ຊ່ອງທາງເຂົ້າຫາເງິນກູ້ສູ່ທຸລະກິດ

ຂ່າວ: ຣັດສະໝີ ດວງສັດຈະ

   ປະຈຸບັນບັນຫາແຫຼ່ງທຶນພວມເປັນທີ່ສົນໃຈຂອງສັງຄົມໂດຍສະເພາະໃນໄລຍະທີ່ມີການລະບາດຂອງພະຍາດໂຄວິດ-19 ເຮັດໃຫ້ປະຊາຊົນກໍ່ຄືບັນດາຜູ້ປະກອບການໃນການຜະລິດພາກກະສິກໍາ; ຈຸລະວິສາຫະກິດ, ວິສາຫະກິດຂະໜາດນ້ອຍ ແລະກາງ (MSME) ພົບຄວາມຫຍຸ້ງຍາກ; ສະນັ້ນ, ລັດຖະບານກໍ່ຄືທະນາຄານແຫ່ງ ສປປ ລາວ, ກອງທຶນສົ່ງເສີມວິສາຫະກິດ SME (ທສວ) ແລະພາກສ່ວນກ່ຽວຂ້ອງໄດ້ມີຄວາມພະຍາຍາມເພື່ອໃຫ້ສັງຄົມໄດ້ເຂົ້າເຖິງແຫຼ່ງທຶນດອກເບ້ຍຕໍ່າ, ໄລຍະຍາວດ້ວຍຫຼາຍຮູບແບບລວມທັງການສ້າງຕັ້ງທະນາຄານສະເພາະກິດ, ໂຄງການສົ່ງເສີມສິນເຊື່ອແກ້ໄຂຜົນກະທົບພະຍາດດັ່ງກ່າວ ແລະສະຖາບັນການການເງິນອື່ນໆໃຫ້ການບໍລິການລູກຄ້າໃນຜ່ານມາ.

 ການເຂົ້າຫາແຫຼ່ງທຶນຍັງມີຂອບເຂດຈໍາກັດເນື່ອງມາຈາກຫຼາຍປັດໄຈລວມທັງທະນາຄານ-ສະຖາບັນການເງິນ ແລະທັງກະໂຕລູກຄ້າເອງ; ສະນັ້ນໃນວັນທີ 22 ຕຸລາ 2021, ສະມາຄົມການເງິນຈຸລະພາກ (ສມກຈ) ຮ່ວມກັບອົງການແຮງງານສາກົນ (ILO) ປະຈໍາ ສປປ ລາວແລະພາກສ່ວນກ່ຽວຂ້ອງໄດ້ຈັດການຝຶກອົບຮົມອອນລາຍຜ່ານ Zoom ພາຍໃຕ້ຫົວຂໍ້: “ການເຂົ້າເຖິງການເງິນ-ການຈັດຫາເງິນທຶນໃຫ້ກັບວິສາຫະກິດ” ຈັດຂຶ້ນໃນວັນທີ 22 ຕຸລາ 2021 ໂດຍເລັ່ງໃສ່ໃຫ້ຜູ້ເຂົ້າຮ່ວມມີຄວາມຮັບຮູ້ເຂົ້າໃຈບັນດາເງື່ອນໄຂ ແລະ ປັດໃຈການເຂົ້າເຖິງແຫຼ່ງທຶນຈາກທະນາຄານ-ສະຖາບັນການເງິນໂດຍເນັ້ນຄວາມສໍາຄັນຂອງການຈັດຫາເງິນທຶນສໍາລັບທຸລະກິດ; ທາງເລືອກສໍາລັບການຈັດຫາເງິນທຶນຂອງວິສາຫະກິດ; ຄວາມເຂົ້າໃຈກ່ຽວກັບເງື່ອນໄຂຂອງການຈັດຫາທຶນໂດຍສະເພາະໃນໂຄງການຂອງກອງທຶນ SME ຜ່ານລະບົບທະນາຄານ-ສະຖາບັນການເງິນທີ່ເຂົ້າຮ່ວມໂຄງການ.

  ສໍາລັບເງື່ອນໄຂໃນການກູ້ຢືມທີ່ມີອັດຕາດອກເບ້ຍ ແລະໄລຍະການກູ້ຂຶ້ນກັບອົງການ ແລະພາກສ່ວນໃຫ້ທຶນຊຶ່ງມີແຫຼ່ງມາຈາກທຶນບ້ວງຂອງລັດຖະບານປະກອບທຶນກໍ່ຕັ້ງໃຫ້ທສວ ເພື່ອໃຫ້ທະນາຄານປ່ອຍກູ້ເຂົ້າໃນການຜະລິດສິນຄ້າໜຶ່ງເມືອງໜຶ່ງຜະລິດຕະພັນຂອງລັດຖະບານ (ODOP) ໃນອັດຕາດອກເບ້ຍ 6,5%-9% ປີ, ສູງສຸດບໍ່ເກີນ 7 ປີ; ບ້ວງເງິນໂຄງການເຂົ້າເຖິງແຫຼ່ງທຶນຂອງ SME ສາມາດຮັບສິນເຊື່ອທຸກຂະແໜງການ, ອັດຕາດອກເບ້ຍ 7%-11% ປີ, ສູງສຸດບໍ່ເກີນ 7 ປີ, ມີ 4 ທະນາຄານ; ບ້ວງເງິນສະສົມຂອງ ທສວ ທີ່ໄດ້ຈາກດອກເບ້ຍມີ 1 ທະນາຄານ, ກູ້ໄດ້ບໍ່ເກີນ 2 ຄັ້ງ ຕໍ່ໜຶ່ງຫົວໜ່ວຍ ໃນວົງເງິນສູງສຸດ 1,6 ຕື້ກີບຕໍ່ສັນຍາ, ອັດຕາດອກເບ້ຍ 5,5%-6%ປີ, ສູງສຸດບໍ່ເກີນ 7 ປີ; ປ່ອຍສິນເຊື່ອຜ່ານ 7 ສະຖາບັນການເງິນໃນວົງເງິນສູງສຸດບໍ່ເກີນ 50 ລ້ານກີບຕໍ່ສັນຍາ, ສາມາດກູ້ໄດ້ບໍ່ເກີນ 2 ຄັ້ງ ສໍາລັບທຶນຄົງທີ່, ອັດຕາດອກເບ້ຍ 1% ຕໍ່ເດືອນ ຫຼື 12% ປີ, ທຶນຄົງທີ່ 1-5 ປີ, ທຶນໝູນ ວຽນ 1 ປີລົງມາ.... ສໍາລັບ; ບ້ວງເງິນລັດຖະບານອັດຕາດອກເບ້ຍ 3% ປີ, ກູ້ໄດ້ບໍ່ເກີນ 2 ຄັ້ງຕໍ່ໜຶ່ງຫົວໜ່ວຍ, ຈຸລະວິສາຫະກິດບໍ່ເກີນ 1,5 ຕື້ກີບຕໍ່ສັນຍາ, ວິສາຫະກິດຂະໜາດນ້ອຍບໍ່ເກີນ 3 ຕື້ກີບ ຕໍ່ສັນຍາ ແລະກາງບໍ່ເກີນ 4 ຕື້ກີບຕໍ່ສັນຍາ, ທຶນໝູນວຽນບໍ່ເກີນ 5 ປີ, ທຶນຄົງທີ່ບໍ່ເກີນ 10 ປີ; ນອກນີ້, ຍັງມີບ້ວງທຶນໂຄງການເຂົ້າເຖິງແຫຼ່ງທຶນຂອງ MSME ເພື່ອຮັບມືກັບຜົນກະທົບ ແລະຟື້ນຟູຈາກພະຍາດໂຄວິດ-19 ນໍາອີກ.

แชร์