຕ່ບ້ານຜາສະຫງົບຫາຫ້ອງວ່າການ, ສ້ອມແປງທາງແຕ່ສີແຍກບ້ານພູຫົວຊ້າງຫາວົງວຽນທະນາຄານການຄ້າຊຶ່ງມີລວງຍາວ 769 ແມັດ, ກໍ່ສ້າງຂົວກົງກັນຂ້າມກັບນໍ້າຈັ້ງ.

   ໂຄງການກໍ່ສ້າງປ້ອງກັນຕາຝັ່ງກັນເຈື່ອນແຄມນໍ້າຈັ້ງຊ່ວງທີ 2 ນີ້ ຈະໄດ້ສືບຕໍ່ກໍ່ສ້າງສ່ວນສາທາລະນະຈຸດທີ 1, ຈຸດ 2 ແລະ ຈຸດ 3, ກໍ່ສ້າງຮ່ອງລະບາຍນໍ້າແຕ່ຫໍຫຼັກເມືອງລົງຫານໍ້າຈັ້ງ, ກໍ່ສ້າງຮ່ອງລະບາຍນໍ້າແຕ່ໜອງຊ່ວງເຮືອ ແລະຫ້ວຍມ້າລົງຫານໍ້າຈັ້ງທັງໝົດນີ້ແມ່ນຈະໄດ້ຈັດຕັ້ງປະຕິບັດໃຫ້ສໍາເລັດໃນທ້າຍປີ 2021.

   ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຜັດປ່ຽນກັນຂຶ້ນປະກອບຄໍາຄິດຄໍາເຫັນຢ່າງກົງມາກົງມາດ້ວຍຄວາມຮັບຜິດຊອບສູງທັງນີ້ກໍ່ເພື່ອເຮັດໃຫ້ບັນດາໜ້າວຽກຂອງ 3 ບໍລິສັດໄດ້ຈັດຕັ້ງປະຕິບັດໃນຕໍ່ໜ້າ ແລະໃຫ້ສໍາເລັດຕາມແຜນການທີ່ໄດ້ກໍານົດໄວ້ໄດ້ 100%.

แชร์