ຫາລື ເລື່ອງນັກໂທດຕ່າງຊາດປະຕິບັດໂທດຄົບກຳນົດ

ຂ່າວ: ອອປສ

  ວັນທີ 25 ຕຸລາກົມຕິດຕາມກວດກາຄ້າຍຄຸມຂັງ-ດັດສ້າງອົງການໄອຍະການປະຊາຊົນສູງສຸດໄດ້ຈັດກອງປະຊຸມປຶກສາຫາລືກ່ຽວກັບນັກໂທດຕ່າງປະເທດທີ່ປະຕິບັດໂທດຕັດອິດສະລະພາບຄົບກໍານົດຕາມຄໍາຕັດສີນແລ້ວ, ແຕ່ບໍ່ທັນໄດ້ປ່ອຍຕົວຍ້ອນເຫດຜົນຍັງບໍ່ທັນໄດ້ເສຍຄ່າປັບໃໝ, ໂດຍມີ ທ່ານ ຂັນທະວີ ວິໄລສັກ ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ, ມີບັນດາຮອງຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ, ກົມຕິດຕາມກວດກາທົ່ວໄປ, ຄະນະສານອາຍາສານປະຊາຊົນສູງສຸດ, ກົມສ່ວຍສາອາກອນກະຊວງການເງິນ, ກົມຄຸ້ມຄອງປະຕິບັດຄໍາຕັດສີນຂອງສານກະຊວງຍຸຕິທໍາ ແລະກົມຕໍາຫຼວດຄຸມຂັງ-ດັດສ້າງກະຊວງປ້ອງກັນຄວາມສະ ຫງົບເຂົ້າຮ່ວມ.

 ກອງປະຊຸມ, ໄດ້ຮັບຟັງການລາຍງານຂອງທ່ານ ນາງ ຄໍາຫຼ້າ ສຸວັດ ຮອງຫົວໜ້າກົມຕິດຕາມກວດກາຄ້າຍຄຸມຂັງ-ດັດ ສ້າງກ່ຽວກັບການຄົ້ນຄວ້າພິຈາລະນາໂດຍຫຍໍ້ເພື່ອໃຫ້ກອງປະຊຸມປະກອບຄໍາເຫັນແລກປ່ຽນເຊິ່ງກັນ ແລະກັນເພື່ອຊອກຫາວິທີທາງແກ້ໄຂໃຫ້ສອດຄ່ອງຕາມກົດໝາຍ ແລະລະບຽບການກໍານົດໄວ້.

 ກອງປະຊຸມ, ຍັງໄດ້ຮັບຟັງການໂອ້ລົມ ແລະຊີ້ນໍາຂອງທ່ານ ຂັນທະວີ ວິໄລສັກ, ຊຶ່ງທ່ານກໍ່ໄດ້ສະແດງຄວາມເປັນເອກະພາບສູງກ່ຽວກັບຄໍາຄິດຄໍາເຫັນຂອງບັນດາທ່ານຕໍ່ກັບບັນຫາດັ່ງກ່າວເພື່ອຮັບປະກັນໃນການຈັດຕັ້ງປະຕິບັດຕາມເນື້ອໃນບົດບັນທືກຮ່ວມ 4 ພາກສ່ວນ ຄັ້ງທີ IV ກ່ຽວກັບການດໍາເນີນຄະດີຕາມຂະບວນຍຸຕິທໍາ ແລະຖືກກັບຕົວຈິງສະເໜີໃຫ້ການຈັດຕັ້ງທີ່ກ່ຽວຂ້ອງເປັນເຈົ້າການໃນການສືກສາອົມຮົມຜູ້ຖືກປະຕິບັດຄໍາຕັດສີນຂອງສານໃຫ້ມີຄວາມຕື່ນຕົວ ແລະ ເປັນເຈົ້າການໃນການປະຕິບັດຄໍາຕັດສີນຂອງສານຕາມກົດໝາຍທີ່ກໍານົດໄວ້; ໃນຕໍ່ໜ້າມອບໃຫ້ການຈັດຕັ້ງທີ່ກ່ຽວຂ້ອງຮິບຮ້ອນຄົ້ນຄວ້າຊອກຫາວິທີການ, ມາດຕະການແຕ່ຫົວທີ່ເພື່ອເຮັດໃຫ້ການຈັດຕັ້ງປະຕິບັດຄໍາຕັດສີນຂອງສານກ່ຽວກັບໂທດປັບໃໝ ແລະການໃຊ້ແທນຄ່າເສຍຫາຍສາມາດປິດຄະດີແລະມີຜົນສໍາເລັດ.

แชร์